香港五百蚊紙
五百蚊紙（500元紙幣）係一種香港流通貨幣，面值500港元，係目前面額第2大嘅香港銀紙，俗稱「大牛」（1909年出嘅匯豐銀行500蚊紙正面圖案有一隻牛）。500蚊紙以啡色為主色。
目前500蚊紙由香港3間發鈔銀行發行。現時以鈔票冧巴計，500蚊紙發行量係排第3。由於市面上出現大量滙豐銀行2000年同埋2002年版本嘅一千蚊假銀紙，令市民對一千蚊紙冇晒信心，所以滙豐銀行最近印多咗500蚊紙，取代唔多受歡迎嘅一千蚊紙。
歷史
編輯500蚊紙早喺19世紀中已經由當時其中兩間發鈔銀行──香港上海匯理銀行（即後來嘅滙豐銀行）同埋印度新金山中國匯理銀行（即後來嘅渣打銀行）發行。直到二次大戰之前，兩間發鈔銀行嘅500蚊紙設計分別出現咗幾次變化，尺寸、色水、風格一直都有唔同。
戰後，兩間發鈔銀行繼續出戰前款式嘅500蚊紙。有利銀行亦喺1948年加入發行500蚊紙，但只係出到1959年。直到1962年，渣打銀行改咗500蚊紙設計，除咗大幅縮細之外，鈔票圖案設計改動唔大。
喺1973年，滙豐銀行大幅更改銀紙設計，尺寸大幅縮細。渣打銀行亦喺1979年大幅更改銀紙設計，尺寸大幅縮細，以中國傳統瑞獸為題材，當中500蚊紙用咗「鳳凰」。
自1987年起，滙豐銀行重新設計500蚊紙，尺寸再次「縮水」，變成家下嘅大細。1988年，渣打銀行亦重新設計500蚊紙，尺寸再次「縮水」，變成家下嘅大細。
喺1993年，兩間發鈔銀行因應香港主權移交臨近，改咗原本帶有英國色彩嘅銀紙設計。不過，渣打銀行嘅銀紙變動唔大，沿用以往嘅「鳳凰」圖案。到咗1994年，中國銀行香港分行（即後來嘅中銀香港）亦加入發行500蚊紙。
喺2003年，3間發鈔銀行嘅500蚊紙設計一齊改，加入相近嘅防偽特徵。
咁啱得咁巧，現時嘅新台幣500蚊紙，亦係以啡色為主調。