廣府人

廣府人（粵拼：gwong2 fu2 jan4），亦有廣東人（gwong2 dung1 jan4）呢種叫法，早期移民海外嘅廣東人一般自稱唐人。係指以粵語（又嗌白話、廣東話、廣州話、廣府話、海外華人慣稱唐話）爲母語嘅人群，主要分佈喺中國南部嘅珠江三角洲，學術上嗌廣府民系（gwong2 fu2 man4 hai6），基本算做漢族嘅民系。廣義上嘅廣府人等同於粵語人群，即係計埋蜑家、四邑、廣西等，而具體到族群認同，就僅指舊時廣州府住落嘅居民（所以嗌「廣府」），比如四邑因爲啲話好唔同而自成一系、蜑家因爲舊時有陸上人同水上人之分而唔同廣府人撈埋、廣西嘅粵人亦都有自己嘅族群認同等等。

廣府人/廣東人
孫中山 黃飛鴻 葉問 袁崇煥 駱家輝 蘇震西 易建聯 李小龍同李國豪 劉德華 黎姿 楊丞琳 梁靜茹
總人口
6600萬~1億
分佈地區
中國（廣東、廣西、香港、澳門）、美國、英國、大馬、加拿大、星架坡、越南、澳洲
語言
粵語。比較多人識講所在國嘅國家通用語言。
宗教信仰
主要係大乘佛教、道教，有儒家思想同中國民間宗敎背景。有部份人信天主教、基督新教。有小部分信回敎，呢部份人畀中國政府識別爲回族。亦有唔信教或者無神論。
相關種族
漢族、四邑人、百越

今下，廣府人係世界各地都搵得到，而大部份住喺廣東、廣西、海南、香港、澳門。東南亞同歐、美、澳、加都有唔少。

名

廣府人、廣府話呢兩個詞比較學術同埋書面，日常生活好少人會噉講或者噉樣自稱，習慣上自稱爲廣東人，包括海外粵人亦都噉樣稱呼自己。

不過廣東本身有唔以粵語爲母語嘅族群，比如客家人、潮汕人，佢哋都係住落廣東嘅族群，但一個講客家話，一個講潮汕話，佢哋唔將自己認同爲講白話嘅人。佢哋同廣府人一齊構成廣東嘅三大族群。另外，廣東有五個世居嘅少數民族，其中壯族、瑤族都有自己嘅話，畲族大部份講客家話，佢哋唔算做廣府人。不過之中嘅回族、滿族，佢哋都係講白話，所以算做廣府人。即係話廣府人係以語言爲依歸嘅族群，呢個同族源、族史有關，所以可以跨民族。

同時廣東人亦唔止分佈喺家下嘅廣東省，除咗海外僑民，廣東人亦分佈喺廣西、海南、港澳。不過呢個係政區變動造成嘅，喺中國大多廣東人世居嘅地方原本係屬廣東省，其中港澳係由於以前畀歐洲人佔領做屬地，所以從廣東分離出去；而廣西嘅粵語區喺佢嘅東南部，有相當部份原本係廣東省轄地，中華人民共和國成立後，經過政區變動，呢啲地方變成屬廣西；海南原本係廣東一部份，亦係共和國時期嘅政區變動，海南獨立成省，形成而家廣東人喺中國嘅跨省區分佈。

另外重有種自稱叫做本地人（bun2 dei6 jan4），呢個係面對喺廣府話地區嘅其他族群時所用嘅名，比如面對珠三角地區嘅客家人、潮州人、以及北方人。出咗粵語地區嘅廣東人，唔會噉樣自稱。另外喺桂南、粵西嘅客粵雜居區，粵人自稱做地老（dei6 lou5），而客家人叫做新民。

族源同認同標誌

廣府人主要係以語言認同爲標誌嘅族群，換言之，講親白話兼且講得好嘅人，都會睇做自己人，反而血統、祖籍比較次要，噉同廣東史有關。

廣東原本係百越之地，秦代時經略嶺南，嶺南地區併入到中國版圖，自此受中華文化影響。南越國時期，當政和揖百越，中原文化同百越文化融合，形成廣東文化嘅底色。由於廣東文化一開始係融合出來嘅，同時廣東歷來海貿發達，比較能夠包納外界事物，形成有海洋文明特徵嘅包納傳統。

