預演佔中

預演佔中，或者叫佔中預演，係香港2014年7月2號凌晨搞嘅一場和平靜坐集會，目的係預先演習讓愛與和平佔領中環將會搞嘅佔領行動。呢場演習由學聯同學民思潮發動，喺7月1號夜晚七一遊行完咗之後，停留喺遊行終點中環遮打道通宵留低靜坐，計劃到朝早8點就和平離開。但警方凌晨3點開始就急住清場，一路清到朝早8點幾，拉咗511人，包括立法會議員何俊仁、李卓人及梁耀忠。

不過，到最後正式嘅「佔領中環」就因為警方唔批10月1號喺遮打道集會，而唔可以照原先計劃去搞，反而因為學聯同學民思潮發動9月下旬發起罷課同喺政府總部出面集會，陰差陽錯噉演化咗做雨遮運動，變成佔領金鐘、旺角、銅鑼灣，同「預演佔中」嘅內容完全係兩樣嘢。