魚菜共生

 

古埃及工匠森內狄恩（Sennedjem）嘅墓室畫

小型便攜式魚菜共生系統

魚菜共生（Aquaponics）係水耕（Hydroponics）嘅一種，或者更確切一啲講，係水耕系統嘅延伸，或者升級版。

魚菜共生同一般嘅水耕相同嘅地方係，魚菜共生同水耕都係一種食物生產系統，係用無土種植農業耕作嘅模式，可以慳番大量嘅土地資源，所以近幾十年喺歐美同埋台灣都好流行。

魚菜共生同一般嘅水耕唔同嘅係，水耕唔止唔係有機農業，而且如果設計或者操作得唔好，啲人造化肥營養液會輾轉流入河裡面，造成水體污染；相反，魚菜共生，唔會用人造化肥營養液，蔬菜所需要嘅營養物質全部嚟自一齊養嘅魚所產生嘅代謝物，只要魚同菜嘅比例適當，整個系統唔需要輸入多餘嘅營養物質就可以正常運轉，自給自足，所以唔會有水污染嘅問題。簡單啲講，魚菜共生所追求嘅係可持續生產嘅生態農業，而水耕只係為咗減少對土地資源嘅依賴。

魚菜共生可以話係水產養殖同水耕嘅結合，係一種複合式耕養。小型嘅魚菜共生設施，啲植物嘅根系係直接浸喺水入面，睇落似乎只係水耕再加一條魚，不過其實唔係咁簡單。

魚菜共生需要結合水生動物所產生嘅排泄物，將水裡面嘅有機質分解過濾，成植物可以吸收嘅硝酸鹽（Nitrate）之後，再供應俾系統上面嘅蔬菜，同時蔬菜嘅根系亦都可以將系統嗰度嘅水淨化，俾水生動物用，，所以魚菜共生係一種結合水產養殖（Aquaculture；喺缸入面養水生動物，例如魚、蝦、蟹等）同埋水耕栽培（Hydroponics；喺水中栽培植物，例如蔬菜、豆、瓜等）嘅互利共生生態系統，將含有豐富營養成份嘅水產養殖水，施肥俾水耕種植嘅植物。

魚菜共生溫室

蔬菜等嘅植物喺水耕系統入面生長，用魚之類嘅水產喺養殖缸入面產生嘅含有豐富營養成份嘅水嚟為植物提供營養。咁樣佢哋就可以過濾走啲對水生動物有毒嘅氨（Ammonia），或者其他嘅動物有機代謝物。啲水經過水耕子系統之後，會俾系統裡面嘅植物清潔，然後人工充氧，令到啲水可以重新用返去水產養殖子系統嗰度，俾啲水生動物繼續用。

喺魚菜共生系統嗰度種嘅植物嘅種類、大細、複雜性同類型，可以好唔同，好視乎個系統嘅設計同埋使用。

系統類型

魚菜共生系統一般分為三大類型：

深水養殖（Deep Water Culture，DWC）

喺 DWC 系統嗰度，啲植物會放喺浮筏（floating rafts）上面嘅網盆（net pots），啲植物會好似「坐」咗喺網底船上面，浮筏用嚟令到啲植物可以浮喺水上面，而網盆就用嚟支撐植物嘅生長同埋維持持續嘅營養流動。個網盆上面通常會有啲固體嘅嘢，例如岩棉（rockwool）、椰衣（coir）或者浮石（pumice），用嚟支撐啲植物嘅根，然後將根持續浸喺水箱入面。

營養膜技術（Nutrient Film Technique，NFT ）

營養膜技術 (NFT) 係將植物根部放喺塑膠種植杯（plastic net cups）入面，放入鑽咗窿嘅粗水管整成嘅狹窄水槽，每條水槽都有淺層嘅營養水流過，而啲植物嘅根系就可以喺嗰啲含有豐富營養嘅淺層水流入面吸取需要嘅養分。

因為 NFT 系統無任何介質，所以基本上係無過濾功能嘅，亦都無其他地方可能俾硝化細菌繁殖，令到水產養殖子系統產生嘅固體廢物無辦法轉化成為水耕子系統需要嘅養分，所以純粹嘅 NFT 技術主要係用係一般嘅水耕系統嗰度。如果就咁將 NFT 用喺魚菜共生嗰度，啲水產養殖子系統產生嘅固體廢物會黐喺植物嘅根系嗰度，可能會令到啲植物因為缺氧而死咗。

如果想將 NFT 技術用喺魚菜共生系統，就需要比較複雜嘅，濾水系統，呢啲額外加裝嘅過濾系統，會有空間俾硝化細菌黐住同埋繁殖，令到水產養殖子系統產生嘅廢物可以轉化處理成為水耕子系統嘅植物需要嘅無機養份。

