太平洋颱風季

太平洋颱風季（英文：Pacific Typhoon Season）係指一年內喺赤道以北同埋國際換日線以西嘅太平洋水域，包括南中國海，所產生嘅熱帶氣旋嘅一段時間，係風季嘅一種。雖然而家氣象台冇定下任何颱風季嘅指定期限，但係大部份喺西北太平洋嘅熱帶氣旋通常都會喺5月至12月期間形成。據香港城市大學嘅統計顯示，喺1950年至2000年期間，平均每年就大槪有31個熱帶氣旋產生，其中27個嘅風力達到熱帶風暴嘅程度，其中17個重達颱風嘅程度。

每年太平洋颱風季，都可以將所有熱帶氣旋合成一圖，以上例子係2020年太平洋颱風季總結圖。

太平洋颱風季： 主題頁 - 專題同編輯指南

定義

1985年至2005年期間形成嘅所有熱帶氣旋路徑圖。而圖中嘅路線組合可大致分成7部分，其中包括太平洋颱風季：赤道以北同埋國際換日線以西嘅太平洋水域嘅熱帶氣旋。

唔係一年內所有熱帶氣旋都計算入太平洋颱風季，太平洋颱風季只計算一年內（由西曆1月1號至12月31號，UTC）喺赤道以北及國際換日線以西嘅太平洋水域所產生嘅熱帶氣旋，赤道以北同埋國際換日線以東嘅太平洋水域產生嘅風暴都會被稱為颶風。呢啲唔符合太平洋颱風季範圍嘅熱帶氣旋都可能會被列入：

• 大西洋颶風季
• 太平洋颶風季
• 北印度洋氣旋季
• 西南印度洋熱帶氣旋季（跨頭半年計，即係11月至翌年5月）
• 澳洲地區熱帶氣旋季（跨頭半年計，即係11月至翌年5月）
• 南太平洋熱帶氣旋季（跨頭半年計，即係11月至翌年5月）

喺西太平洋產生嘅熱帶風暴由日本氣象廳負責命名。另外，因為熱帶低氣壓嘅影響力不大，所以熱帶低氣壓都唔會被命名，但係反而以編號命名，並以W字母作為結尾，例如「熱帶低氣壓22W」。而凡進入或者喺菲律賓指定範圍內產生嘅熱帶氣旋（風力至少達熱帶低氣壓），菲律賓大氣地理天文部門（PAGASA）都會為佢哋訂立一套菲律賓名（2001年至2016年菲律賓颱風名稱列表），每四年再用過一次，時不時會為一啲名作出更改，為當地作警報用途，所以同一個風暴有時會出現兩個唔同嘅名，或者一個名會俾幾個風暴用。

太平洋颱風季嘅熱帶氣旋，尤其係喺西北太平洋，都會喺5月至12月期間形成，即係該區嘅夏天、秋天同埋冬天。

受災地區

通常，太平洋颱風季所產生嘅熱帶氣旋，喺西太平洋產生嘅熱帶氣旋，都可能會吹襲菲律賓或者台灣等，然後趨向中國東南沿岸，例如香港、澳門、廣東等，然後登陸中國大陸等內陸地區，類似例子有颱風鸚鵡。

喺西北太平洋產生嘅熱帶氣旋，都可能會吹襲台灣或日本等，然後趨向中國東面沿岸，例如福建、廈門等，然後登陸內陸地區，類似例子有颱風鳳凰。

喺南中國海產生嘅熱帶氣旋，都可能會吹襲中國東南沿岸、海南島或越南等地區，然後登陸中國大陸等內陸地區，類似例子有熱帶風暴桃芝 (2007年)。

統計

香港城市大學

2008年太平洋颱風季統計同埋預測（CityU）

颱風季年份	熱帶氣旋	熱帶風暴	颱風
1950—2000平均	31	27	17
2008預測	33	30	19
2008實際	31	22	11

香港城市大學大氣研究實驗室曾經運用1950年至2000年嘅熱帶氣旋數量嚟統計平均數目，並計算出1950年至2000年嘅平均熱帶氣旋數目係31個熱帶氣旋，其中平均27個達到熱帶風暴程度，同埋17個達颱風程度。

2008年太平洋颱風季預測

香港城市大學亦曾經就此為2008年太平洋颱風季作出熱帶氣旋數目嘅預計，當時預期2008年太平洋颱風季將有33個熱帶氣旋，其中有30個達熱帶風暴程度，19個達颱風程度。。但實際上，2008年太平洋颱風季只有31個熱帶氣旋形成，22個達熱帶風暴程度，11個達颱風程度。

美國國家海洋和大氣管理局

1971年至2007年東太平洋熱帶氣旋累積風力紀錄統計圖。

美國國家海洋和大氣管理局喺2008年頭統計1971年至2007年太平洋颱風季所有熱帶氣旋嘅累積風力（Accumulated cyclone energy）。累積風力係指一年內所有颱風嘅中心風力嘅總數。統計後，該局得出結論：自1971年以嚟，1992年太平洋颱風季嘅累積風力最高，1977年太平洋颱風季則最低。