開主選單
高劍父 1930 年畫嘅《東戰場的烈焰》

嶺南畫派(粵拼:Ling5 naam4 waa2 paai3),有時會叫做粵畫派(粵拼:Jyut6 waa2 paai3[1][2],係由粵人畫家組成嘅一個畫畫流派,喺 19 世紀尾由畀人嗌做「嶺南三傑」嘅高劍父高奇峰同埋陳樹人創立[3]。佢係傳統唐人國畫變出嚟嘅一個革命派,以創新做宗旨。喺西方藝術思潮嘅衝擊下再加埋近代中國嘅藝術革新運動之中逐步形成嘅。初頭嗰陣,何子淵丘逢甲呢啲辛亥革命元老衝破頑固守舊勢力嘅禁錮,積極咁創辦同推廣新式嘅學堂,唔單只培育咗大柞思想創新嘅社會精英,而且重催生咗「折衷中西,融匯古今」嘅嶺南畫派。打後佢一路有發展-第二代嘅嶺南畫家以關山月黎雄才趙少昂楊善深做代表,無論喺題材定係技法上比起「二高一陳」(即係高劍父、高奇峰同陳樹人)又有新咗嘅突破,畀人讚係當代嶺南畫派嘅四大畫家[4]。到咗今日,粵畫勁到同大戲廣東音樂一齊畀人嗌做「嶺南三秀」。

目錄

個名

「嶺南畫派」呢個名唔係粵畫家自己改嘅。嗰陣高劍父、高奇峰同陳樹人三個以佢哋嘅新畫風喺嶺南度別樹一格,畀同期嘅人改咗個名做「嶺南三傑」-而「嶺南畫派」呢個名就走咗出嚟。之但係高劍父佢哋查實唔係好滿意呢個名,覺得佢有狹窄嘅地域性,容易畀人以為佢哋淨係地區性嘅畫家團體,更加體現唔到佢吸收海外畫風發揚唐畫嘅革新理想。高劍父佢本人從嚟唔用「嶺南畫派」呢個名,而情願自稱做「折衷派」,話係「博采眾長,合于一身」咁解。

藝術性

粵畫派引進咗西人嘅水彩畫法同印象派(粵拼:Jan3 zoeng6 paai3;Impressionism)思潮,融合咗中西繪畫嘅長處,保持咗傳統唐人水墨畫嘅筆墨特色,創製出筆墨勁爽豪縱、色水鮮艷明亮、水分淋漓嘅現代畫畫新格局。喺粵畫嘅藝術性上,唔同粵畫家有唔同意見[5]

  • 黎雄才話:「嶺南派要有時代感同地方色彩,要可以畀大眾所接受。寫畫嗰陣要以筆墨為主,渲染乃幫助氣氛。可以先行一步就係創作,跟後就係模仿。」
  • 趙少昂話:「嶺南畫派係要具有時代感嘅文藝思潮,重要有新嘅題材,靚嘅構圖,有神韻嘅筆墨同詩嘅意境,而達到真善美嘅效果,能夠做到雅俗共賞,先至係最好嘅作品。」
  • 關山月就咁講:「作為一個畫派嚟講,唔可以排除佢具有鮮明嘅地方特色同具體嘅師承關係,亦都唔排除佢係技法上有某啲共同嘅特色同慣用嘅手法,但係我認為呢啲都唔係主要問題,……實質上,嶺南派之所以喺中國現代美術史上有到廣泛嘅影響,受到進步人士嘅支持同肯定,主要係因為佢喺新舊交替嘅歷史時期,代表咗先進嘅藝術思潮。佢揭起嘅藝術革命旗幟,主張以新嘅科學觀點對因襲、停滯嘅舊唐畫嚟一番大改造。佢主張打破門戶之見,大膽咁吸收外來嘅養料,令到具有千百年古老傳統嘅唐畫重獲新生;佢反對尊古卑今嘅保守觀念,強調緊貼時代嘅步伐,創造出能夠反映現實生活同時代精神嘅新唐畫;佢強調呢種新唐畫唔係為咗表現自我而只滿足個人嘅陶醉同欣賞,亦都唔係狹義咁為少數人服務嘅,而是為咗更加多人可以接受佢-即係為咗時代嘅需要而追求一種大眾化、雅俗共賞嘅藝術。」
  • 廣州畫院副院長黃志堅再明確啲咁將粵派嘅特徵歸結做四點:「以倡導‘藝術革命’、建立‘現代國畫’為宗旨;以折衷中西、融會古今為道路;以形神兼備、雅俗共賞為理想;以兼工帶寫、彩墨並重為特色。」

技法

按照王禮溥嘅睇法,嶺南畫派喺技法上嘅特色有[6]

  • 注重留白:粵畫派同傳統嘅水墨畫一樣,喺佈局嗰陣講求「虛實相生」,「用心於無筆墨處」,係對水墨畫傳統技法嘅繼承。
  • 用筆注重骨法:粵畫派筆法變化好繁複,喺畫面上造成咗反傳統嘅效果,以達到氣勢磅礴、氣韻生動嘅境界。
  • 畫面賦色艷麗:受到西人印象派嘅影響,粵畫派睇重光嘅表現,畫面啲色水大多數都好鮮艷-呢一點同強調「蕭條則會筆墨之趣、淡漠則得筆墨之神」嘅水墨畫啱啱好相反。
  • 背景著色渲染:自重大唐王維提出「畫道之中,水墨為上」嘅主張之後,傳統唐人畫一直就重視水墨,唔鍾意彩色。粵畫派以色水渲染嚟襯托水墨,係對唐畫技法嘅一種創新。

圖庫

睇埋

  1. 嶺南畫派-折衷中外融合古今
  2. Croizier, R. C. (1988). Art and Revolution in Modern China: the Lingnan (Cantonese) school of painting, 1906-1951 (Vol. 29). Univ of California Press.
  3. "岭南画派". (原先內容喺2014年2月13號歸檔). 喺2017年9月15號搵到. 
  4. 岭南画派的代表人物
  5. The Lingnan School of Painting - Introduction
  6. "王礼溥,岭南画派". (原先內容喺2007年8月10號歸檔). 喺2017年9月15號搵到. 

出面網頁