露娜·羅古德

露娜·羅古德（英文：Luna Lovegood）係英國小說作家J·K·羅琳嘅奇幻小說《哈利波特》系列嘅其中一個角色。呢個角色第一次出現喺《哈利波特：鳳凰會的密令》，佢喺裡面被形容為有一頭污糟金色同散亂到腰嘅長頭髮，面上帶住迷茫嘅神態。佢有一對隆起嘅眼同銀鈴咁嘅淚水，令佢睇起上嚟「永遠驚嚇嘅樣」；佢總係俾人一種神神化化嘅印象，後嚟佢同哈利·波特、榮恩·衛斯理、妙麗·格蘭傑、奈威·隆巴頓同金妮·衛斯理做咗朋友。

露娜·羅古德 （Luna Lovegood）
伊文娜·林奇飾演嘅露娜·羅古德
首次出場	《哈利波特：鳳凰會的密令》
尾次出場	《哈利波特：死神的聖物2》
作者	J·K·羅琳
扮演	伊文娜·林奇（電影）
配音	麥紫筠（粵語配音）
詳細信息
性別	女性
家庭	贊諾·羅古德（父親） 潘多拉·羅古德（母親） † 紐特·斯卡曼德（太老爺） 蒂娜·金坦（太奶奶）
配偶	羅夫·斯卡曼德
仔女	洛肯·斯卡曼德 萊桑德·斯卡曼德
國籍	英國

呢個角色由愛爾蘭女演員伊文娜·林奇飾演，佢喺改編電影《哈利波特：鳳凰會的密令》、《哈利波特：混血王子的背叛》、《哈利波特：死神的聖物1》同《哈利波特：死神的聖物2》裡面出現。羅琳喺佢嘅網站上形容呢位女演員係呢個角色嘅「完美」選擇。為咗飾演呢個角色，林奇無得唔將佢啲頭髮染成淺金色，仲得到一致好評。

人物性格同特徵

露娜嘅顯著裝束。

家庭背景

露娜嘅屋企喺《火盃的考驗》之前從來未被提到，佢父母已知都係巫師同女巫，不過露娜嘅血統無被直接咁提到。佢阿爸贊諾·羅古德Xenophilius Lovegood喺《死神的聖物》入面第一次亮相，就算佢喺之前俾佢個女公開佢就係巫師雜誌《謬論家》嘅主編，絕大部分人認為呢本雜誌嘅內容只係荒謬嘅奇聞軼事同可笑嘅娛樂小品。根據露娜嘅講法，佢認為佢阿爸嘅呢本雜誌發表咗「佢認為公眾需要知道嘅重要故事」，仲對佢嘅內容深信不疑。至於露娜嘅阿媽，根據露娜所講，露娜媽咪係一個好鍾意做實驗嘅犀利女巫，但係佢因為一次嚴重嘅咒語實驗出錯而死。露娜喺９歲嗰陣因為睇住佢阿媽嘅死，佢形容嗰個情景係「好得人驚」，呢個亦都係點解佢能夠睇到騎士墮鬼馬嘅原因。露娜喺小說入面似乎係佢屋企嘅獨生女，因為喺裡面並無提到佢有兄弟姊妹，種種嘅狀況都或者意味住露娜有可能係純血或者係高度混血。

喺《哈利波特：火盃的考驗》入面提到，羅古德一家住喺英國南海岸—奧特里聖卡奇波爾Ottery St. Catchpole附近嘅一個村莊仔嗰度，而衛斯理一家亦都係住喺嗰度附近，呢個後嚟喺《哈利波特：死神的聖物》入面得到證實。

外觀上

就算露娜俾人認為離奇古怪，但佢成日對人性有敏銳嘅洞察力，而哈利都注意到佢直率誠實嘅竅訣。佢對佢嘅朋友都非常咁尊重，因為哈利注意到佢喺自己間房嘅天花板上面將佢朋友嘅樣畫咗落嚟（包括哈利、榮恩、妙麗、金妮同奈威），這些畫用「友誼」呢個詞語嘅鍊一次又一次咁重複連接住。好明顯，就算榮恩同妙麗一次又一次咁無禮貌咁對佢，佢都仲係將呢五個人睇成為同佢好親近嘅朋友。

