斯薛佛斯

(由Sisyphus跳轉過嚟)

斯薛佛斯si1 sit3 fat6 si1Sisyphus古希臘文Σίσυφος羅馬拼音:Sísyphos)係希臘神話入面一個好出名嘅角色,出名在相傳佢受到天神嘅懲罰,焗住要永無休止噉運一嚿大石上山[1][2]

16 世紀中一幅油畫;幅畫描繪畫家想像中「斯薛佛斯受罰」嘅情境。
19 世紀一幅圖畫,描繪「斯薛佛斯成功ung2咗嚿大石上山頂」嘅情境。

後世嘅人有對斯薛佛斯嘅故仔作出詮釋,有啲仲將斯薛佛斯當咗做「冇意義嘅勞動」嘅象徵。

神話故仔 編輯

話說斯薛佛斯個故仔係噉嘅[1]

斯薛佛斯本來係個國王,佢出嗮名份人詭計多端。有一日,斯薛佛斯係時候要死。死亡(死亡呢個概念嘅人格化)嚟咗佢度,想帶佢走。斯薛佛斯當然係唔想死,就出詭計將死亡鎖住唔畀死亡郁。

過咗冇耐,戰爭之神阿雷斯[歐 1]嚟咗,想幫死亡手,要扚斯薛佛斯上路。呢個時候,斯薛佛斯又諗到條計仔:佢嗌佢老婆美露[歐 2]過嚟,叫美露喺佢死咗之後唔好安葬佢,由得佢條屍就噉擺喺度[註 1];斯薛佛斯跟住死亡落到冥界之後,就同冥界女王普西芬妮[歐 3]講,話佢發現美露冇好好哋跟規矩安葬佢,叫普西芬妮快啲畀佢返上人間,等佢可以去話吓美露。普西芬妮聽咗斯薛佛斯講,就畀佢返上去人間,而斯薛佛斯一返到人間,就自然唔會乖乖哋落返去冥界。斯薛佛斯打後仲喺人間生存到好老先至死[3]

斯薛佛斯死後落到冥界,面對掌管死亡嘅天神-冥界之王哈帝斯[歐 4]。哈帝斯知道斯薛佛斯出埋嗮啲古惑招避開死亡,因而勃然大怒,決定要重罰斯薛佛斯。哈帝斯嘅決定係要斯薛佛斯喺冥界做苦工:斯薛佛斯要ung2住一嚿大石頭,將嚿大石頭㧬上山坡[註 2];同時嚿大石同個山坡施咗法,每次斯薛佛斯成功將嚿大石㧬上山坡最高點嗰陣,嚿大石會即刻轆返落去山坡底。

於是斯薛佛斯就焗住要永恆噉做

  • 㧬嚿大石上山坡、
  • 嚿大石轆返落去山坡底,
  • 㧬嚿大石上山坡、
  • 嚿大石轆返落去山坡底,
  • 㧬嚿大石上山坡、
  • 嚿大石轆返落去山坡底...

-呢一樣毫無意義嘅工作。

後世影響 編輯

斯薛佛斯嘅故仔廣為流傳,係希臘神話當中最出名嘅故仔之一,成日畀後世嘅人攞嚟做「係噉做啲毫無意義嘅嘢」嘅象徵。

伊利亞德[歐 5]同《奧德修記[歐 6]等嘅著名史詩都有提到斯薛佛斯。

斯薛佛斯嘅形象,就算係廿一世紀初嘅文化產物都有提起。例如 2020 年出嘅 Roguelike視像遊戲哈帝斯》就有提起斯薛佛斯呢個角色[4]

睇埋 編輯

註釋 編輯

  1. 個傳說嘅某啲版本仲話,美露將斯薛佛斯嗰條一絲不掛嘅死屍掉咗喺廣場度。
  2. 亦有版本話,斯薛佛斯係要捧嚿石上山坡,而唔係㧬嚿石上去。

歐詞 編輯

  1. Ares
  2. Merope
  3. Persephone
  4. Hades
  5. Ιλιάς / Iliás
  6. ΟΔΥΣΣΕΙΑ / Odýsseia

編輯

  1. 1.0 1.1 Sisyphus. Encyclopedia Britannica.
  2. Evslin, Bernard (2006). Gods, Demigods and Demons: A Handbook of Greek Mythology. Bloomsbury Academic.
  3. Sisyphus.
  4. Hades: All Voice Actors From The Game & Who They Play. The Gamer.
  5. De Streel, A. (2022). Sisyphus, the Commission, and the digital markets act (PDF).