兒童節

兒童節係一個為咗保障細路嘅生存權、保健權、受教育權、撫養權等權利、改善兒童生活、反對虐待兒童或毒害兒童而設立嘅節日，日子喺每個地方都有唔同。

國際兒童節

國際兒童節響每年6月1號。呢個日子係起源響1949年國際民主婦女聯合會響莫斯科開嘅會，講到為咗紀念1942年6月畀納粹德國屠殺嘅捷克利迪策村全體孲𤘅子，決定將6月1號叫做國際兒童節。

世界兒童節

世界兒童節響每年11月20號。呢個日子係聯合國教科文組織響1954年12月14號定嘅。

各個地區嘅兒童節

 中國大陸

1949年10月1號，中華人民共和國成立後，正式定每年6月1號做國際兒童節，取代咗中華民國定響4月4號嘅兒童節。

臺灣

中華民國響1931年將4月4號定做中華民國兒童節。但係因國府喺中國大陸戰敗而搬到臺灣，4月4號嘅兒童節響臺灣地區可以繼續流傳。

 香港

中華民國響1931年將4月4號定做中華民國兒童節，雖然國民黨政府喺1949年10月14號被完全趕到臺灣，但嗰時香港係英國殖民地，亦一直繼承4月4號嘅兒童節嘅傳統，就算係1997年香港主權移交之後都維持唔變。

日本

日本嘅兒童節響每年5月5號，日本習俗上只會係男仔慶祝，直到1948年日本政府將3月3號嘅女仔節合併埋呢日。

韓國

受朝鮮日治時期影響，南韓嘅兒童節同日本一樣，都響每年5月5號。

澳洲

澳洲喺1954年定立兒童節，1977年喺各個州份另外設立咗關愛兒童周，但嗰時每個州份都有唔同嘅舉辦時段。直到1984年，澳洲聯邦政府開會正式決定統一時段，凡係10月第四個禮拜都係關愛兒童周（從每個國際兒童節之後嘅禮拜六到跟住落嚟嘅禮拜日為止）。

俄羅斯

俄羅斯喺1949年定立兼決定每年6月1號係兒童節。

 紐西蘭

紐西蘭嘅兒童節喺每年3月第一個禮拜日舉辦。