露娜有一頭金灰色又凌亂到腰咁長嘅長髮，眉毛嘅顏色好淡，眼神總係好迷茫咁。她有形容為銀鈴咁嘅淚水同隆起嘅眼睛，呢個表明佢可能係淺灰色嘅，佢夢幻咁嘅外表令她個樣有啲特別。一般認為，佢嘅大眼唔單止係喜劇化嘅誇張，而係好似喺好多經典藝術作品入面所暗示嘅咁樣—係敏感、有洞察力同靈性嘅象徵。她被認為係古怪同瘋癲嘅具體化。喺小說入面，佢成日將佢支魔杖收埋喺耳後面嚟作為安全保存。佢好鍾意戴首飾，所以成日戴住一串由軟木塞製成嘅頸鏈，仲有一對好似蘿蔔咁嘅細細粒紅耳墜。露娜成日因為佢嘅怪誕嘅裝束同行為而俾人恥笑甚至係侮辱。好多人，包括作者羅琳本人都認為佢嘅性格特徵係小說入面嘅另一角色—妙麗·格蘭傑嘅對立面。

性格上

羅琳成日指露娜係「反妙麗」嘅角色，係作為「妙麗嘅對立面anti-Hermione」，因為露娜淨係憑直覺同信仰嚟作為認識所有嘢嘅基礎，而妙麗就將佢嘅觀點建立喺事實同邏輯上。事實上，作為一個雷文克勞學院嘅學生，露娜堅信「智慧係人類最大嘅財富」。妙麗曾一次又一次咁再試過說服露娜放棄佢荒謬嘅諗法，話佢嘅信念其實係無稽之談，但都總係無補於事。妙麗認為露娜「容易上當俾人呃」，呢個並唔係話露娜唔聰明；而露娜就認為妙麗心胸狹隘同「過分偏執」。就算佢哋對事物嘅睇法唔同，不過露娜同妙麗最終做咗朋友。

在《鳳凰會的密令》嘅最後，妙麗似乎意識到露娜對自己嘅信念唔會動搖。雖然露娜嘅行為有啲怪，但係佢對人性有好強嘅洞察力。露娜對友誼充滿渴望，仲願意去幫佢嘅朋友，但並唔係所有讀者認為佢係咁單純。

姓名起源

露娜（Luna）嘅名源自拉丁文，有「月亮」或「月亮女神」嘅意思，月亮喺西方嘅民間傳說入面，仲象徵住直覺同洞察力。不過，喺西方嘅古代，月亮被認為會誘使啲人變得精神錯亂嘅意思（因為咁就有「lunatic」呢個詞，意思係精神錯亂的）；呢個都好明顯係同露娜嘅瘋癲同心不在焉嘅性情有關，露娜亦都因為咁而有一個癲傻意思嘅花名—「露瘋子loony」。露娜嘅護法係野兔，在英語嘅俗語入面，野兔亦代表住瘋瘋癲癲。

佢嘅姓氏「羅古德Lovegood」嘅起源有啲模稜兩可：佢嘅姓氏將英文入面兩個正面積極嘅詞語「love」仲有「good」擺埋一齊，呢個好可能同佢嘅性格上嘅友好同單純有關，雖然呢個解釋有啲牽強，但佢嘅姓氏的確都有「熱愛美好事物」嘅意思。同時都有人認為嗰個姓氏同支持達爾文進化論嘅澳洲生物學家艾略特·羅古德·格蘭特·華生有關。

相關情節

鳳凰會的密令

内文：哈利波特：鳳凰會的密令同哈利波特：鳳凰會的密令 (電影)

