中國鐵路廣州局集團

中國鐵路廣州局集團有限公司
	China Railway Guangzhou Group Co., Ltd.
類型	國有企業
前身	衡陽鐵路局（1949年－1952年）; 廣州鐵路局（1953年－1993年）; 廣州鐵路（集團）公司（1993年－2017年）;
開檔	2017年
總部地址	中國廣東省廣州市越秀區中山一路151號
業務地區	中國廣東、海南、湖南; 香港
緊要人物	董事長：武勇; 總經理：韋皓
產業	鐵路運輸
服務	鐵路運輸管理同維護
總資產	2846億元人民幣（2011年底）
員工人數	14.7萬人（2011年底）
母公司	中國鐵路總公司
子公司	廣深鐵路股份有限公司; 石長鐵路有限責任公司; 粵海鐵路有限責任公司; 深圳平南鐵路有限公司; 廣東廣珠城際軌道交通有限責任公司; 海南東環鐵路有限公司;
網址	www.gzrailway.com.cn

中國鐵路廣州局集團有限公司（簡稱「廣鐵集團」）^[1]，係中國鐵路總公司屬下公司，主要負責經營廣東、湖南、海南大部分鐵路業務，總部喺廣州。1993年試過改成公司制，當時叫做「廣州鐵路（集團）公司」。

史

廣鐵總部大樓

廣鐵集團嘅歷史可以追溯到1936年成立嘅衡陽鐵路局。1958年衡陽鐵路局機關南遷廣州，成為廣州鐵路局，亦就係而今廣鐵集團嘅前身。

1953年1月1號成立廣州鐵路管理局，下邊包括廣州、衡陽、株洲、南昌四個運輸分局，管轄粵漢鐵路蒲圻站（唔含本身）南邊、湘桂鐵路冷水灘站（包含本身）東邊、廣三鐵路、廣九鐵路同新劃俾廣州鐵路管理局嘅浙贛鐵路鷹潭站（唔含本身）以西、南潯鐵路。

1958年1月1號，南昌分局歸落新成立嘅南昌鐵路管理局，撤銷鐵路分局建制。1958年8月，廣州鐵路管理局改名做廣州鐵路局，實行運輸同工程建設合一嘅制度。1958年11月1號，長沙鐵路局成立。廣州局淨係管轄廣東省範圍嘅鐵路。

1959年1月1號，廣州鐵路局喺海南東方縣八所鎮成立海南鐵路辦事處，接管海南島八所鐵路。1961年8月1號，長沙鐵路局撤銷，京廣線衡陽站同埋衡陽站一路往北歸屬武漢鐵路局，衡陽站以南屬廣州鐵路局。1963年4月1號，武漢鐵路局撤銷，京廣線蒲圻站之外一路往南都歸落廣州鐵路局，又恢復咗鐵路分局建制。廣州鐵路局下轄廣州、衡陽、長沙三個鐵路分局以及海南鐵路辦事處。

1983年12月15號，廣州鐵路局廣深鐵路公司成立。1986年12月衡陽分局合併入長沙分局。1987年5月28號，廣東省三茂鐵路公司成立，由廣州局代管。不過，喺廣東雷州半島嘅黎湛線（黎塘至湛江）以及茂名支線屬於南寧鐵路局管理。

廣深鐵路公司上咗市（Sehk2，0525、NYSE，GSH、上交所，601333）。

1992年，廣州鐵路（集團）公司做咗工商登記。1993年2月8號，廣州鐵路（集團）公司成立，變成以商業模式運作嘅國有獨資鐵路企業，試驗中國鐵路市場化。

去到2010年代初，廣鐵總營業里程達到6519公里，其中高速鐵路同城際鐵路有1449公里。每日平均開出動車組同客運列車420.5對，高峰期最多一日開出534對。總共有133個經營客運嘅車站。平均每日運送62萬旅客，最多一日運送116.7萬人。到2011年底為止，公司總資產2846億人民幣，職工總數17.4萬人。

2017年11月7號，國家工商行政管理總局批准廣州鐵路（集團）公司改名，改成中國鐵路廣州局集團有限公司^[2]。

2017年11月13號，喺中國國家企業信用信息公示系統入邊，中國鐵路廣州局集團有限公司搞掂咗工商登記變更。工商登記變更之後，中國鐵路廣州局集團有限公司仲係中國鐵路總公司100%控股嘅公司，不過，公司由原先嘅全民所有制企業變成有限責任公司（非自然人投資或控股嘅法人獨資）企業，註冊資本由原先嘅1608.45315億元變成2492.5403億元人民幣，業務範圍擴大，增加鐵路客貨運輸同有關嘅服務、國內貨運代理、房地產開發等等。^[3]

2017年11月19號，中國鐵路廣州局集團有限公司正式掛牌。^[4]^[5]