香港都會大學
香港都會大學（英文：Hong Kong Metropolitan University，簡稱：都會大學或都大，縮寫：HKMU），係位於香港九龍何文田嘅自資大學，以「有教無類」同「寬進嚴出」為辦學精神。大學喺1989年由香港政府成立，由七間學院組成，分別係人文社會科學院、李兆基商業管理學院、科技學院、護理及健康學院、教育及語文學院、公開進修學院同李嘉誠專業進修學院。大學擁有自行評審資格，可以頒授學位至榮譽博士各級學銜。大學係香港第一間主要採用遙距教學方式嘅大學，2001年起開辦全日制課程，並喺2007年起參與大學聯合招生辦法（JUPAS）收生。現任校長係林群聲教授。
| 香港都會大學 | |
|---|---|
 | |
| 英文名 | Hong Kong Metropolitan University |
| 校訓 | 公誠毅樸，開明進取 Disce, Progredere, Crea（拉丁文） |
| 開辦 | 1989年5月成立：香港公開進修學院 1997年5月30日改名：香港公開大學 2021年9月1日改名：香港都會大學 |
校名
編輯香港公開大學創校嗰陣叫香港公開進修學院（英文：Open Learning Institute of Hong Kong），1997年開始改叫香港公開大學（英文：The Open University of Hong Kong，縮寫：OUHK）。2020年12月，校方決定改名做香港都會大學（英文：Hong Kong Metropolitan University），新校名喺2021年9月1號生效[1]。
教學模式
編輯遙距教學
編輯遙距課程係香港都會大學由創辦至今一直開辦嘅課程。大學會向報讀遙距課程嘅學生派發自學教材，部分課程更包括多媒體教材[2]。大學嘅導師會喺平日夜晚或星期六日定期舉行導修課（Tutorial）等。遙距課程冇規定學生一定要去上堂，但係部分遙距課程規定學生一定要出席特定嘅課堂或實驗堂。此外，大學會安排導師喺指定嘅時間透過電話、電郵或用互聯網為學生提供指引同協助。導師亦會根據學生完成嘅功課畀評語，幫助學生學習。
雖然大部分遙距課程採用開放入學模式，冇入學學歷限制，亦冇規定要讀幾耐，但係學生一定要喺修讀課程期間完成指定功課（TMA或CMA），並喺期終考試合格，先至可以獲得嗰科嘅學分。此外，每一個遙距課程，包括文憑同學位課程，都設有修讀規則，學生一定要遵循修讀規則，累積指定科目嘅學分，先至可以申請嗰個課程嘅學歷證書。
全日制面授教學
編輯全日制課程係香港都會大學近年主力發展嘅課程[3]，同其他大學嘅全日制課程相似，以演講課堂（Lecture）同導修課堂（Tutorial）作為學習方式，部分課程更包括實驗同實習。面授課程主要分為全日制同兼讀制兩種，部分全日制面授學位課程已經加入大學聯合招生辦法（JUPAS）。