詞庫化

Lexicon 化（粵拼：lek1 sik4 kan4 faa3；英文：lexicalization），或者叫詞庫化，係語言演變嘅重要一環，指將新嘅字詞（或者慣用語等用字詞嘅方法）加入去一隻語言嘅 lexicon 度嘅過程。

機制

睇埋：詞庫

詞庫化嘅過程可以係靠好多唔同嘅機制嚟做：

• 合成詞：技術性噉講，合成詞係指一個詞位可能由多個詞幹組成，簡化講即係兩隻各有意思嘅字砌埋一齊做一隻自成個新意思嘅字；例如講英文嘅人望到雪糕，可以攞住 ice（冰）同 cream（忌廉）呢兩隻本身喺英文入面各有意思嘅字，砌埋一齊變成 ice cream（雪糕）呢隻新字。
• 減筆（abbrv.）：將啲現有嘅字縮短，通常係由原先隻字或者句嘢度攞最重要嗰啲部份出嚟，最後形成隻新字或者句新句子，例如廣東話個英文名－Cantonese－以英文嚟講係一隻幾長嘅字，成日畀人減筆做 Canto，形成 Canto-pop（指粵語流行曲）等嘅字詞。
• 頭字語：淨係適用於寫起上嚟會攞字母寫嘅語言，指將隻詞用字母寫低，再攞隻詞每個字開頭嗰個字母，砌做一隻新字，例如北大西洋公約組織個名噉，北大西洋公約組織嘅英文名叫 North Atlantic Treaty Organization，啲人覺得吓吓都要講或者寫嗮個全名好煩，所以就攞住嗰 4 隻字開頭嘅字母－N、A、T 同 O－做隻新字 NATO，用呢隻字指北大西洋公約組織。
• 借詞：指由第啲語言度借啲字詞嚟用。

睇埋

• 構詞學
• 形態素
• 揳夫簡潔定律