基於介質嘅種植床

呢種系統會用一個充滿惰性底物（inert substrate）嘅溝槽（trough）嚟支撐植物根部同埋容納有益嘅微生物。惰性底物係指好似沙、石仔、碎石、碎貝殼、碎陶器等嘅又平、又易搵到、又唔會影響水嘅 PH 值等參數嘅墊底材料。而啲水產養殖產生嘅液體肥料水會，定時沖去啲植物嘅根嗰度，將啲營養同氧氣送去啲植物嗰度。

透過用啲石仔或者沙粒之類嘅介質做植物嘅支撐，水入面嘅固體物質會俾啲介質攔住，而呢啲介質有足夠嘅表面積去進行固定膜硝化（fixed-film nitrification）。生物過濾（biofiltration ）同水耕嘅結合，喺好多情況之下，令到呢啲魚菜共生系統唔需要用昂貴嘅獨立生物過濾器。

基於培養基嘅系統被認為喺氮嘅利用方面更有效，原因係同前面提到嘅深水浮筏或者係營養膜技術比較，佢哋為微生物提供咗更多嘅表面積對體積嘅比率（surface-area-to-volume ratio）。

歷史

元朝（13世紀）王禎寫嘅農業手冊《王禎農書》嘅木刻，展示咗喺池塘入面嘅水田（一種浮動筏種植系統）種嘅水稻。

水耕有古老嘅根源，雖然對於佢第一次出現嘅時間有啲爭議。

早期開始（6至13世紀）：阿斯達同中國

魚菜共生喺歷史上可以話係有跡可循，但係我哋最早幾係喺時開始第一次用魚菜共生技術就有一啲爭議，同埋當時用嘅係唔係真係魚菜共生亦值得懷疑。

阿斯達（Aztec）人喺公元1150年就將植物種喺好似木筏咁嘅小型人工種植島上面，嚟啲人工種植島通常係浮喺淡水湖嘅淺水區，呢種用人工浮島嘅種植方法，叫做「奇南帕」（chinampas），係人類早期嘅魚菜共生農業形式。「奇南帕」係墨西哥谷（Valley of Mexico；又叫做墨西哥盆地）西南部地區，即係索奇米爾科（Xochimilco）地區，嘅古代叫法；而呢個技術由當時，一直到依家都好廣泛咁用緊。呢種技術需要喺淡水湖嗰度起好多窄而長嘅人工浮島，每個浮島大約6至10米闊，100至200米長；而淡水湖、運河同周邊城市嘅有機「廢物」，經過分解之後，為「奇南帕」提供咗充足嘅水同埋營養，令到「奇南帕」成為一種密集同埋高生產力嘅耕作形式。

喺亞洲，南中國同埋整個東南亞，稻米喺以水田（paddy fields）嘅形式同魚類嘅養殖相互結合，係魚菜共生應用嘅早期例子。呢啲多元文化養殖系統存在喺好多遠東國家，佢哋係種植水稻嘅同時，亦會養殖唔同嘅水產，例如泥鰍（英文：oriental loach；日文：ドジョウ）、黃鱔（英文：swamp eel；日文：田鰻／タウナギ）、鯉魚（英文：common carp；日文：コイ）、鯽魚（英文：crucian carp；日文：ヨーロッパブナ），甚至係蝸牛（pond snails ）。

元朝（13世紀）嘅王禎所寫嘅二十二卷農業手冊《王禎農書》描述咗浮木筏呢種類似阿斯達人嘅「奇南帕」嘅魚菜共生農業模式，用嚟種稻米、野稻同埋動物飼料。呢類浮動種植筏，喺依家嘅江蘇、浙江同埋福建等省份嘅部分地區仍然用緊。呢啲浮動種植島叫做架田，或者葑田，農業研究亦都發現，用浮筏種植稻米嘅方法，最早喺唐朝（6世紀）同北宋（8世紀）左右就已經有用到。

術語

喺1970至80年代，喺魚菜共生（aquaponics）呢個術語出現之前，曾經用過唔同嘅術語嚟描述呢種技術，例如「喺溫室嗰度結合魚同菜嘅生產」（combined fish and vegetable production in greenhouses）或者「喺循環水流嗰度結合魚類同植物嘅生產」（combined production of fish and plants in recirculating water）等。「魚菜共生」呢個術語喺1997年開始出版嘅《魚菜共生期刊》嗰度用嚟做期刊嘅標題，之後呢個術語就得到咗更廣泛嘅使用，雖然其他術語，例如「綜合魚/蔬菜共養植系統」（integrated fish/vegetable co-culture system）等。

