構詞學

構詞學kau3 ci4 hok6（morphology）係語言學嘅其中一個分支，專門研究字嘅結構同埋佢哋啲組成規矩。

基本概念

• 形態素（morpheme，可以做粵拼：mo1 fim4）：指可以有意思嘅最細可能單位，唔一定能夠自成一隻字詞；攞英格蘭話做例子，想像以下呢啲字

  Redo（動詞再做過噉解）

  Reappear（動詞再出現噉解）

  －當中嘅 re- 本身唔能夠自成一隻字詞，但帶有再... 噉嘅意思，同時 re- 再斬細件啲就唔會再有咩意思可言。所以 re- 係英格蘭話入面嘅一嚿形態素。

• 字（word）：「字」呢個概念喺語言學上要點樣定義，查實係有些少爭議性；字嘅一個常見定義係指「包含最少一個形態素（睇返上面）、可以單獨噉存在嘅語言單位」，例如上面提到嘅 re- 就係一個形態素但唔係一隻字，因為佢喺正常講嘢當中唔可以單獨噉存在；正路嚟講，一隻字會有以下呢啲特徵－
  1. 係對答嗰陣嘅最短可能答覆；
  2. 係「要再變長啲有難度」嘅單位當中最大嘅；
  3. 如果一句句子要變，一隻字係「能夠郁動，同時郁咗又唔會搞到句句子唔啱文法」嘅最細單位；
  • ... 呀噉。亦都要留意，語言學上嘅字（指講嘢或者寫嘢嗰陣一隻隻由形態素組成嘅物體）同文字（攞嚟寫嘢嘅系統）係兩個好唔同嘅概念，不過兩者喺粵文入面個名好似，啲人成日撈亂。
• 詞形變化（inflection）同文法範疇（grammatical category）：一種文法範疇係指一隻語言嘅文法入面物件可以有嘅特徵；每個範疇都有若干個可能數值，如果一隻字要由其中一個數值傳去第個數值，好多時就要做詞形變化－隻字變樣嚟表達佢屬個文法範疇嘅邊個數值 ；廣東話冇乜顯著嘅詞形變化，但英格蘭話就有，
  • 時態（tense，粵拼：ten1 si2）：時態係一種文法範疇，一隻字喺時態上有「過去式」同「現在式」等嘅幾個可能值；喺英格蘭話裏面，如果一隻字要變時態，通常都要做詞形變化，隻字要變樣嚟表達時態，例如 run（跑）呢隻字做過去式嗰陣要變成 ran 。
  • 數量：又用英格蘭話做例子，喺英格蘭話入面，數量係一種文法範疇，一隻字喺數量上有「單數」同「眾數」等嘅幾個可能值；喺英格蘭話裏面，如果一隻字要由單數變成眾數，通常（但唔一定）會喺隻字後面加個 s，例如 cat 係指一隻貓，而 cats 就係指多過一隻貓。某啲語言對文法數量仲會有更加複雜嘅變化，唔淨只分單數眾數咁簡單。
  • 字幹（stem）：一隻字嘅意思最「核心」嗰部份，無論隻字點做詞形變化，字幹嗰橛都唔會變樣，例如英文字 wait（等待噉解）可以變成

    waits（現在式，第三人稱）、waited（過去式）... 呀噉，

    －當中 wait 呢橛係無論進行啲乜詞形變化都唔會走樣嘅，所以就係隻字嘅字幹。

語言分類

孤立語（isolating language）同綜合語（synthetic language）係一個基於構詞方法做嘅語言分類。

孤立語唔會點用詞形變化或者黏着式構詞，即係 morpheme : 字嘅比例會接近 1:1，而綜合語就啱啱相反，會勁用詞形變化以及黏着式構詞，由一橛橛嘅 morpheme 砌一啲長、包含好多段 morpheme 嘅字出嚟；

• 廣東話等嘅漢語以及越南話都偏向孤立，廣東話例句：gwong2 dung1 waa2 hou2 zeng3（漢字：廣東話好正）－每隻字都淨係包含一段 morpheme 所以「啲字好孤立」。
• 英格蘭話就冇廣東話咁孤立，例如 redo（重新做過，現在式）就包含兩段 morpheme：re-（重新...）同埋 do（做）。

有啲語言嘅綜合程度仲犀利過英格蘭話，例如土耳其話可以有啲類似噉嘅嘢：parasızlıklarından（意思：因為佢哋嘅窮困）呢隻字包含好多橛－

para（錢）

sız（冇）

lık（表示前面嗰橛當名詞噉用，而「冇錢」呢樣特性 = 窮困）

... 等，每橛都表達緊啲意思。

除咗土耳其話，仲可以睇吓日本話、德國話同埋格魯吉亞話入面嗰啲構詞方式。

睇埋

• 語義學
• 資訊理論