2020年夏季奧林匹克運動會

2020年夏季奧林匹克運動會（日文：第32回オリンピック競技大会，英文：the Games of the XXXII Olympiad，法文：les Jeux de la XXXIIe Olympiade），又叫第32屆現代奧林匹克運動會，喺日本東京舉行。係東京自1964年以嚟，相隔57年之後第二次舉辦奧運。

呢屆賽事原訂喺2020年7月24號至8月9號舉行，但係由於受到武肺全球大爆發影響，國際奧委會同日本政府決定延期舉行，喺2020年3月24號宣佈呢一屆奧運押後一年，喺2021年7月23號至8月8號舉行^[1]，但係個名仍然保留叫做「東京2020」^[2]。呢屆係史上第一次需要延期舉行嘅奧運會，亦係史上第一次喺單數年舉行嘅奧運會。

呢屆奧運會有206個代表團參加（包括205個國家、地區代表團同埋難民代表團），唯獨係北韓代表團冇派隊參加。

男子足球項目球員參賽年齡限制由23歲以下改為24歲以下，而三人籃球亦由呢屆開始加入奧運項目。

申辦過程

2011年7月16號時任東京都知事石原慎太郎（中文：石原慎太郎）喺日本奧委會創立一百週年紀念會裏面宣佈申辦2020年奧運，改名做「復興奧運」；喺2011年12月13號嘅內閣會議裏面通過^[3]。
2013年9月7號：國際奧委會喺當地時間下晝5點20分（UTC-3）喺阿根廷布宜諾斯艾利斯舉行嘅第125屆國際奧委會全體會議（英文：125th_IOC_Session）上決定由日本東京主辦。

運動員感染武漢肺炎事件

2021年6月19號，烏干達奧運代表團去到日本之後，其中一位成員被驗出對武漢病毒呈陽性，係東京奧運會代表團第一宗個案。^[4]

賽事焦點

香港代表團攞到歷嚟最好嘅成績：1金2銀3銅，喺206個代表團入面，獎牌榜排名第49位，當中張家朗喺男子花劍個人賽打贏衛冕冠軍（意大利嘅丹尼爾加路素），成為咗九七回歸之後頭一位香港奧運冠軍。
中華台北代表團攞到歷嚟最多獎牌落袋嘅成績：2金4銀6銅，只係喺獎牌榜名次部分，因各國競爭激烈而未能改寫記錄（仍然以2004雅典奧運嘅第31名係最佳，但係獎牌榜名列第34名，係史上第二佳嘅記錄）。
巴西足球代表隊派出咗李察利臣等人嘅奧運代表隊，成功延續咗五年前（2016年）由尼馬等人創造嘅佳績，順利冧莊奧運會男子足球金牌。
由呢屆開始，滑板運動、滑浪同埋運動爬石正式加入夏季奧運會運動項目大家庭，另外，日本作為呢屆奧運會主辦國，空手道、棒球、壘球就係呢屆夏季奧運會嘅期間限定運動項目。
响206個參賽國同埋地區入便，一共有93個國家同地區登上獎牌榜，係歷嚟最多。