露娜喺霍格華茲嘅雷文克勞學院讀４年級，同金妮·衛斯理同級。佢喺《鳳凰會的密令》入面第一次出場，當時哈利·波特、金妮·衛斯理同奈威·隆巴頓喺霍格華茲特快列車上面搵唔到第二啲車廂嗰陣，金妮說服佢哋同露娜共享一個車廂。當時露娜正喺車廂入面特登掉轉嚟揸住本《謬論家》嚟睇。露娜對哈利、奈威同埋跟住嚟到嘅榮恩·衛斯理同妙麗·格蘭傑表現比較友好，但是佢哋有時覺得露娜嘅行為有啲可笑。露娜喺學校裡面俾人孤立，但佢似乎唔係幾關心人哋對佢嘅諗法。

露娜知道自己喺學校裡面嘅花名—「露瘋子loony」—人人都咁樣叫佢，甚至有時金妮都咁叫佢，甚至係佢啲同學淨係為咗好玩，佢哋會透過定期將佢啲嘢偷咗仲收埋嚟取笑佢。雖然佢意識到人哋玩自己，但佢基本上不為所動，似乎對呢啲嘢並唔在意。就算係咁，佢都仲係重視佢嘅幾個朋友。喺哈利生命入面特別動蕩嘅一年裡面，露娜同佢建立咗深厚嘅友誼，露娜係唯一能夠平息佢嘅憤怒仲俾佢平靜落嚟嘅人，佢能夠喺哈利嘅好多親朋密友都做唔到嘅時候做得到呢樣嘢。佢喺嗰個系列入面多次支持哈利。佢同佢阿爸贊諾·羅古德Xenophilius Lovegood相信哈利同鄧不利多話佛地魔返生嘅消息，仲曾經喺一群抱懷疑態度嘅學生面前幫佢辯護；佢同妙麗一齊說服麗塔·史譏採訪哈利，以便哈利嘅觀點能夠喺佢阿爸做編輯嘅雜誌《謬論家》上面刊登出嚟。值得注意嘅係，露娜雖然似乎唔在意人哋對自己嘅看法，但係佢就好在意人哋點睇佢阿爸本雜誌，呢樣說明咗佢好重視自己嘅家庭，佢嘅思維模式都主要係是受到佢阿爸嘅影響。

四年级嘅露娜加入到鄧不利多的軍隊，並成為鄧不利多的軍隊裡面最活躍同最忠實嘅六位成員之一。喺小說嘅後來，露娜同哈利、榮恩、妙麗、金妮同埋奈威喺魔法部嘅神秘部門之戰入面同食死人發生衝突，當露娜同榮恩仲有金妮一齊同哈利分開嗰陣，佢似乎係唯一一個俾昏擊咒擊中之前無受傷嘅成員。喺嗰輯小說嘅最後，喺天狼星·布萊克不幸喺死亡密室嘅戰鬥入面遇難過身之後，對契爺嘅死覺得極度悲痛嘅哈利，除咗露娜以外，佢唔想同任何人傾佢契爺嘅嘢，呢個或者同佢哋都係有過悲慘嘅遭遇有關。

露娜透過分享佢自己對死亡嘅睇法喺安慰無咗契爺嘅哈利，佢相信死咗嗰啲親人（包括佢阿媽同哈利嘅契爺）都生活喺嗰道古老嘅拱門後面。能夠睇得見騎士墜鬼馬嘅露娜同哈利，佢哋兩個都能夠聽得到喺死亡密室中間嗰道神秘拱門後面嘅人聲。

混血王子的背叛

内文：哈利波特：混血王子的背叛同哈利波特：混血王子的背叛 (電影)

喺《混血王子的背叛》入面，哈利喺霍格華茲特快列車上，當佢被其他一啲女同學邀請加入去佢哋嘅車廂，話佢唔洗同露娜同埋奈威一齊坐，暗示佢哋兩個係唔受歡迎嘅人，當時哈利令人唔自在咁講：「佢哋係我嘅朋友。」露娜用佢直率老實嘅方式睇到啲人期待好似哈利咁樣嘅人擁有「比我哋更型嘅朋友」。哈利嘅回應表明佢自己越來越鍾意呢對拍檔，露娜同奈威都好型。

