假名

假名（粵拼：gaa2 ming4 / gaa2 meng2；日文：仮名／かな／カナ ^kana），係日本獨有嘅表音文字，有平假名、片假名、萬葉假名等唔同嘅表記法。

「假名」嘅由來，係相對「真名」（即漢字）。而家嘅「假名」嘅日文讀音係「かな」，古時「假名」叫做「かりなka ri na」，之後簡化成做「かんなkan na」，再簡化成今日嘅讀音。

基本用法

内文：音節文字

睇埋：元音、輔音同音節

音節文字係表音文字嘅一類，佢哋嘅特徵係每一個符號都表示緊音節。假名係一種音節文字，舉幾個平假名做例子，每個假名掕咗相應嘅日羅同 IPA ：

う（u / [ɯ]）	き（ki / [ki]）	く（ku / [kɯ]）	の（no / [no]）	や（ya / [ja]）

—如果使用日本話嘅人想寫 kinou（琴日噉解），就可以寫做きのうki no u。留意平假名每一個符號都可以包含一個輔音加一個元音，而唔係好似（例如）羅馬字噉個個符號淨係對應單一嘅輔音或者元音。

萬葉假名

内文：萬葉假名

由大約 5 至 6 世紀起（唐朝始於 7 世紀），日本開始同古代嘅唐人大規模噉交流，受漢語（尤其係中古漢語）影響得好犀利，亦全面引入漢字。噉自然開始有日本人嘗試用漢字書寫日本話。由 7 世紀嘅奈良時代開始，日本列島嘅人就大規模噉用漢字寫佢哋嘅語言，淨係攞漢字嘅音忽略啲漢字嘅意思，即係例如

• 「想寫 ka（想像粵拼：kaa1）呢個音呀？用可呢隻漢字寫。唔好理隻漢字係乜解。」
• 「想寫 wa（想像粵拼：waa1）呢個音呀？用和呢隻漢字寫。唔好理隻漢字係乜解。」
• 「想寫 ru（想像粵拼：lu1）呢個音呀？用流呢隻漢字寫。唔好理隻漢字係乜解。」

於是就形成咗萬葉假名，會寫出好似以下噉嘅文字。以下呢段嘢取自《萬葉集》 17/4025 ，當中粗體嗰啲唔係萬葉假名，而係訓讀嘅日文漢字：

萬葉假名	之乎路可良	多太古要久礼婆	波久比能海	安佐奈藝思多理	船梶母我毛
羅馬化	Shioji kara	tadakoe kureba	Hakuhi no umi	asanagi shitari	funekaji mogamo

萬葉假名有唔少問題：日本話一隻字詞好多時起碼幾段音節咁長，即係話日本人寫一隻字詞（表達一個完整嘅意思）閒閒哋要用成三四隻漢字，被指係好冇效率。於是乎後嚟就出現咗好似

「想寫 a 音嗰陣吓吓都要寫阿呢隻咁多筆劃嘅漢字，寫到手都軟埋。今後對阿做簡化，寫做ア算數。」

「想寫 ki 音嗰陣吓吓都要寫機，寫到手都軟埋。今後簡化做キ。」

「想寫 ri 音嗰陣吓吓都要寫利，寫到手都軟埋。今後簡化做リ。」

噉嘅諗頭，最後就形成咗平假名同片假名。

平假名同片假名

内文：平假名同片假名

廿一世紀初日本話嘅五十音圖；每個格仔表示一款音節，內有嗰隻音節喺用平假名同片假名寫嗰陣嘅樣，即係例如平假名あ同片假名ア表達嘅係 a（IPA：/a/）噉嘅音節，而平假名か同片假名カ表達嘅係 ka 噉嘅音節... 如此類推。 注意：wi 同 we 嘅假名，到咗廿一世紀初已經冇乜人用。 廿一世紀初日本話嘅五十音圖；每個格仔表示一款音節，內有嗰隻音節喺用平假名同片假名寫嗰陣嘅樣，即係例如平假名あ同片假名ア表達嘅係 a（IPA：/a/）噉嘅音節，而平假名か同片假名カ表達嘅係 ka 噉嘅音節... 如此類推。 注意：wi 同 we 嘅假名，到咗廿一世紀初已經冇乜人用。

變體假名

内文：變體假名

群馬県四万温泉個蕎麦屋嘅看板。「生そば」「なが井」度有用緊變體假名。

歷史上，一個摩拉唔一定衹有一個假名同佢對應，而往往會有好多個變體假名（日文：変体仮名）嚟表示佢。但自從日本1900年第三次小學校令之後，啲變體假名連同わ行「ゐゑを」都廢止使用（「を」准衹保留喺賓格助詞度）。所以啲變體假名就剩係喺一啲人名、地名、招牌名同埋傳統藝術（譬如花札）入便用到；而喺1948年日本戶籍法實行之後，變體假名亦唔可以再喺姓名登記嗰陣時用。

連出去

• 假名練習冊 (PDF)
• 変体仮名 五十音順一覧