丙種射綫（gamma ray），又寫γ射綫，音譯伽馬射綫，係射綫一種，由核子放射出來。本質來講，光來睇，佢係電磁波一種，波長極窄，頻率至高，能量係電磁波之冠，以物質來睇，佢係高能量光子，以光速橫行。γ係希臘字母第三，讀似加麻，拉丁拼寫gamma。
由於光子唔帶電，唔受磁場影響。佢高能量亦有電離作用，但唔及帶電嘅甲種射綫同乙種射綫。佢唔帶電兼高能量，令佢穿透力強，要鉛磚先可抵擋。射入生物，細胞亦易生變受損，遺傳基因突變，易患癌等症。
丙種射綫係由核子內變所生，性質同X光類似，只不過X光係核子之外所生。
