矮人

  提示：呢篇文講嘅唔係侏儒。

矮人（粵拼：ngai2 jan4 / 英文：dwarf，眾數係 dwarves）係源自古代日耳曼人民俗嘅一種傳說生物，亦都成日出現喺廿世紀起嘅奇幻故仔當中，例如《魔戒》嘅世界就有以矮人族做中土世界嘅主要種族之一。

一個典型嘅 20 世紀矮人形象

喺現代奇幻當中，精靈通常畀人描繪成生得矮，但身體粗壯力大無窮，男嘅矮人通常會有濃密嘅鬍鬚，好多時畀人描繪成喺工藝上有特殊天賦，能夠打造精良嘅武器，例如《魔戒》入面就有零舍擅長採礦同打造武器嘅矮人族。

古代傳說

19 世紀一幅圖畫，描繪廿世紀前傳說中嘅矮人嘅形象。

睇埋：仙子、精靈同北歐神話

矮人嘅形象源自日耳曼人（德國人、瑞典人同挪威人等幾個民族嘅祖先）嘅民間傳說。根據呢啲傳說，矮人屬於仙子（fairy）嘅一類，可以再細分幾種，不過冚唪唥都生得矮，有啲得嗰 45 cm 左右咁高，個樣據講就多數似鬍鬚濃密嘅老男人，有啲會駝背。

啲傳說仲有講到，矮人可以分做山矮人同礦矮人兩大派：

• 山矮人：顧名思義住喺深山；山矮人有相當程度嘅文明，分做多個王國同部落，有高度嘅社會組織－啲傳說有講到矮人國王同軍隊；佢哋會住喺地底嘅宮殿裏面，儲埋好多黃金同寶石，而且佢哋仲好聰明，擅長金工等嘅工藝，識得用礦物打造有魔法力量嘅劍同戒指，有部份嘅傳說甚至仲話山矮人有特異能力，曉（例如）變身或者隱形呀噉。一般認為，山矮人冇乜惡意，有陣時仲可能會好心幫人，不過有部份嘅山矮人會偷嘢，甚至拐走人類，尤其鍾意拐生得靚嘅後生女仔。
• 礦矮人：據講住喺礦山底層，一般都冇山矮人咁友善，所以礦工好多時都會因為驚咗佢哋而（例如）擺低啲嘢食喺礦場度做貢品。

現代奇幻

睇埋：奇幻種族、托爾金、魔戒同中土世界

廿世紀起嘅奇幻故仔成日都會提到矮人，當中英格蘭作家托爾金（J. R. R. Tolkien）嘅《魔戒》（LotR）廣泛噉畀人話係創始咗現代奇幻當中嘅矮人形象：托爾金深受日耳曼人嘅文化影響，大量噉喺佢啲作品裏面採用源自古日耳曼民間傳說嘅橋段，例子有矮人同精靈；《魔戒》描繪嘅中土世界嘅居民分做好幾個種族，當中矮人就係其中一族；中土世界裏面啲矮人同日耳曼人傳說入面嗰啲好相似－佢哋生得矮但身體粗壯力大無窮、著住好似維京人噉嘅服裝、鍾意黃金同酒、鬍鬚濃密、而且擅長採礦同打造武器。

《魔戒》係20世紀最出名嘅奇幻作品之一，對奇幻界影響深遠，例如

• 《龍與地下城》（D&D）、
• 《魔法風雲會》（MtG）、
• 《魔獸世界》（WoW）、
• 《闇龍紀元》（Dragon Age）、
• 《OVERLORD》
• 《銀河洞穴大冒險》

... 等嘅奇幻作品都有用到托爾金式嘅矮人。

家傳戶曉嘅德文童話故事《白雪公主》都有講到擅長採礦嘅七個小矮人。

圖集

《龍與地下城》嘅矮人 《龍與地下城》嘅矮人  中土世界嘅矮人形象 中土世界嘅矮人形象  呢幅畫描繪雪白同玫瑰紅遇到小矮人。 呢幅畫描繪雪白同玫瑰紅遇到小矮人。

呢幅插圖描繪七個小矮人望住瞓著咗嘅白雪公主。 呢幅插圖描繪七個小矮人望住瞓著咗嘅白雪公主。

睇埋

• 奇幻種族
• 盧恩魔法
• 高扁
• 矮精靈

文獻

• （英文） Griffiths, Bill (1996). Aspects of Anglo-Saxon Magic. Anglo-Saxon Books.
• （英文） Liberman, Anatoly (2016). In Prayer and Laughter. Essays on Medieval Scandinavian and Germanic Mythology, Literature, and Culture. Paleograph Press.

拎

• （英文） 矮人，不列顛百科全書講矮人相關傳說。
• （英文） 我哋啲矮人全部都一樣㗎，電視橋段網呢頁講矮人橋段。