喺聖誕節嗰陣，哈利邀請露娜參加由史拉轟教授做搞手嘅聚會，佢哋進行咗一場柏拉圖式嘅約會。露娜著咗一件閃令令嘅銀色珠片連身裙，佢睇起嚟都幾好睇嘅。哈利仲注意到，佢對於傾計內容嘅腐牙陰謀（據講正氣師試吓透過黑魔法結合牙齦疾病嚟摧毀魔法部），令哈利飲嘢嗰陣忍唔住笑而濁親嚟對住佢自己杯飲品去咳。露娜喺葛萊分多對赫夫帕夫嘅魁地奇比賽入面做評述嘅工作，佢喺評述入面好少講到呢場比賽—而係講到體育場上面嘅「得意形狀嘅雲」，仲有金妮個人有幾好，仲幽默咁話其中一個赫夫帕夫球員患有「丟球症Loser's Lurgy」。麥教授都唔知應該點樣處理佢，但一啲粉絲就認為佢嘅評論好得意。呢樣嘢佢好過榮恩，佢話露娜可能癡咗線，只係用一種好嘅方式。嗰個系列嘅作者喺一次訪問入面指出，佢「好鍾意」寫露娜嘅評述，仲認為呢個係「令人眼花撩亂嘅洞察力blinding insight」。

後嚟，當食死人襲擊霍格華茲嗰陣，露娜、金妮同奈威成為咗少數響應號召保護學校嘅鄧不利多的軍隊成員。喺鄧不利多嘅葬禮上，哈利對露娜同奈威都產生咗一種「極大嘅感情」，因為前者幫助後者去到佢嘅位置。

死神的聖物

内文：哈利波特：死神的聖物、哈利波特：死神的聖物1同哈利波特：死神的聖物2

喺《死神的聖物》入面，哈利、妙麗同榮恩去到霍格華茲出面嚟進行對佛地魔嘅對抗，而學校裡面嘅鄧不利多的軍隊領軍抵抗嘅成員就係露娜、金妮同奈威。露娜同佢阿爸參加咗比爾·衛斯理同花兒·戴樂古喺洞穴屋舉行嘅婚禮。就算哈利用變身水嚟偽裝，不過露娜喺呢段時候淨係憑住佢面上嘅表情就可以即刻認得出哈利。露娜後嚟返到去霍格華茲讀６年級，佢同金妮喺嗰度幫奈威重振鄧不利多的軍隊，咁樣就激嬲咗被派去霍格華茲教書嘅食死人—卡羅兄妹。佢哋３個喺第一個學期闖入咗賽佛勒斯·石內卜嘅辦公室，企圖偷走葛萊分多寶劍嚟幫哈利踏上旅途。佢哋俾人拉咗仲明顯因為佢哋嘅罪行而受到懲罰，但制裁就係同魯霸·海格一齊入去禁忌森林。呢個顯示咗石內卜教授唔係真心想罰佢哋３個，只係要罰俾食死人睇嘅啫。

當哈利佢哋３個去探羅古德家嗰時，佢留意到有幾項證據表明露娜已經有好幾個禮拜無返屋企（就算係聖誕假期）：佢同佢阿媽張相上面蒙咗啲灰塵，佢嘅衣櫃裡面無衫，仲有佢張床，睇起嚟好似已經有一段時間無瞓過。後嚟透露，露娜喺嗰年搭霍格華茲特快列車返屋企過聖誕節嗰陣被綁架，用嚟阻止露娜阿爸（贊諾·羅古德）喺《謬論家》上發布撐哈利·波特嘅報導。當哈利佢哋３個喺羅古德家嗰陣，羅古德先生不顧一切咁去諗辦法嚟營救自己嘅獨生女，於是出賣哈利佢哋３個俾食死人，希望咁樣做可以確保露娜放得返出嚟。不過好彩佢哋３個後尾走得甩。佢哋３個喺幾個月之後成為咗俘虜被困喺馬份莊園嘅地牢。佢嘅３個喺嗰度發現咗露娜同埋魔杖製作者—奧利凡德先生被韞住喺嗰度做人質。佢哋一班人得到家庭小精靈多比嘅幫手拯救咗出嚟，仲將佢哋帶到去比爾同花兒喺貝殼居嘅屋企，嗰度嘅保護性魔法可以令佢哋安全。

