中山公園 (屯門)
呢篇文講喺香港屯門區嘅「中山公園」。想搵中西區嘅公園嘅話，請睇中山紀念公園。22°22′40″N 113°57′35″E / 22.37767°N 113.95970°E
| 中山公園 | |
|---|---|
| 紅樓 | |
 中山公園門口 | |
| 基本資料 | |
| 類型 | 紀念公園 |
| 銘牌 | 興中會嘅前基地 |
| 位置 |  香港屯門白角 |
| 建立 | 1910年 |
| 狀態 | 開放緊 |
| 指定 | 香港一級歷史建築 |
| 地圖 | |
 | |
中山公園，好多時又叫紅樓（英文：Red House），亦都可以叫屯門中山公園或者龍門路中山公園，係一個喺香港屯門區蝴蝶灣以北石角咀嘅公園，相傳話呢度係孫中山當年同革命同志聚會嘅地方。個公園面對住龍門路，隔籬係賽馬會公眾騎術學校，近住蝴蝶邨同兆山苑。個公園入面嘅青山紅樓屬於1920至30年代嘅建築物風格，屬於一級歷史建築。個公園有一個孫中山嘅銅像同紀念碑，亦都曾經有6棵桄榔樹，由黃興同孫中山親自種嘅，依家都已經枯哂，只係剩返啲紀念碑文。民國派嘅支持者每年都會喺呢度慶祝元旦同雙十國慶，升中華民國旗，同埋唱中華民國國歌。
自從2010年代開始，紅樓同埋周圍嘅地方都有畀人破壞嘅痕跡。喺2018年嘅雙十國慶嗰陣，紅樓畀中國大陸嘅商人收購咗，加上自從2020年《港區國安法》生效之後，民國派原本打算搞嘅活動都完全搞唔到。紅樓亦逐漸因為失修而面目全非。[1][2]
同興中會嘅關連
編輯香港商人李陞嘅仔李紀堂喺1901年擁有同埋經營「青山農場」（新生農場）。李紀堂喺去日本嘅船上面識咗孫中山，之後李紀堂喺1895年加入咗興中會，將青山農場交咗畀興中會用。當時個農場嘅面積好廣闊，有種瓜、生果、蔬菜、亦都有養雞同鴨，能夠自給自足。青山農場個地點好隱蔽，係興中會嘅秘密基地，用嚟做軍事訓練同埋儲存武器，之後有部分亦都有藏軍械同炸藥嘅密庫，左邊山坡就有練習射擊嘅靶場[3]。好出名嘅惠州起義同廣州黃花崗起義事件，都係喺青山農場度策劃嘅。今日嘅中山公園就係往日青山農場嘅位置。以前青山農場佔咗250幾畝地[3]，有積極支持革命嘅李紀堂曾經將佢爸爸留畀佢嘅一半遺產捐咗出去嚟資助廣州嘅起義。紅樓一帶嘅樹木好繁密，容易避人耳目。興中會廣東各縣嘅成員亦都會喺度聚集，策劃1911年嘅黃花崗之役。之後農場租咗畀海豐人洪德全，成為咗新生農場，紅樓就變咗做農場嘅辦事處[3]。
公園入面嘅建築
編輯青山紅樓
編輯
青山紅樓，又叫新生農場紅樓，或者簡稱紅樓，亦都因為喺中山公園入面，所以又成日叫做中山公園紅樓。棟建築物係一棟兩層嘅紅磚屋，混合中西嘅建築方式，屬於1920至30年代嘅建築風格。喺個位置方面，紅樓屬於坐西北向東南嘅乾宅，背靠青山（亦係屯門嘅舊名），近住白角。紅樓入面藏有一個革命理論嘅匾額，相傳係孫中山親手落筆；孫中山曾經喺紅樓入面嘅一張木檯上面策劃革命嘅行動。紅樓喺2009年12月18號成為香港嘅一級歷史建築，但係未升級做法定古蹟。
不過到2016年11月，原本由李兆堃持有嘅地皮，轉手去到一間新成立嘅睿麗有限公司（董事係大陸人肖俊峰）。新買家喺2017年1月25號發出咗律師函，要求住戶喺一個禮拜之內搬走。到2月12號，住戶發現紅樓嘅圍牆同埋一啲樹木畀人破壞咗，非常之不滿。有20位居民覺得徬徨無助，希望會獲安排上樓。現場亦有幾位保安喺紅樓出面駐守，嚟阻止其佢人入去[4]。
立法會議員朱凱廸、尹兆堅同屯門區議員朱順雅、元朗區議員麥業成、黃偉賢都認為，紅樓應該盡快宣布做暫定法定古蹟，因為覺得成件事都好唔尋常[5]。
2月19號下晝，保育紅樓中山公園聯席嘅會議發起「萬眾同心護紅樓」嘅行動，超過300人到場聲援。大會向有份聲援嘅人士派發象徵民主、自由同博愛嘅紅白藍絲帶。朱凱迪話紅樓係活生生嘅歷史見證，同埋代表住政治自由嘅空間。不過目前一級歷史建築唔包括中山公園，要求政府嘅保育方案唔好只係限於紅樓，而亦都應包括中山公園。[6]