日後廣東地方發展，不斷開發，到唐代時，廣州已經發展成國際都會，外國僑民常居廣州，之後有部份嘅外國僑民留遺廣府，啲後代成為廣府人。同時廣府地區作爲華南中心地方，同嶺北有好多嘅交往，亦有好多北人南下嶺南，定居於此，正如蘇東坡嘅詩：「不辭長作嶺南人」。其中宋代滅亡時，宋朝嘅朝廷走難廣東，帶起大批臣民追隨佢，崖山海戰失敗，陸秀夫孭住皇帝仔跳海，當時有數十萬人跳海殉國，但亦有好多北方臣民因此留居廣東，融入廣府。嶺南地區屬於中國最開放、但遺民又最多嘅地方之一。

近世以來，廣州作爲繁華大埠，亦吸引各地商人。尤其係清代時，一口通商，廣州作爲中國同西方唯一嘅貿易港，滙聚全中國同埋來華外國商人。十三行中嘅大行商，有好多其實係祖籍外省，但佢哋住落咗後，都融入本土，成爲廣府人。另外澳門喺過百年嘅葡屬時期內，葡人歸化當地，除咗產生土生葡人，亦有葡人血統滙入到廣府人當中；同樣香港喺英屬時期，亦有啲西洋人就此滙入廣府人，比如澳門賭王何鴻燊同埋佢嘅家族有西洋血統。喺港英政府揀中廣東話做合法嘅中文後，香港其他嘅中文勢力大減，原本喺香港嘅北方人、江浙人、客家人、福建人等，逐漸都歸入廣府人，有共同嘅語言認同。

呢啲屬於工商移民，另外有軍政移民、農業移民。軍政移民有清代時駐防廣州嘅八旗兵，以及中共統治廣東後南下嘅北方幹部；農業移民有客家地區來珠三角墾殖嘅客家人。雖然相比工商移民，呢兩類移民融入廣府嘅速度慢啲，但亦有相當嘅人歸化本地。不過其中客家移民同廣府人有過嚴重衝突，即係土客械鬥，「客家」呢個名本身係廣府人對佢哋嘅稱呼，話佢哋唔係「本地」。所以呢兩個族群雖然都世居廣東，但之間嘅族群分界重係明顯。

所以廣府人嘅族群認同在於文化認同、語言認同，反而祖上血統、祖籍何處唔多緊要，因爲要講起祖宗，廣府人嘅血脈來源係非常之雜嘅。相對來講，廣州府地區作爲廣東最富庶發達嘅地方，同外界交流好多，所以外來移民亦多；而其他嘅粵語地區人群血緣純啲，無話四方雜處。

喺珠三角地區，廣府人有個緊要嘅認同標誌係珠璣巷。傳說宋代時，因爲戰亂，北方各地嘅人湧入廣東，其中位於而家南雄嘅珠璣巷曾經係先民落腳嘅地方。後來戰亂南移，啲人唯有繼續向南走難，最後喺珠三角落地生根、開枝散葉。呢個傳說唔係話所有廣東人都係珠璣巷移民嘅後裔，作爲認同標誌，講明咗廣府認同嘅成形，以當年嘅北人南下作爲自己族群嘅集體記憶。

民族劃分

大部份嘅廣府人屬於漢族，但係根據現時中華人民共和國嘅民族劃分，有啲廣府人屬於其他嘅法定民族。其中有啲廣府人信回敎，呢部分人劃入回族，亦即係廣府回民。有部份嘅廣府人祖上有旗籍，清代時屬於旗民，所以劃入滿族，亦即係廣州滿族。

由於回敎傳入廣州嘅時間比較早，廣州嘅懷聖寺係中國最早嘅清真寺之一，同時廣州作爲中國南方大埠，同外國交往多，形成咗蕃坊呢個僑民區，其中大多僑民來自中東，於是唐宋落籍嘅中東蕃商係一部份廣府回民嘅先祖；元明兩代中國其他地方搬入廣州嘅回民亦係廣府回民嘅來源之一。

清代時，八旗兵丁世代駐守廣州，廣州係清朝97個駐防點之一。呢批人有旗籍，屬於旗人，後來根據呢點，佢哋劃爲滿族。廣府人中嘅滿族有兩個來源，分爲漢軍八旗同滿洲八旗，都係當初由北京嘅京旗外派來廣州嘅八旗軍。

而喺海外，一般廣府人睇做爲華人，亦即唐人、華族，而唔會追究祖上淵源。

睇埋

• 嶺南文化