奶
(由乳跳轉過嚟)
奶亦都叫做乳，係一啲含有營養嘅乳白色液體，係雌性嘅哺乳類動物喺脯乳期由乳腺分泌出來嘅。呢個係哺乳類動物嘅特徵。
哺乳類動物啱啱出世嗰陣，重未能夠消化到咁多唔同類型嘅食物，於是就要靠飲奶來吸取營養。人類同其他脯乳類動物一樣，BB嗰陣時都係要食奶大嘅。之不過，人類亦都會飲其他可以養嘅食草動物嘅奶。最多人飲嘅係牛奶，亦都有人飲綿羊、山羊、水牛、駱駝、牦牛等等嘅奶。
奶可以做成唔同嘅奶類制品，好似忌廉、牛油、酸乳酪、雪糕、芝士、煉奶、奶粉諸如此類，同好多唔同食物添加濟同工業產品。奶裡面含有大量飽和脂肪、蛋白質同鈣質。
好多睇落似奶嘅植物液體都叫做奶，例如椰子汁可以叫椰奶。重有用大豆整出來嘅豆奶、米嘅米奶、大杏仁嘅杏仁奶，呢啲用植物做出來嘅代替品都會叫做奶，方便因為宗教信仰或者體格而唔飲得奶嘅人。
人奶除咗可以直接餵畀孲𤘅子之外，20世紀末期嘅科技亦都令到人可以將人奶貯起，等第日用。媽媽啱啱生完之後所分泌嘅人奶叫初乳，裏面有好多抗體，用來餵哺可以令媽媽同孲𤘅子都無咁易病，亦可以喺餵奶過程中增進母子之間嘅感情。所以有好多醫療機構都鼓勵現代媽媽要盡量餵人奶、而唔好用奶粉。有乳糖消化不良嘅人飲奶會出現肚痛、肚痾、嘔等症狀。