不過古諮會主席林筱魯則指，紅樓嘅歷史價值可能只係「以訛傳訛」，認為業主冇計劃拆卸，暫時唔建議屯門紅樓成為暫定古蹟。[7]
2017年3月8號，兩位工人入咗紅樓，跟住用鐵鎚強行拆爛咗兩個窗，有居民就因為擔心有冧樓嘅危險所以報警，屋宇署人員到場調查之後貼咗張勸喻信，話有人涉嚴未經批准做違法嘅清拆工程[8]。到3月9號，古諮會因應3月8號嘅事件而優先討論「紅樓列為暫定古蹟」，主席林筱魯認為業主嘅行動已經觸及到屋宇條例，建議通過將紅樓列為暫定古蹟，最終喺冇委員反對之下通過咗[8]。
銅像同紀念碑
編輯孫逸仙博士嘅半身銅像：1969年（民國五十八年）設立，亦都有埋孫中山（孫逸仙）嘅遺囑：
余致力國民革命，凡四十年，其目的在求中國之自由平等。積四十年之經驗，深知欲達到此目的，必須喚起民眾，及聯合世界上以平等待我之民族，共同奮鬥。
現在革命尚未成功。凡我同志，務須依照余所著《建國方略》、《建國大綱》、《三民主義》及《第一次全國代表大會宣言》，繼續努力，以求貫澈。最近主張召開國民會議及廢除不平等條約，尤須於最短期間，促其實現。是所至囑！
孫逸仙博士紀念碑：喺1969年元旦豎立，喺紅樓右面嘅憩息小園度矗立，個碑高大約20幾英呎，而佢嘅頂部就係中華民國國徽加個紅圈圍住佢。個碑嘅下面有由香港周埈年所寫嘅370幾字嘅碑文。個紀念碑嘅兩邊亦都展示咗幾幅中華民國國旗，係香港少數有長期公開咁展示呢張國旗嘅地方之一。
-
近觀孫逸仙博士嘅半身銅像 -
銅像同紀念碑前面嘅基石 -
銅像同紀念碑右側 -
香港黃煜堃先生寫嘅碑文 -
香港孫逸仙紀念會寫嘅碑文 -
慶祝中華民國成立百周年嘅橫額 -
高掛嘅中華民國旗
桄榔樹
編輯個公園總共有六棵桄榔樹：有3棵係孫逸仙博士（孫中山先生）親手種嘅，到1960年因為受到電殛，依家已經枯死咗；另外有3棵係黃興先生種嘅，可惜其中兩棵分別喺2000年嘅夏季同秋季亦都枯死咗。
紀念碑文 ：
此三株桄榔樹，乃國父孫中山先生於中華民國建立前，與同志黃興、李紀堂等，在此紅樓策劃革命時手植， 爰以桄榔樹只有一條心，象徵同志貫徹國民革命，絕無二心焉。 中華民國七十三年十二月廿二日，中山紀念會謹誌。
-
1995年6月，三棵桄榔樹嘅原貌 -
1995年6月，三棵桄榔樹嘅原貌 -
2011年1月嘅時候嘅桄榔樹
新聞事件
編輯雙十節慶祝
編輯自從2018年嘅雙十節開始，所有有關嘅活動都唔可以喺個公園入面舉行，大會之後將佢哋移到去個門口度搞。
2020年10月10號，有大約20位市民去屯門嘅中山公園度觀禮，但係發現唔入得。之後雖然有保安員開返封條，但係巿民喺打算行去孫中山嘅紀念碑度嘅時候，就畀幾位黑衫保安阻撓住。其中有兩位自稱係業主嘅代表話個地方屬於私人地方，要求巿民離開，而巿民就堅持話笪地方係屬於官地。當一位60幾歲嘅男子嘗試突破保安嘅防線嘅時候，就一直畀保安拉住，之後亦都發生咗肢體嘅衝突。佢慨嘆政府唔容許巿民表達心聲，加上有成6架警車、至少30幾位機動部隊成員同20位便衣警戒備咁多，接嘅警方係威嚇緊市民，打壓市民慶祝辛亥革命[9]。參加者之後唱《中華民國頌》、《梅花》等嘅歌，便衣警就一字排開去錄影。當市民準備走嗰陣，警員亦都要求登記身分證[10]。
2021年10月10號，公園外圍有大批警員同埋警方傳媒嘅聯絡隊戒備，而青山紅樓周圍亦都拉起咗封鎖線同埋放咗圍欄，有幾位外籍保安戒備。有市民嘗試闖入去紅樓，跟住畀預先喺嗰度部署嘅保安人員同警察，用私人土地做理由而唔畀佢哋入[11]。
2021年2月15號，《大公報》指控屯門紅樓入面嘅雙十活動係「台獨活動」，跟住話有關嘅活動係「違反國安法」[12]。
其他
編輯有網友喺2020年12月期間經過屯門紅樓嘅時候，發現中山公園入面嘅中華民國國旗畀人攞走咗，而入面亦有四塊紀念碑畀人喺上面噴咗藍色嘅油漆[13]。
