Portal:香港鐵路運輸/精選文/23

尖東站（粵拼：zim1 dung1 zaam6；英文：East Tsim Sha Tsui Station）係個港鐵西鐵綫嘅中途站，以前東鐵綫嘅南行總站，響香港九龍油尖旺區尖沙咀中間道兒童遊樂場地底，近住尖沙咀東部。

尖東站係當時東鐵綫第一個地底站，有全世界最長嘅月台幕門，亦係東鐵綫唯一有冷氣同月台幕門嘅站。尖東站有行人隧道系統連接周圍同荃灣綫尖沙咀站。喺尖東站轉做西鐵綫嗰時，因為西鐵綫列車比東鐵綫短，尖東站月台頭尾非站體架構嘅部份被玻璃門封閉停用，並且喺裡面加裝信號同埋月台閉路電視。由於以前尖東站按照東鐵綫排列上下行方向，同而家西鐵綫啱啱相反，所以月台編號喺西鐵綫伸延之後調轉。

呢個站最初由九廣鐵路公司（九鐵公司）管理。至2007年 12月2號即係兩鐵合併後，尖東站嘅車站結構，由九鐵公司租畀港鐵公司營運用，同埋合併成為一個車站管理。2009年 8月16號，港鐵公司伸延西鐵綫，由南昌起至紅磡，而尖東站亦會變成西鐵綫其中一個站。因此，東鐵綫乘客需要喺紅磡站轉西鐵綫至去到尖東站。1號月台會改為去屯門站，2號月台就改為去紅磡站。