Portal:南韓/開頭

南韓國旗	南韓國徽

南韓，正式叫做大韓民國 (韓文：대한민국)，係一個位於東亞嘅國家。佢喺朝鮮半島嘅南半橛，其中東、南、西三面向海，而北面就隔住條三八線同北韓對望。南韓人口總共有5,200萬人，其中有一半住喺首爾嘅都會區，係世界上第9大嘅都會區。國家嘅其他主要城市包括釜山、大邱、同埋仁川。

朝鮮半島最先喺舊石器時代早期有人類嘅記載。到公元前7世紀，朝鮮開始喺中國周朝嘅歷史有記載。到7世紀，朝鮮嘅三個王朝，高句麗、新羅、同百濟合併，成立統一新羅。朝鮮之後分別由高麗同大朝鮮國統治，直到高宗喺1897年成立大韓帝國。不過，呢個帝國到1910年就已經畀大日本帝國吞併，開始長35年嘅朝鮮日治時期。到1945年日本投降，朝鮮半島由蘇聯同美國分治，其中美國管嘅南面成為南韓，而蘇聯管嘅北面就係今日嘅北韓。

到1950年，北韓靠住蘇聯支撐入侵南韓，韓戰開打。到1953年，經過聯合國同中華人民共和國參戰之後，兩邊都打唔郁對方，所以簽咗《朝鮮停戰協定》作為停火，一路到依家都仲未有正式嘅和約。戰後，李承晚成為南韓第一任總統。到1960年，佢嘅貪污令大眾反感，發動革命推翻政府。不過到1961年，軍人朴正熙發動政變，再成立新嘅政府。喺之後嘅十幾年，南韓好快咁工業化，令經濟起飛，係當時世界上其中人均本地生產總值發展得最快嘅地方，仲成為亞洲四小龍之一。呢段發展嘅時間，俗稱「漢江奇蹟」。不過與此同時，朴正熙嘅政權喺1972年通過新嘅憲法，容許政府違反基本人權，特別針對異見人士，而佢最終喺1979年亦因為刺殺而死。之後1980年，南韓又再一次發生政變，今次由全斗煥發動，繼續咗政府嘅集權傾向，包括打壓光州運動。到1987年，南韓民運成功，開始第一次嘅民主選舉。到依家，南韓一般都被認為係世界上最發達同民主嘅國家之一。