「魚菜共生」嘅英文術語 Aquaponics，係源自「水產養殖」嘅英文術語 aquaculture，意思係養殖水生生物（farming aquatic organisms），同埋「水耕」（hydroponics）意思係無土植物栽培（soilless plant cultivation）。 「 ponics 」呢個後綴詞語，係嚟自希臘文嘅「 ponos 」，意思係「工作」（work），所以「魚菜共生」（aquaponics）可以翻譯成「水上工作」（water work），雖然呢個術語可能唔能夠完全捕捉到魚菜共生系統嘅功能同目的。

唔同專家對「魚菜共生」嘅定義都有啲唔同。有啲人將佢限制喺以水耕為主嘅植物栽培，而有啲人就主張要擴大原本嘅定義。 呢啲分別喺有關生態認證嘅討論嗰度至關重要。 依家因為魚菜共生同水耕有關，所以佢哋唔包括喺歐盟嘅有機農業認證計劃入面。但係，其他有泥嘅有機魚菜共生嘅生產形式，例如綜合水生蔬菜養殖系統（Integrated Aqua-Vegeculture System），可能有機會被認證做有機農產。

一致嘅術語對增進魚菜共生專業人士同新人之間嘅溝通，同埋公共機關、城市規劃師同研究者等嘅利益相關者之間嘅溝通至關重要。清晰嘅定義可以推動魚菜共生作為循環經濟計劃中以自然為基礎嘅解決方案。

魚菜共生系統嘅組成

商業魚菜共生系統。電動泵會將富含有「有機廢物」嘅水由魚缸泵去固體過濾器，去除植物吸收唔到嘅粒子，同埋分解「有機廢物」成為植物需要嘅養份，並且喺流返落去下面嘅魚缸之前就清潔咗。

魚菜共生主要由兩部分組成，水產養殖（aquaculture）部分用嚟養殖水生動物，同埋水耕種植（hydroponics）部分用嚟種植植物。雖然主要由呢兩個部分組成，但係魚菜共生系統通常會根據系統嘅類型分為幾個組件或者子系統。根據水耕系統嘅複雜程度同成本，固體移除（solids removal）、有機質嘅分解、生物過濾（biofiltration）、增加溶氧量嘅氣泵，同埋水耕子系統（hydroponics subsystem）可能被合併成為一個單元或者子系統。

養殖缸

養殖缸（rearing tank）係用嚟養魚嘅水缸。

水耕子系統

水耕子系統係指植物透過吸收水裏面多餘嘅營養嚟生長嘅子系統。

水泵

水泵係用嚟令到啲水流動，等啲水可以唔停（或者間歇性）咁循環。

沉澱盆

沉澱盆（settling basin）或者叫做澄清器（clarifier），係一個可選嘅單元，用嚟捕捉水裏面未食完嘅食物同埋脫落嘅菌膜（biofilms，一種由細菌同藻類等嘅微生物形成嘅生物薄膜），同埋用嚟沉澱水裏面嘅微粒。

生物過濾器

生物過濾器（biofilter ）係硝化細菌（nitrifying bacteria）可以生長、繁殖嘅地方，呢啲硝化細菌會將氨（Ammonia）轉化成為硝酸鹽（Nitrate），轉化成硝酸鹽之後就可以俾植物直接吸收；生物過濾器係選項。

水池

有啲系統會有個水池。水池嗰度會有水泵，用嚟將啲處理過嘅水泵返去養殖缸（rearing tanks）。

魚菜共生系統嘅活組件

想要一個魚菜共生系統可以正常運作，個系統需要依賴唔同嘅生物一齊共同生活。先至魚菜共生系統裏面嘅三個主要生物係：植物、魚類（或者其他水生動物）同埋細菌。有啲系統仲會用包括好似蚯蚓之類嘅額外嘅生物。

魚菜共生系統嘅水，經過咗過濾之後會重新排入鯉魚缸裏面再循環。

魚（或者其他水生動物）

• 魚同其他水生動物係魚菜共生系統嘅主要消費者，同時亦都為植物提供蛋白質同營養嘅來源。

• 魚菜共生系統裏面可以養好多種魚類，包括非洲鯽、金魚同錦鯉。

• 魚類會產生富含營養嘅「廢物」，呢啲「廢物」俾硝化細菌處理之後就係植物嘅養份，幫助植物生長。

魚菜共生中, 養份嘅來源係水生動物（例如魚、蝦、蟹之類）嘅排泄物同埋殘餘嘅飼料等，所以水裏面放養嘅水生動物種類同數量會影響水裡面嘅養份含量。

菜（或者其他植物） 

• 植物係魚菜共生系統嘅主要生產者，將陽光、二氧化碳同營養物質轉化成為生物質（biomass）。
• 魚菜共生可以種植好多種唔同嘅植物，包括菜、香草、水果同草。
• 植物可以幫手淨化系統裏面嘅水，「拎走」水裏面多餘嘅營養同廢物。

