3D 模型

3D 模型（粵拼：saam1 di1 mou4 jing4），又有叫三維模型或者叫立體模型，係指一個（對於部電腦嚟講）用數字呈現嘅三維物體。立體模型有長度、闊度同高度，就好似喺現實世界見到嘅實物一樣，因此可以用嚟建構虛擬世界。

呢個立體模型模擬一架穿梭機嘅外型。

猶他茶壺呢個立體模型好出名，成日畀人攞嚟做三維電腦圖像嘅例子。

3D 建模（英文：3D modeling）就係指用專門軟件整立體模型。廿一世紀初有好多立體圖像軟件，例如 Blender 就好多人用。建模涉及製作者喺模擬嘅立體空間入便操作角、邊同埋立面，例如係以一啲簡單嘅幾何物體（例如圓柱或者球體呀噉）做起始，然後再改變唔同邊嘅長度或者唔同角嘅位置，最後整出想要嘅形狀。除此之外，製作者亦可以用程序生成或者立體掃描嚟創建想要嘅形狀。然後製作者仲可以運用材質貼圖，決定模型表面望落係乜嘢質哋。

整好之後，呢啲模型跟住就可以直接攞去 Unity 等嘅遊戲引擎度用，製作視像遊戲同埋虛擬實境等需要建構虛擬世界嘅產品。

基礎

睇埋：電腦圖像

3D 模型可以搵自動或者手動嘅方法整。

有啲研究者會用一啲架生掃描一件真實嘅物件，再將數據傳返去電腦度，等部機計出個 3D 模型嘅樣，例如個掃描器嘅感應器可以射啲波出嚟，喺每一點嗰度量度吓「啲波射出去嘅時間」同「返到個感應器度嘅時間」之間差幾遠，噉就可以知道喺每個點度件物件嘅表面離個感應器幾遠，跟手將呢個數據傳過去部電腦，就係有關件物件嘅形狀嘅數據；另一方面，研究者又有得手動噉整啲 3D 模型出嚟。

概念

3D 模型相關嘅重要概念：

• 多邊形網格：一幅多邊形網格（好似下圖噉）會包含－
  1. 若干隻角（vertex），角係空間入面一點；
  2. 當中某啲角之間會有邊（edge）；
  3. 如果有拃邊形成咗一塊完整嘅 2D 表面，塊表面就可以做一塊立面（face），面係件 3D 物體睇得到嗰浸表面。

• 線框模型：基本上等同多邊形網格，只係冇咗啲立面，淨係展示個模型啲角同邊（好似下圖噉）；喺好多情況下，線框模型都（同多邊形網格比起嚟）會方便用家睇清楚個模型嘅形狀。廿一世紀初嘅 CG 軟件都會畀用家揀用邊種方式（多邊形網格定線框模型）嚟睇個 3D 模型。

• 多邊形：用嚟衡量啲 3D 模型有幾複雜嘅指標，如果話一個 3D 模型多邊形多，即係話個模型有好多塊表面，正路就表示個模型望落多細節。
• 細節層次（LOD）：指一個 3D 模型嘅表示有幾複雜；例如想像家陣有個 3D 模型，設計者將個程式設計成「如果用家近睇個模型，就將個模型啲多邊形完全顯示嗮出嚟（LOD 高）；而如果用家遠睇個模型，就將個模型簡化（少噉咗多邊形）噉顯示（LOD 低）」噉嘅樣，噉就可以避免部機要做啲不必要咁仔細嘅運算，慳返運算上用嘅時間。可以睇埋軟件最佳化嘅概念。

細節層次嘅展現

圖例
角嘅數量	~5500	~2880	~1580	~670	140
Notes	最高細節層次				最低細節層次

• 材質貼圖
• 3D 掃瞄
• 立體投影

睇埋

呢個立體模型模擬一隻蝴蝶嘅外形，而且仲加咗拍翼嘅動畫。

• 雕塑藝術
• 模型塑法
• 切開圖解
• 精靈圖

外拎

• 粵語 Blender 教學，YouTube 上面嘅一系列短片，展示點樣用 Blender 製作 3D 模型。