警訊》(英文Police Magazine/Police Report)係香港電台電視部同香港警務處警察公共關係科合作製作嘅電視節目,作為警民合作嘅橋樑。

呢個節目主要係以打擊罪案為主,香港警務處會派代表同埋節目主持人一齊出席電視節目,內容會有案件重演形式嘅短片,向香港市民披露有關罪案嘅資料,等啲目擊罪案嘅市民致電警方去提供相關罪案嘅線索。案件重演形式嘅短片亦都會教導市民一啲犯人/騙徙嘅犯案手法,希望市民能夠提高警惕,減少日常罪案嘅發生。

節目亦都有介紹香港警務署嘅一啲運作,譬如會介紹吓警員嘅配備同埋裝束,唔同部門嘅運作,支援機構…等等,令到一般市民對香港警隊有更加多嘅了解,從而加深警民關係,達致共同打擊罪案嘅目的。

歷史

「警訊」節目嘅開始要數返去1973年,當時正值係香港肅貪倡廉時代嘅開始(嗰年就係發生咗警務處副處長薜畿揭發總警司葛柏嚴重貪污事件嘅一年);加上社會經濟嘅起飛,大小罪案相繼增加,當時嘅皇家香港警務處認為有需要加深警民合作同埋教導市民去防止罪案率上升,亦都知道係時候要提升警隊嘅正面形象,攞返市民對警隊嘅信心;眼見電視廣播嘅力量日漸咁影響普羅大眾,於是就搵同一樣係政府機構兼且係官方喉舌嘅香港電台聯合推出撲滅罪行嘅電視節目,就係咁,「警訊」就一直同香港市民共同撲滅罪行,與及見証著香港警隊嘅改進歷程。

2020年8月12號「警訊」播出最後一集。

「少年警訊」

內文: 少年警訊

為咗加深新一代對罪行嘅認識,一齊撲滅罪行,同埋希望教育嗰啲青少年唔好誤入歧途,喺「警訊」節目播出嘅一年之後(即係1974年),警務處就開展咗「少年警訊計劃」,佢嘅四個宗旨係:

  1. 促進警方同香港青少年之間嘅溝通同認識;
  2. 喺撲滅罪行工作上面促使警方同青少年並肩合作;
  3. 鼓勵青少年認識佢哋喺社會上面嘅責任;及
  4. 提供各種運動、活動同訓練設施,充實同埋改善青少年嘅生活。

節目主題曲

起初嘅警訊節目,主題曲以簡單嘅純音樂作為開場同埋結尾曲,曲風感覺硬崩崩,聽落亦都幾嚴肅冇乜人情味。

後來因為一齣由成龍主演嘅香港電影【警察故事】,片中嗰首壯志激情嘅主題曲【硬漢子】就取代舊嘅音樂,成為咗警訊節目嘅新主題歌。(哩首歌原唱係成龍)

再後來,為咗要令警訊節目更有時代感同埋減少嚴肅嘅氣氛,希望廣大觀眾會更加受落,於是乎就搵咗一啲實力派歌手唱出專門為節目而作嘅主題歌;其中就有知名香港歌手張學友為節目唱出剛柔並濟嘅【勇敢的故事】。

案件重演短劇

每集警訊節目入面都會有案件重演嘅短劇,等觀眾了解犯案手法。2015年11月,其中一齣「假金行騙案」短劇喺香港網民間瘋傳,演員馬溱禧吳良榮等表現被網民讚揚。[1]

睇埋

參考

  1. "爆笑過《愛.回家》 《警訊》短劇狂吸Like". 原著喺2015年11月21號歸檔. 喺2015年11月20號搵到.

出面網頁