由於唔同嘅植物需要唔同嘅礦物質同營養組合，即使係同一種植物嘅唔同生長階段亦都需要唔同嘅礦物質同營養組合，所以魚菜共生需要種植唔同嘅植物，同埋唔同生長階段嘅植物，呢個方法可以令到水裡面嘅毒素（對動物係毒素，但係分解之後嘅「毒素」就係植物嘅養份）可以持續咁俾共生系統清潔，確保水裏面嘅營養含量穩定。

深水種植類魚菜共生系統，植物直接生長喺富含養份嘅水裏面，而唔需要土壤做介質。植物之間嘅間隔可以更近，因為根唔需要向外擴張、打橫生長嚟支撐植物嘅重量。

將植物放入營養膜技術（ NFT ）系統嘅水道裏面，吸收水裡面嘅養份

魚菜共生系統裡面，5日大嘅菠菜苗

細菌（硝化細菌）

• 硝化細菌（亞硝化桿菌、硝化桿菌）喺魚菜共生系統嗰度發揮住至關重要嘅作用，佢哋將魚排出嚟嘅廢物嗰度嘅氨，先轉化成為硝酸鹽（Nitrate），對於維持健康同平衡嘅生態系統係必要嘅。
• 亞硝化桿菌會將氨轉化成為亞硝酸鹽（Nitrite），然後硝化桿菌又會將亞硝酸鹽（Nitrite）轉化成為硝酸鹽（Nitrate），硝酸鹽呢種營養素可以俾植物吸收。
• 硝化細菌將氨轉化成為硝酸鹽（Nitrate），對水生動物嚟講，就係將啲水淨化咗，除去多餘嘅氨同其他廢物之後，魚就可以繼續生活落去。

硝化細菌係喺魚菜共生系統嗰度最重要嘅構件之一，佢哋喺有氧嘅環境之下，將有毒嘅氨，轉化成為硝酸鹽，從而有效咁降低咗對水生動物嘅毒性，同時為植物提供可吸收嘅硝酸鹽化合物。氨係魚類等水生動物新陳代謝嘅產物，通過排泄作用同埋魚腮持續咁排放落水裏面，雖然植物可以喺水裏面吸收一定濃度嘅氨，但係如果氨嘅濃度太高（通常高過0.5ppm）就可以殺死水生動物。

藻類

雖然藻類喺傳統嘅水產養殖嗰度經常被視為係一種麻煩，但係喺某啲魚菜共生設計嗰度，藻類可以係一種有益嘅成分。喺綜合水生蔬菜培養系統（Integrated Aqua-Vegetable Culture Systems，iAVs）之種嘅系統入面，藻類係有意咁喺生物過濾器嘅表層培養。喺呢啲系統入面，藻類會充當營養沉澱物，吸收多餘嘅營養，有助維持最佳水質，同埋減低營養失衡嘅風險。

但係，唔係所有魚菜共生系統都會以呢種方式利用藻類；喺其他類型嘅系統入面，魚缸入面嘅藻類被視為一種需要控制嘅麻煩。

生物過濾

由於大部分水產養殖系統都係閉環系統循環（closed-system recirculation），由啲水生動物（例如魚）食剩嘅飼料，或者佢哋所產生嘅「廢物」會積聚喺水嗰度，形成廢水。呢啲廢水，如果濃度過高，對水生動物係有毒嘅，但係呢啲水經處理之後，含有植物生長必需嘅營養。

喺魚菜共生系統入面，負責將氨（Ammonia）轉化成為植物可以用嘅硝酸鹽嘅硝化細菌（nitrifying bacteria）會喺整個系統嘅所有同水持續接觸嘅固體表面形成生物膜。 蔬菜浸咗喺水嘅根，佢哋嘅表面積加埋一齊好大，可以聚積到好多硝化細菌。表面積嘅大細，同埋水嗰度嘅氨（Ammonia）同亞硝酸鹽（Nitrite）嘅濃度，一齊決定硝化嘅速度。小心照顧呢啲硝化細菌嘅狀態好重要，因為佢哋可以調節氨同亞硝酸鹽嘅完全轉化。呢個就係點解大部分魚菜共生系統都會包括一個生物過濾單元，呢個單元可以促進呢啲微生物嘅生長。

