雪白同玫瑰紅

《雪白同玫瑰紅》（德文：Schneeweißchen und Rosenrot）係一個《格林童話》都有收錄嘅童話故事。佢個故仔嘅主角係雪白同玫瑰紅呢對姊妹，情節講兩個女仔遇到識講嘢嘅熊人jan2同埋忘恩負義嘅矮人。

呢幅廿世紀初嘅插圖，描繪想像中嘅雪白同玫瑰紅兩姊妹。

順帶一提，呢個故仔查實同《白雪公主》咩關係都冇：《雪白同玫瑰紅》嘅其中一個主角叫雪白，而且故事嘅情節裡便又有提到矮人，但係考證表示兩個故事冇啦掕，呢啲相似之處只不過係純屬巧合。

嗌法

個故仔响粵語、德文同英文入便嘅呔圖，都係兩位主角嘅名。

• 德文：Schneeweißchen und Rosenrot
  • Schneeweißchen —雪白，有異於《白雪公主》個主角嘅德文名叫 Schneewittchen。
  • Rosenrot —玫瑰紅噉嘅意思。
• 英文：Snow-White and Rose-Red
• 粵拼：syut3 baak6 tung4 mui4 gwai3 hung4

情節

《雪白同玫瑰紅》嘅情節大致係以下噉嘅。

話說好耐好耐以前，有個好窮嘅寡母婆，佢有兩個女—雪白同紅玫瑰。三母女就住咗喺森林裡便嘅一間屋仔度。雪白同紅玫瑰呢兩位少女嘅性格好唔同—雪白份人好文靜，中意留响屋企打理家頭細務同埋睇書，而紅玫瑰就好外向，最中意出戶外去玩。不過佢哋兩個都好乖好聽阿媽話，兩姊妹感情仲非常之咁好。

喺一個白雪紛飛嘅冬天夜晚，三母女屋企有人敲門。玫瑰紅去應門，一打開道門就見到隻熊人jan2。玫瑰紅當堂嚇咗一大跳，但係點知隻熊跟住就開始講嘢，而且仲好斯文：

「小姐唔使驚。我無意傷害任何人。不過出面凍得好交關，我想入嚟取吓暖。」

心哋善良嘅雪白同玫瑰紅畀隻熊入屋，隻熊坐喺火前面取暖，坐坐吓仲同兩個少女玩咗陣，一路留到第二朝先返入森林。自從嗰晚之後，隻熊晚晚都會嚟三母女嘅屋仔取暖，同兩姊妹玩到熟晒。

後來夏天到咗，隻熊同三母女講，話有個邪惡嘅矮人想偷佢嘅財寶，所以佢要離開一排。然後有一日，兩姊妹喺森林裡便遇到一個矮人，個矮人嘅鬍鬚畀樹枝纏住咗。郁唔到嘅佢一見到兩姊妹就大聲求救，兩位少女上前幫手，但係鬚同樹枝纏到好實，最後佢哋就焗住要攞把鉸剪剪斷啲鬍鬚。矮人得救，但完全唔識感恩：

「你兩個妹釘！我把鬚咁靚，你哋竟然剪斷佢！？我咒你哋行衰運呀！」

嗰一年嘅夏天，兩姊妹試過再撞到矮人，每次佢哋都幫矮人解難，但矮人次次都係完全唔識感恩。

有一日，兩姊妹又撞到矮人。今次係有隻熊人jan2追住佢。矮人求晒饒噉哀ai1隻熊：

「唔好殺我呀！你肚餓嘅話，食嗰兩個𡃁妹啦！」

隻熊唔理矮人嘅哀求，一掌打死咗佢。而喺下一刻，隻熊就變咗身做一位英俊嘅王子：原來矮人先前對王子落咗咒令佢變成熊，仲偷走咗王子嘅寶石。作惡嘅矮人一死，王子身上嘅咒就失效。王子記得雪白同玫瑰紅之前款待過佢，對兩姊妹有好感。到咗最後，雪白同王子結婚，而玫瑰紅就嫁咗畀王子個細佬，兩姊妹做咗貴族，佢哋阿媽亦唔使再捱窮。

自此之後，大家都開開心心噉生活落去。大團圓結局。

插圖

• 
  雪白同玫瑰紅兩姊妹心哋好好。
• 
  雪白同玫瑰紅招待熊人jan2。
• 
  雪白同玫瑰紅遇到矮人。
• 
  雪白同玫瑰紅郁手剪斷矮人嘅鬚。
• 
  雪白同玫瑰紅多次幫助遇到麻煩嘅矮人。
• 
  熊殺矮人。
• 
  熊殺矮人。
• 
  熊變王子。

連結

• 《白雪公主》
• （英文） 文學 / 雪白同玫瑰紅，電視橋段網講呢個故仔。