例湯係香港嘅飲食用語，一般係指喺中式餐廳日日都有提供嘅湯水。
茶餐廳套餐包埋嘅例湯一盅
茶餐廳跟餐嘅例湯，中西式任揀
例湯可以分為跟餐免費送嘅同要另外加錢兩種。前面嗰種嘅湯質通常好稀，更有啲平價例湯淨係加鹽做調味，無乜湯水嘅味道，所以畀人叫做「例水」。另一種因為需要煲幾個鐘，因此會叫做「老火例湯」或「老火湯」，用咁嘅名嚟分別。
一般嘅老火例湯材料主要係用豬骨，亦可能係就地取材，用手頭上多餘嘅材料，好似雞同鴨嘅頭、頸同翼等，加上合時蔬菜全部放入大煲度一齊煲好。成日見到嘅例湯有南北杏西洋菜豬骨湯、青紅蘿蔔蜜棗豬骨湯、紅蘿蔔蓮藕豬骨湯等。
