原子分子同光物理學

原子物理學（atomic physics）、分子物理學（molecular physics）、同光物理學（optical physics）係三個關係密切嘅物理學領域，成日俾人擺埋一齊講。

概論

睇埋：物理學同現代物理學

呢幾門物理子領域專門研究原子、分子、同光，仲有係光同物質之間、以及物質同物質之間嘅相互作用。呢啲領域嘅目標係要了解物質點樣喺原子同分子層次構成同埋光點樣同物質有相互作用，會發展關於控制原子、分子、同光嘅方法，並且精確噉測量同分析佢哋嘅物理性質。呢幾門物理發展出嚟嘅實驗同理論技術成日會俾人用喺其他科學領域度，例如係化學、生物學、天文學、同醫學等都會用到呢啲領域嘅知識。

• 原子物理學顧名思義，專門研究原子（atom），主要可以分做三大門：第一係研究大自然嘅基礎定律；第二係了解原子嘅結構，以及原子同光嘅相互作用；第三係研究原子同電子之間、或者原子同離子之間嘅相互作用。
• 分子物理學嘗試了解分子（molecule）嘅結構同物理性質以及係更加複雜嘅物質狀態，例如係液體等等。分子物理學跨越咗物理同化學之間嘅邊界，主要嘅研究目標包括咗要了解分子嘅形狀同結構、分子嘅對稱性、分子嘅內部能量態、分子嘅光學性質同電磁性質、探測分子嘅方法、同呢啲嘢喺科技同醫藥等領域有乜嘢用途。分子物理學嘅常用工具有光譜學同埋繞射等等。
• 光物理學研究光嘅性質，仲有係光同物質之間嘅交互作用，研究範疇包括咗光嘅生成、探測方法、同光譜學。光物理學嘅內容同應用光學以及光工程學好接近，例如係對激光嘅研究。光物理學專注喺光嘅基礎物理研究，而應用光學就注重將有關光嘅知識應用喺相關嘅科技同其他科學領域度。光工程學就注重光學器件嘅設計同發展。