通常喺一個系統穩定咗之後，氨水平會喺0.25至0.50 ppm 之間；亞硝酸鹽（nitrite）水平係0.0至0.25 ppm，而硝酸鹽水平係5至150 ppm 。喺系統啟動咗之後，系統需要幾個星期先可以開始硝化過程。 結果，由於硝基單胞菌同硝基細菌仲未喺系統裏面建立群體，所以氨（高達6.0 ppm ）同亞硝酸鹽（高達15 ppm ）嘅水平可能會出現峰值。 當個系統完成氮循環同埋健康嘅生物過濾機制形成咗之後，呢啲細菌會生長成為成熟嘅菌落（Colony）嗰陣，硝酸鹽水平會喺啟動階段嘅後期達到峰值。喺硝化過程中，氨會被氧化成亞硝酸鹽，亞硝酸鹽會釋放氫離子入水。 隨住時間嘅推移，水嘅 pH 值會慢慢下降；如果想啲水嘅 pH 值唔會太大，可以喺水入面加啲非鈉碱（non-sodium bases），例如氫氧化鈣或者氫氧化鈣，用嚟中和水嘅 pH 值。另外，除咗魚排出嘅廢物之外，仲可以加入選定嘅礦物質或者營養，例如鐵，呢啲係植物嘅主要營養來源。

喺魚菜共生嗰度處理固體積累嘅好方法係用蚯蚓，佢哋會將固體有機物液化，等系統入面嘅植物可以利用佢。

操作

呢個系統嘅五個主要輸入係水、氧氣、光、俾水生動物嘅飼料，同埋用嚟抽水、過濾同幫啲水加氧嘅電力。 可以加入魚卵（Spawn）或者魚苗（fry）嚟取代喺系統嗰度拎出嚟嘅成年魚，以確保系統嘅穩定。喺產出方面，魚菜共生系統可能會持續產生植物（例如水耕種植嘅蔬菜），同埋水產養殖系統養出嚟嘅水產（例如魚）。典型嘅建造比例係系統入面每1加侖（3.8升）嘅養殖水就可以支援 0.5 至 1 平方呎嘅植物生長空間。 視乎氧氣供應同埋過濾系統嘅設計，一般每加侖（3.8升）嘅水，可以支援大約0.5磅（0.23公斤）到1磅（0.45公斤）嘅魚類。

飼料來源

同大部分以基於水產養殖嘅系統一樣，飼料通常係魚粉，呢啲魚粉通常係用啲價值比較低嘅魚整成嘅。野生魚群嘅持續耗盡，令到呢種做法唔可能可以持續落去。有機魚飼料可能被證明係一個可行嘅替代品，可以緩解呢個擔憂。其他替代方法包括喺水耕系統嗰度種浮萍（duckweed） ，呢啲浮萍可以俾系統裏面嘅魚食， 用預先準備好嘅廚房廢物，用嚟整堆肥，當堆肥嗰度生長嘅蚯蚓太多嘅時間，呢啲多餘嘅蚯蚓就可以用嚟餵魚，另外，堆肥嗰度生長嘅黑水虻（black soldier fly）幼蟲，亦都係相當好嘅魚類養殖飼料蟲。

植物嘅營養

健康嘅植物生長係依賴根部嘅環境嗰度嘅有機化合物，呢啲化合物係由微生物分解氨或者其他「廢物」所產生。呢啲包括維他命、荷爾蒙同酵素，呢啲對生長、產量、味道同抗病原體都係必要嘅。有機物質，例如腐殖酸，可以提供微量營養素俾植物。雖然無機營養係至關重要，但係植物需要有機代謝物先可以發育得好。

用水

魚菜共生系統係為咗有效咁循環同埋重用啲水，而唔係喺正常運作下嘅排放或者水交換。呢個系統依賴動植物之間嘅相互作用，維持穩定嘅生態環境，令到系統嗰度啲養份同氧氣水平嘅波動最小。植物會喺循環水嗰度吸收溶解嘅營養，咁樣就可以減少咗啲水當廢水排走嘅需要，同埋將水嘅交換率減到最低。有啲學者嘅報告話，同傳統嘅商業魚類同農作物生產系統相比，魚菜共生嘅用水量減少咗90%。

魚菜共生系統有時都需要加啲新水，但係，一般只係喺取代由於植物吸收同蒸騰（transpiration）、蒸發（evaporation）、清理固體廢物等造成啲水嘅流失，先至需要加入新水。因為咁樣，魚菜共生同傳統種植方法比較，種植相同數量嘅蔬菜，魚菜共生所需要嘅水，大約只係傳統種植方法嘅2%。 呢個效率令到魚菜共生可以喺水源有限或者土地唔肥沃嘅地區種植農作物同埋養殖魚類。

魚菜共生系統亦可以模仿濕地嘅環境，令佢哋對生物過濾（biofiltration ）同處理（treating）家庭污水（sewage）更多有用。 含有豐富養份嘅溢出水，可以收集喺集水缸，然後重用嚟促進植喺泥土嘅植物生長，或者抽返入魚菜共生系統嚟維持水位。

