香港區議會

  提示：呢篇文講嘅唔係香港議會。

呢篇文係香港政治系列之一
憲制文件 《英皇制誥》 《皇室訓令》 《中英聯合聲明》 《中華人民共和國憲法》 《香港特別行政區基本法》
行政長官：李家超 行政長官辦公室 行政會議（成員） 維護國家安全委員會 政府（組織架構） 政府總部（所在地） 政治任命官員 公務員 首長級公務員 政務職系 議會：立法會 現屆立法會（議員） 選舉方式： 地區直選 功能界別 區議會（第二） 選舉委員會議席 司法機構 香港法律制度 香港法例 獨立法定機構 廉政公署 審計署 申訴專員公署 公務員敍用委員會 地方行政 香港政區 區議會 民政事務處（專員） 地區管理委員會 市政局 / 區域市政局 相關機構 公營機構 新界鄉議局
選舉 選舉管理委員會 選舉事務處 行政長官選舉（上屆／下屆） 選舉委員會 立法會選舉（上屆／下屆） 區議會選舉（上屆／下屆） 政黨 非親中派 泛民主派（組織同埋人士） 溫和民主派 激進民主派 本土派 自決派 抗爭派 修憲派 非民主派 傳統親中派（組織同埋人士） 激進親中派 商界親中派 中間派 香港民主運動 香港政制改革（1997年之前） 香港政制改革（1997年之後）
港區全國人大代表 港區全國政協委員
中共香港事務機構 中央港澳工作領導小組 粵港澳大灣區建設領導小組 國務院港澳事務辦公室 中共駐香港機構 中共中央香港工委（中聯辦） 中央駐港國安公署 外交部駐港特派員公署 解放軍駐港部隊 香港對外事務機構 政制及內地事務局 港府駐京辦 香港經貿辦（內地） 香港經貿文辦（台灣） 商務及經濟發展局 香港經貿辦（海外） 香港貿易發展局 禮賓處
香港軍事 駐港英軍 駐港解放軍
香港榮譽制度 授勳及嘉獎制度 排名表 太平紳士
其他香港系列
文化 - 經濟 歷史 - 地理 - 教育 香港主題
類:國政 • Portal:政治

區議會（英文：District Council）係香港地區層次嘅議會，就地方日常生活事務向政府提供意見，同埋運用公帑撥畀地區公共工程同埋舉辦社區活動。香港十八區都有區議會，而家一共有區議員479人，一屆任期四年。最新一屆區議會選舉已經響2019年11月24號舉行。

香港區議會雖然係香港議會制度嘅一部份，但並唔具有現代議會最重要嘅兩項權力：立法同審批政府公共開支嘅權力，皆因香港係無地區嘅法律同稅收。

香港區議會嘅政制演變

1981年1月，香港政府喺《地方行政白皮書》建議香港推行三級行政機構，當中嘅第三級行政機構就係區議會。之後喺1981年到1982年間，十八個區議會逐個成立，當時區議會啱啱起步，成員淨係得官守同委任議員。第一屆區議會選舉響1982年舉行。當時，區議會嘅官守議員同非官守議員人數大致一樣，民選議員同委任非官守議員人數都差唔多。市政局議員出任市區區議會嘅議員，鄉事委員會主席出任新界區議會嘅議員。區議會選舉中合資格嘅選民，範圍擴大至包括凡廿一歲或以上同時居港至少滿七年嘅人。候選人必須居港滿十年。選區按人口同地理因素來劃分。選舉以「票數領先者取勝」。1985年區議會選舉以後，所有官員唔再出任區議會議員，各區區議會主席由當區議員互選產生。

1985年9月，立法局56名議員中，十二個係由市政局、區域市政局同區議會全體成員組成嘅選舉團選出，選舉團成員資格係已登記選民，重要響香港居住最少十年。區議會嘅成員組合唔變。民選議員同委任議員嘅整體比例仍然維持二比一。

1989年，市政局議員停止出任區議會嘅當然議員，每個市區區議會各選出一個成員做市政局議員。1993年起，區議會負責監督社區會堂嘅管理工作同推薦有關人士擔任所屬地區多個組織嘅職務。1994年嘅區議會選舉中，除咗27名鄉事委員會主席保留新界區議會當然議席之外，373名議員幾乎全部都係由地方選區以「單議席單票制」同「票數領先者取勝」嘅方式選出。投票年齡由21歲降低至18歲。

