字間減位
字間減位[註 1]（英文：kerning），又叫字距微調[註 2]，喺排版同平面設計，係指調整字形或者字粒之間嘅空位，以達致字元之間嘅空位喺視覺上有一致感[1]。個調整值又叫特殊字距[註 3]、字距[註 4]或者突出[註 5]。
雖然叫字間減位，但係呢種調整其實係可加可減[2]。原則上，設計得好嘅字款應該唔使點做字間減位[3]，而字間減位嘅目的係靚[4]，所以做呢種調整通常只會針對嘥士大嘅字[5]，尤其係人手做嗰陣[2]。不過，有時唔做字間減位，排出嚟嘅版會睇落好似錯咗咁；如果受影響嘅字只係細嘥士嘅字而又冇方法自動解決，唯一解決方法可能係換過第隻字款。
因為字形好多時都係不規則，字形之間究竟有幾多空位，基本上都係憑直覺同肉眼判斷；就算係自動，有時都係要靠直覺同肉眼去判斷架機有冇做錯。
電腦排版
編輯喺電腦排版，做字間減位通常係根據字距表[暫譯]（kerning table）自動調整[2]，另外兩種方法係由排版軟件自動評估視覺距離同人手調整[3]。
根據基準度量調整
編輯用字距表亦即係根據基準度量[暫譯][註 3]（metrics[註 6]），而所謂基準度量就係指張表入面嘅字距對[暫譯]（kerning pairs，即係需要做字間減位嘅一
呢張表嘅內容正常係由字體設計師釐定[3]，但係啲數值其實有時會錯，甚至錯得好離譜，張表亦可能會唔完整[7]。所以有主張話設計師應該按自己嘅實際需要同原廠張表有冇唔妥，去修正字款入面（或者附屬）嘅字距表，但係呢種做法只係喺授權條款容許嘅情況下先至做到[8]。
自動評估視覺距離
編輯有啲排版軟件（例如 InDesign[3]）有所謂 ｢光學｣ 或者 ｢視覺｣[註 3]（optical）嘅字間減位功能；其實即係用某種演算法，去評估字元之間嘅空位有幾多，然後用呢個結果去衡量使唔使做字間減位，同決定做幾多[3]。
自動評估比較慢；所以有啲設計師嘅做法係內文用基準度量，標題就用自動評估[3]。不過自動評估有時會估錯，咁嘅情形結果都係要人手做。
活版印刷
編輯
活版印刷只能夠人手調整；如果做嘅調整係減字距，唯一可以做嘅係做到字粒上面嘅字形超出墊底鉛條嘅表面嘅範圍，等需要減位嘅部分可以突出[3]，呢啲冇嘢墊底嘅突出部分叫字角[註 1]（kern）。另一種做法係反轉嚟做，喺其他嘅字符之間加插唔同數量嘅微間距，令成個字嘅字符之間嘅空位視覺上一致[9]。
例
編輯
以加拿大政治人 W.A.C. Bennett 個名做例；喺某啲字款（例如 Times Roman），(W, .) 唔係表入面有嘅字距對，結果係因為 W 嘅右面斜入位咁啱大約一個空格咁闊，望落會以為中間多咗個空格（例圖第一行）。
如果呢個係問題，但係目的只係要望落唔好以為多咗個空格，可以喺 W 同 . 之間做字間減位，將 W 同 A 嘅空位，視覺上拉到同 A 同 C 之間嘅空位大致一樣（例圖第二行），唔理個句號歪埋一便，解決咗睇錯嘅問題就完。
如果目的係要靚（例如係標題、標誌、指示牌之類嘅大隻字）就要睇埋第一個句號同前後字母嘅距離，喺 W 同 . 之間做字間減位，再喺 . 同 A 之間反方向做字間減位（例圖第三行）。
註
編輯- ↑ 1.0 1.1 譯名見：何錦隆 (2012)，頁 171
- ↑ 譯名見：DeCotes, Escobar & Casey (n.d.)；又：Adobe (2023)
- ↑ 3.0 3.1 3.2 譯名見：吉松薛爾 (2009)
- ↑ 譯名見：教育局課程發展處藝術教育組 (2007)，頁 34；又：香港公共圖書館 (2019)，頁 15
- ↑ 譯名見：香港特別行政區政府教育局職業訓練局 (2009)，頁 194
- ↑ Adobe 譯錯咗做 ｢公制｣[6]
參考資料
編輯- ↑ Bringhurst (2015), p. 32
- ↑ 2.0 2.1 2.2 Bringhurst (2015), p. 33
- ↑ 3.0 3.1 3.2 3.3 3.4 3.5 3.6 Lupton (2010), p. 102
- ↑ Knuth (1986), p. 4
- ↑ DeCotes, Escobar & Casey (n.d.)
- ↑ Adobe (2023)
- ↑ Bringhurst (2015), p. 205
- ↑ Bringhurst (2015), p. 198–199
- ↑ Lippert (2023)
參考書目
編輯- 吉松薛爾 (2009年3月14日)。〈文字間的間隔（字間）〉 (臺灣中文)。喺2024年9月1號搵到。
- 何錦隆編 (2012)。《英漢印刷及傳訊科技雙解詞典》 (PDF) (香港中文) (增訂版)。香港：香港印刷資源中心有限公司。
- 《香港圖書館節2019》 (PDF) (場刊) (香港中文)。香港公共圖書館。2019。喺2024年9月1號搵到。
- 香港特別行政區政府教育局職業訓練局 (2009)。《設計與應用科技(中四至中六)學習資源: 創意數碼媒體》 (PDF) (香港中文)。喺2024年9月1號搵到。
- 〈視覺藝術科學與教常用英漢辭彙〉 (PDF) (香港中文)。教育局課程發展處藝術教育組。2007。喺2024年9月1號搵到。
- Adobe (2023年5月24日)。〈關於字距微調和字距調整〉 (臺灣中文)。喺2024年9月1號搵到。
- Bringhurst, Robert (2015). The Elements of Typographic Style (加拿大英文) (第4.1版). Seattle, WA: Hartley & Marks. ISBN 978-0-88179-212-6.
- DeCotes, Madeline; Escobar, Nick; Casey, Robin (n.d.)。〈字距微調簡介〉 (臺灣中文)。Adobe。喺2024年9月1號搵到。
- Knuth, Donald E. (1986). The TeXbook (美國英文). Reading, MA: Addison-Wesley.
- Lippert, Angelina (August 21, 2023). "How I Spent My Summer Vacation As A Letterpress Printer" (美國英文). Poster House. 喺2024年9月1號搵到.
- Lupton, Ellen (2010). Thinking with Type (美國英文) (第2版). Princeton Architectural Press.