喺傳統嘅水產養殖嗰度，定期嘅水交換係必要嘅，唔似魚菜共生養殖咁。生產1公斤牛肉通常要用5,000至20,000升嘅水。半密集同廣泛嘅傳統水產養殖，同樣重量嘅魚類需要2,500至375,000升嘅水。相反，魚菜共生嘅循環水產養殖系統（recirculating aquaculture systems，RAS ）係高效嘅，可以回收95 % 至99 % 嘅水，每公斤魚用水量唔夠100升。

用能源

呢個魚菜共生系統，用向下移動嘅水同埋溫室嘅光線嚟減少能源消耗。

魚菜共生系統嘅電器裝置，例如水循環用嘅水泵、增加氧含量嘅氣泵等，需要依靠電力嚟運作。為咗環境保護，設計系統時需要考慮減少能源嘅消耗同埋提高能源效率，透過利用重力嚟令到啲水流動，可以將泵嘅數量減到最低，所以亦令到個系統更加慳電。用替代能源亦都係一個好選擇，例如裝太陽能發點板、風力發電系統等。雖然魚菜共生系統設計嘅時候可能考慮得好周詳，安裝嘅時候亦都手工好好，設計嘅時候已經最大限度咁降低風險，不過魚菜共生系統仍然有可能有啲「單點故障」（single point of failure）嘅地方，例如，遇到停電、電氣故障（好似水泵壞咗之類）、道堵塞等，可能會令到啲水生生物死咗。

Fish stocking

為咗令個魚菜共生系統可以維到皮，同埋賺到錢，個制度嘅水耕種植組件同埋水產養殖組件都需要經常維持喺幾乎最大生產能力嘅狀態。想要維持系統入面嘅水產嘅數量喺最大值（同時又唔會限制咗啲水產嘅生長），有三種主要嘅方法可以用：

• 順序養殖（Sequential rearing）：幾個唔同年齡組別嘅魚共用一個養殖缸，當一個年齡組別長大到可以攞去賣嘅時候，相同數量嘅魚仔就會加返落去個水產養殖子系統嗰度。 呢個方法嘅缺點包括喺每次收成期間都會影響成個魚池，漏咗魚會導致食物/空間嘅浪費，同埋好難喺頻繁嘅收成之下保持準確嘅養殖記錄。

• 分割養殖（Stock splitting）：大量嘅魚仔一次過放養，然後喺佢哋大到個水箱嘅最大容量之後，將佢哋分成兩組，咁樣會更容易記錄，亦唔會令有啲魚被「遺忘咗」。呢個操作嘅一個無壓力嘅方法係用「游水道」（swimways），「游水道」連接唔同嘅飼養缸同一系列嘅水閘、泵，用嚟搬啲魚。
• 多養殖單元（Multiple rearing units）：呢類系統通常有2-4個水箱，共用一個過濾系統，當最大嘅水箱裏面啲魚攞去賣嘅時候，其他魚群會向上移動到一個較大嘅水箱，而新一批嘅魚苗就會喺最細嘅水箱開始養。 另一個通常嘅做法係，有幾個一樣大嘅養殖缸，啲魚唔會喺缸之間搬來搬去，咁樣就消除咗搬魚嘅勞力，令到賣魚嘅時候唔會干擾其他缸，不過呢個方法，喺啲魚仲係幼魚嘅時候，空間嘅利用率唔高。

理想情況下，為咗減少啲魚住得迫嘅壓力，有效咁養魚，同埋令到啲魚可以健康生長，養殖缸入面魚嘅重量唔會超過0.5磅/加侖。

疾病同害蟲管理

魚菜共生係整合咗植物同動物科學嘅食物生產方法。佢強調植物害蟲管理嘅重要性，建議用綜合害蟲管理（integrated pest management，IPM）嚟控制害蟲。鑑於魚菜共生係一種環保同埋可持續嘅食物生產方法，所以用化學除蟲只可以係解決害蟲問題嘅最後手段。

喺魚菜共生嗰度嘅化學管理技術，主要係原自水耕嗰度用嘅技術。關鍵嘅分別係魚菜共生加入咗魚類或者其他水生生物，呢啲水生生物被視為「非目標生物」，有可能用嚟處理植物嘅化學物質（例如殺蟲水）可能會無意中影響到呢啲水生生物。另外，魚菜共生涉及生物過濾器入面嘅微生物成份，呢個係一個天然嘅淨水系統。喺魚菜共生系統嗰度用化學物質，對魚類同生物過濾器入面嘅有益細菌都有害。魚菜共生嘅昆蟲控制通常會用生物同生物降解嘅殺蟲劑。

