天后廟

天后廟（Tin Hau Temple）或者叫天妃宮、天妃廟、天后宮、天后祠、天后寺、媽祖廟、娘媽廟、聖母廟等，係供奉媽祖（天后）嘅地方，響福建、廣東同臺灣最多。而香港同澳門都靠近廣東，所以都有唔少天后廟。嚟拜嘅人，主要係爾帶靠海為生嘅唐人，祈求出海順利。所以，天后廟亦跟住爾班人，散布中國沿岸同埋東南亞等地。

澳門媽閣廟

媽祖相傳係福建莆田人，叫林默娘。大明封佢做天妃，大清就封佢做天后，水上人叫天后做阿禡。

福建、臺灣各天后廟有主次關係。而香港嘅天后廟互不隸屬，廟裡邊嘅天后分別係各村神祇，甚至本村天后誕開神功戲，會請隔籬村天后過來睇。