標音

標音（粵拼：biu1 jam1）係指用寫嘢嘅文字紀錄低講嘢嘅聲，又指標咗出來嘅爾啲聲（爾啲聲叫讀音），學術上分 ｢嚴式標音｣同 ｢寛式標音｣兩大類，嚴式指標單音，寛式指標音素；至於唔係學術性嘅標音，就可以求其標到預期讀者會睇得明，又或者個音咁上下啱就得。用來標音嘅字母或者其他符號叫音標。呢樣工作查實一啲都唔易，例如有好多語言都冇對應嘅文字。

英文嗌法

• 標音
  • transcription
• 嚴式標音
  • phonetic transcription，又叫 narrow transcription
• 寛式標音
  • phonemic transcription，又叫 broad transcription

嚴式同寛式

嚴式標音係將實際嘅發音標出來，所以會標出好多發音嘅細節，而寛式標音係概念化咗嘅標音，好多爾啲細節都唔會標出來，但係咁並唔一定代表嚴式係 ｢精確｣ 或者寛式係 ｢求其｣，但係因為要寫低嗮啲細節，標嚴式會難好多。

喺好多時，標得太仔細其實冇意義，例如英文嘅 t 尾音可以 ｢讀埋尾音｣（released）或者 ｢好似入聲咁讀｣（unreleased），對聽得明嘅人，聽落冇分別，即係語義冇影響，即係話，其實只要標 ｢概念上係 t 音｣ 就得，另外，喺英文，一個音素實際上用邊個單音發音，好多時都係取決於個音喺個字嘅邊個位，變咗標實際嘅單音好多時係無謂，不過前提係要知道係邊隻語言，因為唔同語言嘅音素都唔同。

相反，有時係有需要標明個音實際上係點發音，例如唔同地方嘅人有唔同口音，佢哋嘅 t 音可能有分別，咁嘅情形，如果目的係解釋唔同地方嘅口音有乜分別，標音素就唔恰當，應該用嚴式標音，標實際嘅單音出來。

嚴式標音習慣上用方括弧括住，寛式標音就習慣上用一對斜線括住。例如同樣係 ts，[ts] 表示 ts 係嚴式，代表 ｢唔送氣清齒齦後塞擦音｣（unaspirated voiceless alveolar affricate），但係 /ts/ 表示 ts 係寛式，指某種語言入面概念上可以叫做 ts（即係某種意義上可以概念化做 ｢清齒齦後塞擦音｣）嘅所有同位音。

唔學術嘅標音

標音可以用唔學術嘅方法標，例如喺北美，講英文嘅人習慣用一種用類似英文字嘅串法來標近似音，音節同音節之間加連接號，重音就成個音節寫大楷，爾種標音方法喺主流媒體常見，英文維基百科叫佢做 ｢respell｣，但係其實係冇名嘅。

睇埋

• 國際音標
• 韋氏音標
• 語音學