到咗2000年，香港政府進行區域組織改革，取消原有嘅市政局及區域市政局。當時政府承諾向區議會增撥資源、增加區議會職責，以鼓勵市民參與地區公共事務。因此，區議會英文名由「District Board」改做「District Council」，以顯示區議會享有「立法議會」（Council）嘅地位。不過，區議會議員普遍認為政府未有實現承諾，畀區議會承繼兩個市政局原有嘅權力。由於冇實質權力，好多人認為區議會已淪為議員發表意見，討論多過成效嘅「口水會」。

2005年10月，行政長官曾蔭權響佢任內首份嘅施政報告宣佈，將會增加區議會嘅權力，畀區議員負責管理區內嘅文娛康樂設施，好似圖書館、社區會堂、泳池等等。呢項改革響2007年喺屯門、灣仔、黃大仙同西貢四區首先試行。2008年起，下放權力嘅計劃會擴展至全港十八區。

2015年，區議會正式全面取消委任議席，令區議會絕大多數議席由民選產生，但27個當然議席（鄉事委員會主席）維持唔變。

2023年，政府大幅度改變區議會組成方法，民選議席大幅削減到得返88席，同時恢復委任制度，設179個委任議席，另外再全新引入176個由地區撲滅罪行委員會、地區防火委員會同分區委員會（合稱「三會」）喺各地方行政區以全票制選出嘅「地區委員會界別議席」。

區域分佈

現時18個區域分別為：

香港島4區：

• 中西區區議會
• 東區區議會
• 南區區議會
• 灣仔區議會

九龍5區：

• 九龍城區議會
• 觀塘區議會
• 深水埗區議會
• 黃大仙區議會
• 油尖旺區議會

新界9區：

• 離島區議會
• 葵青區議會
• 北區區議會
• 西貢區議會
• 沙田區議會
• 大埔區議會
• 荃灣區議會
• 屯門區議會
• 元朗區議會

區域沿革

喺1982年，香港地方政制成立之初，香港政府將全港劃分為十八區議會，分別係香港島四區：中西區、東區、南區同灣仔區；九龍六區：九龍城區、觀塘區、深水埗區、黃大仙區、油尖區同旺角區（其中油尖區及旺角區以登打士街為界，其餘區界同現時油尖旺區區界一樣）；新界八區：離島區、北區、西貢區、沙田區、大埔區、荃灣區（包括現時葵青區範圍）、屯門區、元朗區。

到1985年，成個荃灣區人口已達六十萬，相比當時全港人口唔夠五百萬，實在太過大。政府於是以德士古道及青山公路為界，由荃灣區分拆出葵涌及青衣，成立區議會，令香港分為十九區。但分拆後葵青區人口40幾萬，而新荃灣區人口唔夠20萬，形成「仔大過乸」嘅現象。

由於全港人口響1980年代起向新界新市鎮遷移，九龍區人口大大下降。到1994年，旺角區議會包括委任議員後仍只有十一個議員，政府爲善用資源，將油尖區議會同旺角區議會合併，由油尖旺區議會代替原有兩個區議會，香港回復十八區，形成現時局面。

綜合以上事件，可以反映香港政府響區議會嘅設立同取消方面，較少向市民徵詢。而另一方面，區界劃分亦追唔上時代步伐，好似將鄰近荔枝角嘅荔景山路以南地區分由深水埗區同葵青區，西貢北部響交通道路網絡完成後仍屬大埔區等，都反映香港政府區議會區界劃分追唔上時代。

職能

區議會嘅職能包括：

• 就以下項目向政府提供意見：
  • 影響地區人士福利嘅事宜
  • 區內公共設施及服務嘅提供同使用
  • 政府為各區制定嘅計劃夠唔夠以及施行嘅先後次序
  • 各區就地區公共工程同埋社區活動獲得嘅撥款嘅運用

• 喺就有關目的獲得撥款嘅情況下，承擔：
  • 區內嘅環境改善事務
  • 促進區內文娛康樂活動嘅工作
  • 區內嘅社區活動

地方行政

除咗政府咨詢外，區議會重會主動參與管理地區事務。個個區議會嘅主席同副主席，曾經都係嗰區地區管理委員會嘅成員，但自2020年，民政事務局局長徐英偉破壞傳統，唔再委任現任區議員，反而起用過百位區選落敗嘅建制派議員。地區管理委員會由同區嘅民政事務專員擔任主席，負責協調該區各個政府部門，好似房屋、交通、衞生等工作，並向區議會匯報。

