大埔舊墟

大埔舊墟（Tai Po Old Market、Tai Po Kau Hui），原本叫大埔墟（Tai Po Market、Tai Po Hui、亦有Tai Po Hu），或大埔頭墟，古名大步墟，亦有叫舊墟，係香港一地，亦係一墟。佢喺大埔，原本東南靠住大埔海，直至大埔新市鎮填海，先至遠離海邊。

天后廟

賽馬會診所

省躬草堂

墟以爲大埔墟天后廟爲聚腳點，舊村落形式，經已變成高樓。原本範圍，約莫係汀角路，大埔太和路，翠樂街一帶。亦有將翠樂街以西，去到汀太路一地都歸入舊墟。而過汀角路近處，大埔填地，亦可視爲舊墟範圍。舊時墟以舊墟直街爲大街，墟內重有美新里、平安里、翠和里。西面過翠樂街，尚有翠怡街。

史

大埔舊墟，年代久遠。個墟係古時埗頭，埗卽係埠，係水陸交通駁腳之處。大埔，原名大步，就係咁嘅意思。舊時水上人，同陸上人，喺墟買賣所需。

早年嘅情況，並無記載。現有嘅墟，最早可以追溯到大明萬曆年間，龍躍頭鄧氏，分支到大埔，喺林村河以北一帶落戶。喺今日天后廟汀角路左近，立孝子鄧師孟祠，紀念孝子鄧師孟。喺康熙十一年，卽一六七二年，鄧氏向新安知縣申請建墟，喺已圮毀嘅祠原址，立大步墟。而當今天后廟，就係大清康熙卅年，卽係一六九一年立。不過今日嘅廟，經已重修多次。舊時墟邊係大埔海，南面無幾遠係林村河口。墟西同北都盡係田地。所以水陸都方便。由於墟係鄧氏起，而呢帶係鄧氏稅地，其他氏族，不能染指。

舊墟雖然獨佔地利，但一八九二年，大埔泰享文氏，聯同本地同客家村落，共組大埔七約，反抗鄧氏，另起墟灶。喺林村河口以南，建太和市。該市因爲地近九廣鐵路，一九一三年香港政府起咗大埔墟火車站，就更加興旺，取代原本大埔墟地位。大埔墟因而稱爲舊墟，地位亦大不如前。

如今舊墟係住宅大廈爲主，地下有街舖。但全無墟市特徵，無人趕集賣肉賣菜等。舖頭以食肆爲主。

屋宇

汀角路一邊，墟北有天后廟，墟南有省躬草堂。天后廟，亦稱天后宮。過汀角路填地，有天后宮風水廣場。

近天后廟處，有大埔賽馬會診所，未有大埔那打素醫院之前，係區內主要診所。

填地上有大埔舊墟公園同大埔舊墟公立學校。

節慶

天后誕係大埔盛事，年年都有都擡天后出巡。天后宮風水廣場，會搭棚演神功戲。

廣場過年前，亦會擺年宵攤檔。