Wikipedia:是日正文/2022年1月
世界語（Esperanto，又叫做「希望語」，因為Esperanto喺呢隻語言嘅意思係「希望」），舊譯萬國新語、愛斯不難讀，係最為廣泛使用嘅人工語言。波蘭眼科醫生柴門賀夫喺對佢進行咗十年嘅創作工作後喺1887年創立咗呢個語言嘅基礎。
世界語嘅命名來自Doktoro Esperanto（希望博士），呢個係柴門賀夫第一次出版《第一本書》時所用嘅筆名。最早，柴門賀夫幫呢個語言改嘅名只係「La Lingvo Internacia」，意思係「國際語言」。20世紀早期，當世界語啱啱傳入中國嗰陣，有人將佢音譯為「愛斯不難讀」，都有叫「萬國新語」嘅。後嚟重有人借用日本人嘅意譯名「世界語」，一直用到家陣。
世界語嘅定位係國際輔助語言，唔係用嚟代替世界上已經存在嘅語言。柴門霍夫嘅目標係創立一種簡單易學而靈活嘅語言，一種普世嘅第二語言，用嚟促進世界和平同國際了解，消除仇恨同埋戰爭，實現平等、博愛嘅人類大家庭。而家一啲世界語者仍然抱住噉樣嘅期望，但嘅人只係想用佢嚟同外國人打交道同埋了解其它國家同文化。
據估計約1000人以世界語為母語。世界語喺人工語言之中係目前唯一有俾人作為母語嘅。大概有十萬至兩百萬人能夠流利使用世界語，並散居世界各地。世界語有文學作品、歌曲同電影，聯合國教科文組織喺1954年推薦學習使用（1985年被聯合國教科文組織推薦畀聯合國成員國），2007年成為歐洲共同語言參考標準（CEFR）嘅第32種語言。雖然到而家仍無任何國家畀世界語官方地位，但世界各地好多學校都有提供世界語學習課程、維基百科、Facebook、Firefox、Ubuntu都有世界語版本，其中維基百科世界語版嘅文章數量喺各語言之中排第32（喺2005年係第8名），Google翻譯亦自2012年2月22號開始增列世界語（稱為「國際語文」）。印尼嘅外交學院，亦將世界語列為年輕外交官學習嘅語文之一。(成篇文章……)