掗克妮

Arachne（粵拼：aa6 raak1 ni4）係希臘神話入面一個出名嘅人類角色。早喺公元前 1 世紀嘅文獻，經已有提到佢嘅故事。

呢幅圖畫描繪想像中「掗克妮處於半人半蜘蛛噉嘅狀態」嘅情境。

Arachne 個名嚟自古希臘文：Ἀράχνη（羅馬字：Arákhnē）－即係蜘蛛噉解。要用漢字寫嘅話，可以叫佢做掗克妮aa6 raak1 ni4。

神話故仔

睇埋：希臘神話同雅典娜

掗克妮個故仔最常見嘅版本如下。

掗克妮係個牧羊人嘅女。佢由好細個嗰陣就喺度學梭織，到佢大個就成為咗個出名擅長做梭織嘅織女。佢對自己嘅技術好有信心。有日，佢仲自大到諗住自己喺梭織技術上能夠打贏雅典娜（Athena；掌管打仗同手工藝嘅女神），於是佢就走咗去挑戰雅典娜，話要同雅典娜鬥梭織。

雅典娜接受掗克妮嘅挑戰：於是兩方就各自郁手織；等到兩個都停手嗰陣，雅典娜織好咗塊緙織壁毯，啲圖案描繪眾神嘅英姿，而掗克妮都係織好咗塊緙織壁毯，不過啲圖案係描繪眾神啲風流事蹟；雅典娜一見到掗克妮件作品就大發雷霆－對於「雅典娜點解發嬲」呢點，唔同傳說有唔同講法，有版本話雅典娜覺得掗克妮件作品嘅題材侮辱緊眾神，亦有版本話雅典娜覺得自己真係輸咗所以惱羞成怒；無論發嬲嘅原因係乜，震怒嘅雅典娜跟住就郁手，將掗克妮件作品撕成碎片。

掗克妮好驚，諗住自己得罪咗天神下場實會好慘，嚇到走去吊頸自殺。不過雅典娜冷靜咗吓，又覺得掗克妮罪不至死，於是就施法將掗克妮用嚟吊頸嗰條繩變成蜘蛛網，而掗克妮就幻化變咗做隻蜘蛛－掗克妮有得保住條命，但要一世係噉喺度織蜘蛛網。

有學者指，掗克妮係希臘神話入面典型「有人類自高自大（hubris），諗住自己同天神對等甚至超越天神，結果落得悲慘下場」嘅故仔。

18 世紀初一幅油畫；幅畫描繪想像中「米娜娃（Minerva；雅典娜嘅羅馬版）郁手毆au3掗克妮」嘅情境。

影響

古希臘嘅文化對歐洲以至成個西方世界影響深遠。

廿世紀起嘅人正路唔會信呢個故仔係真，但佢哋嘅文化都受過掗克妮嘅故仔影響：

• 現代嘅英文等語文受過希臘文影響－例如廿世紀英文入面掕住 arachn- 嘅字詞，多數都係同蜘蛛有啦掕嘅，又例如蜘蛛嘅西班牙文名係 araña。
• 有唔少廿世紀起嘅虛構故仔都有用到掗克妮嘅故仔做題材，例子可以睇 2000 年代嘅奇幻小說系列《Percy Jackson & the Olympians》。

睇埋

• Hubris，希臘神話入面成日出現嘅主題。
• 蜘蛛

文獻

• Harries, Byron (1990). "The spinner and the poet: Arachne in Ovid's Metamorphoses". Proceedings of the Cambridge Philological Society. 36 (216): 64-82.
• Höfler, Stefan; Nielsen, Johan Ulrik (2022). "A Proto-Indo-European word for 'spider'? : un-weaving the prehistory of the Greek ἀράχνη and the Latin arāneus". Graeco-Latina Brunensia (1): 69-89.

拎

• Arachne. Encyclopedia Britannica.
• Spider People. TV Tropes.