2020年7月，有網友經過中山公園前地嘅時候，發現近期種滿咗以前冇嘅有刺植物。
2023年3月，有網民經過屯門紅樓嘅時候，發現圍封範圍比以前擴大咗[14]。
公共交通
編輯| 接駁交通列表 | ||||||||||||||||||||||||||||||||||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|
|
九龍新界巴士
大嶼山或機場巴士
| ||||||||||||||||||||||||||||||||||||||||||||||||||||
文獻
編輯- ↑ 孫中山香港遺址紅樓被陸商收購雙十升旗禮恐成絕響 互聯網檔案館嘅歸檔，歸檔日期2020年8月25號，.，甄樹基，法國國際廣播電台，2018-01-20
- ↑ 香港孫中山革命遺址「紅樓」 遭中國商收購強拆 互聯網檔案館嘅歸檔，歸檔日期2019年8月19號，.，自由時報，2017-02-17
- ↑ 3.0 3.1 3.2 〈國父革命遺址屯門紅樓將拆 半世紀前住客回舊地：今日得返個殼〉。01社區。2017-02-20。
{{cite news}}: CS1 maint: url-status (link) - ↑ 〈屯門青山紅樓瀕清拆 居民遭新業主逼遷〉。明報。2017-02-17。原先內容歸檔喺2017-02-19。喺2017-02-17搵到。
- ↑ 〈紅樓新業主突收地逼遷 20居民恐無家可歸〉。香港01。2017-02-16。
- ↑ 〈團體發起「萬眾同心護紅樓大行動」300人參與〉。SYMediaLab 新傳網。2017-03-01。原先內容歸檔喺2017-05-19。喺2017-03-30搵到。
- ↑ 〈古諮會暫不建議屯門紅樓成為暫定古蹟 稱業主沒計劃拆卸〉。明報。2017-02-28。原先內容歸檔喺2017-03-30。喺2017-03-30搵到。
- ↑ 8.0 8.1 〈孫中山革命基地紅樓受清拆威脅 終列為暫定古蹟〉。蘋果日報。2017-03-09。原先內容歸檔喺2017-03-12。喺2017-03-09搵到。
- ↑ 〈市民赴屯門紅樓紀念雙十 業主聘外籍保安阻攔爆衝突 警車駐守戒備 六旬翁：紀念歷史有錯咩？〉。立場新聞。2020-10-10。原先內容歸檔喺2020-10-28。喺2020-10-10搵到。
- ↑ 〈雙十節20人屯門紅樓慶祝 警設路障查身分證〉。《明報》。2020-10-10。原先內容歸檔喺2020-10-23。喺2020-10-10搵到。
- ↑ 〈【雙十節】警方屯門紅樓戒備 外籍保安設封鎖線〉。立場新聞。2021-10-11。原先內容歸檔喺2021-10-11。喺2021-10-11搵到。
- ↑ 〈監察議會 | 泛暴區議會呻無地方慶「雙十」 團體指或違國安法〉。大公文匯。喺2021-04-08搵到。
- ↑ 〈屯門紅樓多塊紀念碑被塗漆、旗桿被拆除 麥業成：等同消滅民國歷史〉。立場新聞。原先內容歸檔喺2020-12-19。喺2020-12-19搵到。
- ↑ 青山散步。〈紅樓圍封 ( 其實私人地方, 封係正常的 )〉。Facebook。喺2023-07-12搵到。
出面網頁
編輯
- 屯門中山公園 Wayback Machine嘅版面存檔備份，收錄於中山公園數據庫Wayback Machine嘅版面存檔備份，由香港浸會大學圖書館Wayback Machine嘅版面存檔備份提供
- 香港自遊樂喺18區介紹 Wayback Machine嘅版面存檔備份
- 屯門青山農場與辛亥革命運動
- 屯門中山公園／紅樓 Wayback Machine嘅版面存檔備份，bigdogkee's blog
- 紅樓 - 屯門，大香港旅遊王
- 青山紅樓喺2009年1月嘅外觀影像 Wayback Machine嘅版面存檔備份
