長春園

長春園喺香港元朗區錦田水頭村，大概1860年起。長春園係整個錦田古蹟群裏面，唯一訓練武科人材嘅學堂。古物古蹟辦事處將長春園評為一級歷史建築。

建築

成座建築嘅屋脊同木斗栱以簡單嘅圖案嚟裝飾，正面牆頂部份嘅兩個圓窿係用作防禦用途。屋前面起咗風水牆用嚟擋煞。門前嘅對聯寫住「長守中原舊，春回大陸新」。磚牆用青磚砌成，兩層而中空，用嚟散熱同防止滲水。長春園嘅正廳「留耕堂」，安放咗長春園列祖嘅神位，畀子孫供奉。

長春園由泝流園鄧氏族人鄧權軒嘅後代起，係兩進式設計嘅建築物。園裏面設有一個練武場，舊時啲武舉人就係喺度訓練出來。而家園裏面仍然放置咗三把曾經用嚟習武嘅鐵關刀，分別重65斤、85斤同112斤，長8呎10吋、9呎同9呎4吋。除此之外，園裏面更安放咗練武石同石鎖等。