魚菜共生嘅商業化嘅瓶頸係害蟲同疾病管理。 化學控制方法對呢啲系統嚟講都係比較複雜嘅。 雖然殺蟲劑同除草劑可以用市場上已經好成熟嘅商業生物防治措施取代，但係殺菌劑同殺線蟲仍然喺魚菜共生嗰度用。 監測同生物控制係遏制害蟲群體嘅首選方法。 一般嚟講，生物控制係用得最多嘅方法。 喺所有系統設計，非化學預防措施對害蟲同疾病嘅預防都好有效。

同傳統水耕系統生長嘅植物比較，喺魚菜共生系統生長嘅植物可能對疾病有更高嘅抵抗力。 魚菜共生嘅環境支援唔同嘅微生物，有啲可能對保護植物嘅根免受病原體嘅傷害有幫助。

自動化、監控同控制

好多人都試過整自動控制同監控系統，而呢啲系統當中有啲係成功嘅。例如，研究人員能夠喺小型魚菜共生系統嗰度引入自動化，以實現一個具有成本效益同可持續嘅農業系統。 自動化技術嘅商業發展亦都出現咗。 例如，一間公司開發咗一個能夠自動化咗嗰啲重複任嘅工作，並且配備咗機器學習嘅算法，可以自動檢測同消除有病或者發育得慢嘅植物。 一個面積3.75英畝嘅魚菜共生設施，聲稱係美國第一個室內三文魚農場，呢個設施亦都有啲自動化嘅技術。魚菜共生嘅自動化設備喺收集同記錄有關魚菜共生嘅資料方面取得咗顯著嘅進步。

經濟可行性

魚菜共生系統嘅經濟可行性唔太確定。一項對魚菜共生投資者做嘅國際調查發現，只有唔夠三分一嘅生產商可以賺到錢；需要做更多嘅研究，嚟睇吓魚菜共生係咪一種有利可圖嘅食物生產方法。

魚菜共生提供多元化而穩定嘅農業系統，令農民可以同時種菜同養魚。因為有兩種利潤嘅來源，原理上農民可以有更穩定嘅收入，原因係即使魚類或蔬菜其中一個市場經歷市場週期嘅低潮，農民都仍然可以繼續喺另一個市場賺到錢。 T魚菜共生系統嘅靈活性令佢可以種好多種唔同嘅農作物，包括普通嘅蔬菜、草藥、花卉同埋水生植物，以滿足消費市場嘅廣泛需求。 魚菜共生系統嘅一啲有機會賺到錢嘅植物包括大白菜（Chinese cabbage，英國叫 Chinese leaf）、生菜（lettuce）、九層塔（basil）、玫瑰（roses）、蕃茄（tomatoes）、秋葵（okra）、皺皮瓜（cantaloupe）同甜椒（bell peppers）等。

對於有環保意識嘅消費者嚟講，魚菜共生農產品有一定嘅吸引力，因為佢哋係有機嘅同埋冇農藥，而且呢啲系統嘅生態足跡（environmental footprint）相對比較細。 魚菜共生系統嘅經濟效率亦都相當高，因為佢哋用好少水，營養循環亦都好有效，加上對土地嘅需求相對少。 呢啲系統可以喺土質差或者有水污染問題嘅地區用，因為佢哋只需要好少量嘅乾淨水。 另外，魚菜共生系統通常無雜草、無害蟲同埋無土壤相關嘅傳染病，令到啲植物可以連續同快速咁生產高質素嘅農作物。

關於魚菜共生嘅研究主要集中喺技術方面，只有少數嘅研究係討論呢啲系統嘅經濟可行性嘅，尤其係商業嘅可行性。 雖然魚菜共生一般被認為係有利可圖同可持續嘅，但係由於唔同場地嘅條件、氣候變化同市場價格嘅波動，成本嘅計算同系統嘅比較變得相當複雜。 能源開支係一個重要因素，而且唔同國家嘅能源價格相差好遠，令到盈利能力嘅評估變得更複雜。有啲研究人員提出，魚菜共生系統可以喺兩年內達到財務平衡，而其他研究人員就認為應該以每平方米為基礎去衡量盈利能力。

同傳統水耕系統相比，現有關於魚菜共生系統同埋呢啲系統嘅經濟可持續性嘅研究仍然相當少。 根據依家見到嘅研究報告，魚菜共生企業嘅經濟可行性，必須個別評估。 原因係有好多變數 —— 包括系統設計、季節性氣候條件同埋當地能源或土地成本 —— 喺決定魚菜共生企業嘅盈利能力方面，起咗關鍵性嘅作用。

另外嘅一啲研究顯示，魚菜共生系統可以比傳統嘅水耕系統用少14%嘅肥料。雖然魚菜共生系統係用少咗肥料，不過業者應該睇吓，維持水產養殖嘅淨成本（成本減去收益），係咪平過慳咗嘅肥料錢。

