彩陶文化

彩陶文化，又叫做仰韶文化，係喺中國發現嘅新石器時代文化。大概係公元前5000年到公元前2000年，主要響黃河中游。呢個文化最明顯係有好多彩陶，即係陶器上面畫好多彩色花紋，因為咁就叫做彩陶文化。呢個文化重有好多石器同骨器。氏族社會，種嘢食，養家畜。

鴞面像，彩陶文化廟底溝時期陶器

彩陶文化最先響1921年嘅河南省澠池縣仰韶村發現，所以亦都叫仰韶文化。範圍就有河南、山西、甘肅同埋最多發現嘅陜西，家下已掘到成千處遺址。

有學者認為彩陶文化承繼老官台文化；而黑陶文化承繼彩陶文化。

彩陶

彩陶文化陶器唔同黑陶文化陶器。初期彩陶唔似黑陶咁有用車做，所以無咁精細。去到中期先見有車。彩陶嘅彩主要係紅、白、黑，圖案係魚、面、網同幾何圖案。有發現細路仔葬響彩陶裏面。

食

彩陶文化響呢面唔係咁一定致，各時各地各適其適。呢陣時主要係種粟，即係小米。亦都見到有啲村就種米或者麥。至於係刀耕火耨定係精耕細作家下都未有定論。部份中期彩陶文化有加高地台起糧倉，可以蓄糧，唔怕畀水浸濕。架生方面有石斧、石鏟，石磨等。

佢哋種嘢之外，亦都有養豬、養狗，甚至養牛、養綿羊、養山羊。

打獵捉魚一樣係咁重要，有骨做魚鈎，魚叉，箭頭等等。佢哋搵食石造架生都分好多種，而且都打磨過。

衣

有啲彩陶上面印低布之類織物紋。可以推斷彩陶文化嘅人係識織布。

住

彩陶文化以農業為主，村有大有小，大村啲屋有一定格局，而挖埋溝圍住條村。村外面有墓有窰。村屋有圓有方，初時圓多，單房，後尾就方多，多房。屋牆係泥做，加草混成，有啲有木架撐。牆外面多數包草燒過，等佢硬淨啲同無咁易浸濕晒。

墓

彩陶文化係有墓，墓主亦都陪葬品。

社會

家下都未有一致定案，多數考古學家睇佢係父系社會，只有少數會認為佢係母系社會。呢樣可以睇成係母系社會轉到父系社會一個時期。

分期

因為彩陶文化咁散，又唔係咁一致，點分都係一個問題。家下考古學家將彩陶文化分做五個時期：

1. 半坡期，約莫公元前4800年到公元前4200年，中原
2. 廟底溝期，約莫公元前4000年到公元前3000年，半坡之後
3. 馬家窯期，約莫公元前3300年到公元前2000年，響甘肅、青海。
4. 半山期，約莫公元前2700年到公元前2300年，馬家窯之後
5. 馬廠期，約莫公元前2400年到公元前2000年

參考

• Chang, K. C. Archaeology of Ancient China. Yale University Press, New Haven, 1983.
• Liu, Li. The Chinese Neolithic: Trajectories to Early States, ISBN 0-521-81184-8
• Underhill, Anne P. Craft Production and Social Change in Northern China, 2002. ISBN 0-306-46771-2.