語言純化

語言純化（粵拼：jyu5 jin4 seon4 faa3；英文：linguistic purism），個英文名直接意譯可以叫語言純淨主義，係一類有關語言嘅理念，屬規範語言學。提倡語言純化嘅人認為，講同寫某隻語言嗰陣要排除「外來影響」先至可以達致「純正嘅語言」。

個案

粵語

廿一世紀初嘅粵語群體冇乜明顯嘅語言純化傾向，不過現代粵語有唔少嚟自英文嘅借詞，提倡粵語純化嘅人可能會反對人用呢啲借詞。追求「純漢語式粵語」嘅人可能會主張粵語群體要淨係用源自漢語嘅詞彙同用法，排斥嚟自百越語或者歐洲語言嘅詞彙同用法。

英文

内文：英文純化

例如支持英文純化嘅 16 世紀英格蘭學者莊·赤就試過噉樣講：

原文句子："Our tung shold be written cleane and pure."

現代串法："Our tongue should be written clean and pure."

粵譯：「我哋嘅語言應該要寫得乾淨又純潔。」

分析吓佢呢一句嘢，

Our	tongue	should	be written	clean	and	pure	.
決定詞	名詞	助動詞	動詞（被動式）	形容詞	連接詞	形容詞
我哋嘅	語言	應該	被寫到...	乾淨	同	純潔

留意佢用咗 tung（現代串法係 tongue；大致似粵拼：tang1）一字，呢隻名詞通常係指脷，但又可以指語言噉嘅意思。Tongue 呢隻字詞經過語源考證，係英文固有字詞（可以睇睇日耳曼語言），有別於嚟自拉丁文嘅 language 一字—佢寫嘢講嘢嗰時，淨係肯用英文固有字詞，唔肯用嚟自拉丁文嘅外來字詞。

睇埋

• 借詞
• 語言意識形態