哈利佢哋３個返到去霍格華茲搵佛地魔用嚟做分靈體嘅雷文克勞嘅嘢嗰陣，露娜幫哈利入去雷文克勞嘅交誼廳嚟去搵羅威娜·雷文克勞嘅王冕。當佢哋兩個被發現嗰陣，露娜將食死人教授艾米克·卡羅整暈。露娜後嚟喺霍格華茲大戰入面奮勇作戰，仲召喚咗佢嘅護法嚟幫手擊退幾百個就嚟襲擊哈利、榮恩同妙麗嘅催狂魔。喺哈利被認為死咗之後，露娜最終同妙麗仲有金妮一齊同貝拉·雷斯壯決鬥，後來直到茉莉·衛斯理接手仲將佢打低。

最後，當佛地魔被打低嗰陣，露娜係第一個祝賀哈利嘅人。霍格華茲大戰完咗之後，露娜似乎係唯一一個意識到哈利需要安靜嘅人，所以佢將注意力分散，等哈利可以喺隱形斗篷下面走甩。

小說後嘅生活

羅琳喺《死神的聖物》上映之後嘅第一次電視訪問入面，佢透露咗露娜喺霍格華茲畢業之後生活嘅好多方面。露娜都仲係個古怪嘅人，沉迷喺魔法動物嘅露娜選擇同追求嘅職業係「相當於巫師」嘅自然歷史學家。露娜接受咗佢阿爸有時係錯嘅信念，但係羅琳解釋話，佢嘅背景培養咗佢有一種獨特嘅開放思想，呢樣嘢令佢能夠發現更多以「現實」為導向嘅人可能無法識別到嘅發現。後尾喺基於網絡聊天嘅訪問入面，羅琳解釋話，露娜喺佢嘅職業生涯入面發現到好多新嘅魔法動物物種仲因為咁而出名，就算佢最後被迫去承認實際上並唔存在嘅彎角鼾獸Crumple-Horned Snorkack。

露娜後來嫁咗俾同樣係自然歷史學家嘅羅夫·斯卡曼德Rolf Scamander—《怪獸與牠們的產地》嘅作者—紐特·斯卡曼德個孫仔，婚後佢哋兩個環遊世界仲過住好有趣嘅生活。

喺ITV嘅《JKR紀錄片》入面，羅琳畫咗包括露娜同羅夫在內嘅新一代衛斯理家嘅族譜，露娜同羅夫生咗對孖仔—羅肯Lorcan同埋萊桑德Lysander。呢對孖仔喺露娜嘅朋友（榮恩同妙麗）有自己嘅細路幾年之後先至出世；哈利同金妮據透露用佢哋「親愛嘅朋友」嘅名嚟幫佢哋嘅第３個細路兼唯一嘅女改名，叫做莉莉·露娜·波特。

迴響同評價

露娜喺《鳳凰會的密令》入面第一次亮相之後好快就成為咗粉絲最鍾意嘅角色，呢個好大程度上歸功於佢古怪嘅個性同樂天嘅生活態度。《IGN》將露娜評為「最佳嘅哈利波特角色」嘅第12位，仲指出：「雖然露娜成日因為佢怪人嘅方式而令人避咗佢，喺升到五年級嘅路途上，當佢喺霍格華茲特快列車上遇到哈利·波特同佢嘅朋友嗰陣，情況就發生咗變化。後來露娜加入咗鄧不利多的軍隊嘅英勇學生組織團隊，仲喺嗰個組織入面發揮咗關鍵作用。」《帝國雜誌》將露娜列為最佳角色嘅第10位。