開主選單
一個戴住官帽嘅韓國官員;據講鑊耳屋嘅設計係基於官帽嗰對耳仔嘅。

鑊耳屋粵拼:Wok6 ji5 uk1)係嶺南建築傳統民居嘅代表,多數用青磚、石柱、同石板砌出嚟,外牆有啲花同雀仔嘅圖案,因為佢哋埲山牆形狀似鑊耳,所以嗌做「鑊耳屋」。嶺南北部嘅客家地區興嗌佢做「雲牆」或者係「茶壺環」。鑊係古代嗰陣嘅一種大鍋,所以鑊耳屋有時又會畀人嗌做「鍋耳屋」。

目錄

建築特點

鑊耳屋好似大明嗰啲官帽嘅兩隻耳仔,有「獨占鰲頭」咁嘅意思,淨係得有功名嘅鄉村先至有資格用,所以亦都係嗰時啲人家境殷實嘅象徵。鑊耳屋用嘅材料好講究,而且造工精細。例如係鑊耳屋用嘅青磚,以打磨嘅水磨青磚為上乘,如果唔係有啲錢嘅人家,係用唔起住唔起嘅。又例如係屋兩邊嘅鑊耳,佢哋結構由簷口至個頂用兩排瓦筒壓頂並用灰塑封好,處理收口嘅工藝,係成座建築工程入面難度最高,造價最貴嘅地方[1]

鑊耳狀嘅建築有防火,通風性能良好呢啲特點。火燭嗰陣,高聳嘅山牆可以阻止火勢蔓延同入侵;有微風吹嗰陣,山牆可以擋啲風入巷嗰度,進而通過門同窗流入屋度。民間重有「鑊耳屋」蘊含富貴吉祥,豐衣足食嘅講法。鑊耳屋以廣府風格嘅民居建築為主要嘅代表,但係潮汕客家嘅民居建築都有類似嘅鑊耳山牆。

由正面睇兩埲高聳嘅牆呈鑊耳咁嘅形狀,由側面睇就似個「凸」,睇得出嗰時珠三角古居民嘅建築風格。當時嘅順德重有一種以蠔殼砌牆嘅居屋,而嗰頭間唔中亦都有啲用蠔殼代替青磚起嘅鑊耳屋-廣州海珠區嘅黃埔古港同小洲村就有啲咁嘅建築物[2][3]

圖庫

睇埋

  1. 孟杰. (2017). 镬耳屋: 旧时光里的那抹弧度. 中华民居, (1), 12-23.
  2. 张甘霖, & 徐玉苗. (2011). 岭南锅耳屋艺术风格研究. 美术学报, (4), 80-85.
  3. 黄湘寒. (2016). 岭南建筑——锅耳屋. 少儿美术, (2), 36-36.