哈利波特：死神的聖物2
《哈利波特：死神的聖物2》（Harry Potter and the Deathly Hallows – Part 2）係一部2011年嘅奇幻電影，由大衛葉斯做導演，套片係下集，上集係《哈利波特：死神的聖物1》，改編J. K. 羅琳嘅2007年同名小說。主演有丹尼爾域卡夫、魯拔格連特、愛瑪屈臣。
劇情 編輯
埋葬咗精靈多比之後，哈利搵精靈拉環協助佢哋闖入古靈閣，想入去貝拉嘅保險庫到攞佢哋懷疑嘅分靈體，拉環應承咗，不過要求葛萊分多嘅寶劍作爲代價。制杖人奧利凡德幫哈利辨認咗搶返嚟嘅兩支魔杖，分別係屬於貝拉同跩哥嘅，但發現跩哥嘅魔杖已經轉爲效忠哈利。佢哋入到去保險庫，搵到一個分靈體——赫夫帕夫嘅金盃，但係呢個時候拉環攞走把寶劍掉低咗佢哋，三人組冒險放巨龍守衛出嚟，騎住巨龍逃出古靈閣。哈利突然睇到佛地魔嘅視角，得知霍格華茲入面仲有一個分靈體，係同羅威娜·雷文克勞有關嘅。三人組用消影術去到活米村，喺豬頭酒吧遇到阿波佛·鄧不利多（霍格華茲前校長阿不思·鄧不利多嘅細佬），哈利先知原來佢喺雙面鏡入面見到嘅係佢，亦都係佢派多比去救佢哋嘅。阿波佛指引佢哋用一條由阿妹阿蕊安娜守護嘅祕密通道進入霍格華茲。
喺霍格華茲，而家已經係校長嘅石內卜知道哈利返咗嚟，要脅懲罰所有幫哈利嘅學生同教師。哈利同麥教授企咗出嚟，石內卜同麥教授決鬥，流彈擊中食死人卡羅兄妹，之後石內卜逃走，麥教授下令帶史萊哲林嘅學生落地牢，之後動員全體師生作戰。露娜建議哈利去搵雷文克勞嘅書院幽靈海倫娜·雷文克勞，海倫娜向哈利透露佛地魔用黑魔法褻瀆咗佢阿媽嘅王冠，而而家個王冠喺萬應室入面。與此同時，榮恩同妙麗去到密室，攞蛇妖嘅毒牙摧毀咗金盃分靈體。跩哥、布雷司·剎比同高爾嚟到萬應室想攻擊哈利，榮恩同妙麗及時趕到幫哈利手。高爾施放無法控制嘅惡魔之火，結果反而燒死咗自己。三人組騎住飛天掃把，救咗跩哥同剎比。喺萬應室出面，哈利用毒牙破壞咗王冠分靈體。呢個時候，哈利又通過佢同佛地魔嘅聯繫，得知佛地魔條蛇娜吉妮係「最後」嘅分靈體。去到船屋，三人組聽到佛地魔爲咗得到接骨木魔杖嘅效忠，下令娜吉妮咬死石內卜。石內卜死咗，但係將帶住回憶嘅淚水交咗畀哈利。弗雷、雷木思同小仙女戰死。
哈利用儲思盆睇石內卜嘅回憶：石內卜好愛莉莉，但係好憎詹姆，因爲詹姆成日恰佢。莉莉死後，石內卜應鄧不利多嘅要求做雙面諜，保護哈利。哈利又知道咗鄧不利多之前受到魔佛羅戒指——其中一個分靈體——嘅影響，已經就嚟死，所以計劃由石內卜殺死佢以得到佛地魔嘅信任；又知道咗指引佢去攞葛萊分多嘅寶劍嘅雌鹿護法係石內卜嘅；仲知道咗佛地魔當年殺佢父母嗰陣，意外將佢整咗做一個分靈體，佢一定要死咗先有可能擊敗佛地魔。佢接受命運去禁忌森林見佛地魔，期間金探子終於打開，露出入面嘅重生石。哈利轉動重生石，詹姆、莉莉、天狼星、雷木思走咗出嚟安慰哈利。佛地魔用索命咒打中咗哈利，哈利喺一個神祕嘅空間醒咗，鄧不利多同佢解釋咗好多嘢，並同佢講可以選擇繼續前進或者返去，哈利選擇返去。佛地魔派水仙·馬份去睇吓哈利係咪真係死咗，佢發現哈利波特仲活著，但水仙關心自己個仔馬份，就問哈利馬份係咪仲喺學校，哈利微微點頭，為咗報答佢，水仙就呃佛地魔話哈利死咗。
佛地魔帶住哈利嘅「屍體」返去霍格華茲，要求衆人投降。奈威喺分類帽入面抽出葛萊分多嘅寶劍反抗，呢個時候哈利「復活」，馬份一家同好多食死人棄佛地魔而去。當哈利同佛地魔喺城堡入面最終決戰嗰陣，茉莉·衛斯理單挑殺死咗貝拉，奈威用葛萊分多嘅寶劍殺咗娜吉妮——最後嘅分靈體。哈利最後殺死咗佛地魔。戰後，哈利同榮恩同妙麗解釋，佛地魔從來都得唔到接骨木魔杖嘅忠誠，當日喺天文塔上面，跩哥將鄧不利多繳械，之後喺馬份莊園，哈利又將跩哥繳械，所以而家接骨木魔杖真正嘅主人係哈利。解釋完，隨手將接骨木魔杖啪斷掉咗。
十九年後，哈利同金妮、榮恩同妙麗都結咗婚，送佢哋嘅小朋友去國王十字車站，喺嗰到佢哋見到馬份一家，都係送小朋友返霍格華茲。
演員 編輯
- 丹尼爾域卡夫 飾 哈利波特
- 魯拔格連特 飾 榮恩衛斯理
- 愛瑪屈臣 飾 妙麗格蘭傑
- Ralph Fiennes 飾 佛地魔
- Michael Gambon 飾 鄧不利多