區議會分區委員會

内文：分區委員會

組成

區議員可以分為兩類：

• 民選議員：係透過地區直選而選出嘅議員。根據《區議會條例》，民選議員數目由選舉管理委員會制定，而2012-2015年度區議會民選議員數目以每 17000 人設一議席嘅比率做基礎。
• 當然議員：只係響新界九個區出現，佢哋都係各區區內各個鄉事委員會代表。喺香港總督彭定康推行政改方案時，泛民主派曾經以私人草案方式要求港英政府取消當然議員區議會議席，未獲通過，當然議員得以保留至今。

過去重有三類：

• 官守議員：得1982年嘅第一屆區議會至有，顧名思義就係某啲地區官員會自動成為區議員，佢哋當屆佔人數約莫三分之一。
• 當然議員（市區）：市區嘅當然議員係由市政局嘅議員派落去區議會產生嘅，總人數有30人，當時亦因為市政局議員必然成為區議員，所以區議員去選市政局就一定要辭職，到1988年，呢30席就取消咗，禁令亦都解除。
• 委任議員：喺主權移交前最後一屆區議會、因當時彭定康放棄行使《區議會條例》所賦予委任議員嘅權利，而本應取消。由1997年起嘅臨時區議會時期就重新加入委任議員。根據法例，委任議員人數平均應佔議會人數約五分一，後來到2011年先再開始縮減委任議員人數三分之一，2015年至再全面取消。

1982年以嚟區議會議席變化

議席	1982年	1985年	1988年	1991年	1994年	1999年	2003年	2007年	2011年	2015年	2019年	2023年
官守	165	-	-	-	-	-	-	-	-	-	-	-
當然	57	57	27	27	27	27	27	27	27	27	27	27
委任	135	132	141	140	-	102	102	102	68	-	-	179
地區委員會界別	-	-	-	-	-	-	-	-	-	-	-	176
直選	132	237	264	274	346	390	400	405	412	431	452	88
總數	489	426	432	441	373	519	529	534	507	458	479	470

爭議

冇實權

區議會其實只係政府諮詢架構嘅一部份，嚴格嚟講佢只係有民選成份嘅委員會。地區事務上，政府可以諮詢區議會，亦都可以唔諮詢，而諮詢完之後亦都可以唔聽，公眾有時會認為區議會只係一個「吹水會」，咩都做唔到。所以喺重有市政局嘅時候，區議會嘅地位一般都冇咁被睇重。

而喺主權移交後，政府為咗取消有實權嘅兩個市政局就向市民開期票，話會將市政局部分權力下放到區議會，點知到取消咗之後，政府過橋抽板，以致區議會到今時今日都係冇乜權力。

議會分界同時代脫節

區議會劃界好多都係1982年嗰時劃落，當時劃區嘅考量除咗地區連繫，重有方便管理。但係經過多年之後，當年劃區嘅理據已經冇咗。好似荃灣區，因為當初嘅渡輪服務，所以當時政府將離島嘅青洲仔半島劃咗入荃灣區，後來航線取消，分界就仍然保留住，導致位處欣澳嘅香港迪士尼樂園橫跨荃灣、離島兩個區。

選區分界問題

自1994年開始，區議會嘅民選議席完全行單議席單票制，但制度容易產生傑利蠑螈（Gerrymander）問題。例如西貢區議會入面嘅富藍選區，喺2003年，選區除咗富寧花園同對面嘅裕明苑之外，重加咗東港城入去，但係東港城離兩個屋苑根本有一段距離，兩邊要靠一個變電站掕埋一齊；到2007年，東港城劃咗去隔籬區，加入咗新起好嘅蔚藍灣畔，但係蔚藍灣畔比起原本嘅東港城重遠，政府重夾硬將和明苑個停車場劃入選區，用嚟掕住富寧花園一帶同蔚藍灣畔，而咁啱，當時嘅區議員陳國旗就將地址由富寧花園轉咗去蔚藍灣畔。結果選區個形狀變到一個「J」字形咁，並且維持到今時今日。另外，富藍隔籬嘅南安選區，因為2007年嘅改劃，選區入面嘅東港城幾乎畀厚德同富藍夾住噉。

睇埋

• 香港政治
• 香港區議會委任議席爭議
• 區議會資格審查委員會

出面網頁

• 香港區議會
• 選舉管理委員會