其他非系統障礙，可能會影響魚菜共生系統嘅經濟成功，包括呢啲系統需要好多範疇嘅高度學科知識、缺乏融資嘅機會，同埋一般市民唔明白咩嘢係魚菜共生。同水耕相比，魚菜共生業務可能需要額外嘅品牌策略，而水耕依家喺美國已經係相對出名嘅技術。

魚菜共生發展嘅其中一個限制係缺乏商業上嘅財務可行性研究，原因係啲私人公司唔會同公眾分享佢哋呢方面嘅研究結果。

依家嘅例子

北美

• 北達科他州（ North Dakota）波田勞（Bottineau）嘅達科他學院波田勞分校（Dakota College at Bottineau）有個水耕計劃，俾啲學生可以攞到魚菜共生科學證書或者副學士學位。
• 丹佛嘅史密斯路Palmer大廈，有個佔地7,000平方呎嘅設施用嚟做魚菜共生計劃，嗰度生產嘅農作物足夠俾丹佛監獄嘅800至1,000名囚犯，同埋鄰近嘅市中心監獄設施嘅1,500名囚犯同埋700名獄卒食用。
• 尼加拉瓜「 Amigos for Christ 」行動嘅義工管理嘅魚菜共生養植園，生產嘅農產品供應俾900幾個窮學生食。
• 魚菜共生已經轉向社區整合，例如非牟利基金會 Growing Power ，佢哋為威斯康星州密爾華基市（Milwaukee）嘅青年提供工作機會同培訓，同時為佢哋嘅社區提供食物。呢個方式喺其他城市產生咗幾個衛星項目，例如喺紐奧良（New Orleans），喺越南社區教啲受漏油事件嘅越南漁民一啲魚菜共生技術。
• 美國紐約嘅南布朗士市（South Bronx）喺2023年尾，開始咗四個新綠色教室嘅計劃，叫做魚菜共生實驗室，第一個實驗室喺10月30號，喺第149東街嘅PS25 雙語學校（P.S. 025 Bilingual School）舉行咗剪彩儀式，開始營運。
• Whispering Roots 係一個喺內布拉斯加州（Nebraska）嘅奧馬哈市（Omaha）嘅非牟利組織，佢哋透過魚菜共生、水耕同城市農業，為社會同經濟弱勢社區提供新鮮、本地種植嘅健康食物。
• 最近，魚菜共生向室內生產系統方向發展。喺芝加哥呢啲城市，企業家一直都有用垂直設計嘅魚菜共生系統嚟生產食物。呢啲系統可以用嚟全年種植食物，而且好少浪費，甚至幾乎完全無浪費。

英國

• 根據BBC喺2014年嘅報導，喺威爾斯嘅萬茂郡（Monmouthshire）Penallt 村，有英國嘅第一個太陽能魚菜共生溫室嘅試驗場，佢哋同一間兒童孤兒院合作，教啲小朋友魚菜共生係點樣運作，希望將呢項技術傳播俾其他人。
• 英國嘅學院同大學亦有提供魚菜共生課程同埋研究，例如威爾斯嘅黑山學院（Black Mountains College）有提供短期嘅魚菜共生課程；錫菲大學（英語：The University of Sheffield）研究基於魚菜共生系統嘅迷你農場（mini-farm），叫做「韌性校園，韌性城市」（Resilient Campus, Resilient City，RC2） 計劃，喺舊貨櫃入面起校園農場，希望將來可以擴展到全個城市；格林威治大學（University of Greenwich）係第一間研究喺建築物嘅屋頂做魚菜共生實驗室嘅英國大學，將城市農業融入建築物同屋頂嗰度，佢哋依家有14個屋頂花園；而斯特靈大學（University of Stirling）有提供可持續水產養殖碩士課程（MSc Sustainable Aquaculture）教唔同嘅水產養殖技術，包括魚菜共生。
• 喺森麻實嘅 Bioaqua Farm，喺2012年起，就一直設計同安裝魚菜共生系統，包括佢哋係森麻實嘅一個一英畝嘅魚菜共生農場，係「英國最好嘅魚菜共生系統」之一。佢哋亦都有提供魚菜共生嘅科學課程，同埋顧問服務，從2014年起，已經教咗嚟自超過32個國家嘅幾百個學生。
• 喺南德雲郡（South Devon）京士頓橋鎮（Kingsbridge）嘅水耕農場 SCOFF，喺2020年已經開始設計同埋起魚菜共生農場，嚟種植蔬菜同埋養魚，佢哋亦都喺南德雲郡普利茅夫（Plymouth）有餐廳，供應新鮮嘅魚類同沙律。
• 蘭開夏郡（Lancashire）嘅 Altham 村，塑料隧道棚（Polytunnel）供應商，最近亦都進入魚菜共生設備市場，佢哋將隧道棚設計到可以用喺魚菜共生嗰度。