杜麗娘

杜麗娘係明代戲曲家湯顯祖創作既《牡丹亭》裏面既女主角。杜麗娘係官家大小姐，既聰明、嫻靜，又美麗、動人。湯顯祖通過夢境同埋幽冥兩種奇幻既意象，亦都打破咗男女性別角色同埋情慾既社會規範，描繪咗杜麗娘。佢追求心中既愛情生活，喺夢裏面同書生柳夢梅熱戀，因為掛住夢中情人，思念成疾，仲死埋，俾佢老豆埋葬咗喺梅花樹下，起咗間梅花庵。後來柳夢梅真係去咗梅花庵，杜麗娘鼓勵柳夢梅進京考試，柳夢梅考中狀元，杜麗娘亦都復活咗，最終實現咗佢既愛情願望。

容貌

杜麗娘係一個難得一見既絕世美女。係杜麗娘梳妝，準備遊園既時候，侍女春香睇見杜麗娘打扮後既美貌，講咗：「今日穿插得好」，然後杜麗娘唱：「你道翠生生出落的裙衫兒茜，艷晶晶花簪八寶鎮 ，可知我常一生兒愛好是天然，恰三春好處無人見。不提防沉魚落燕鳥驚喧，則怕的羞花閉月花愁顫。」

性格

王思仁係第一個點評《牡丹亭》既人，佢既評語係：「杜麗娘之妖也，柳夢梅之癡也，老夫人之軟也，杜安撫之古執也，陳最良之霧也，春香之牢賊也，無不從筋節竅髓，以探其七情生動之微也」。 王思仁將杜麗娘既形象概括做「妖」，原因係杜麗娘做咗佢嗰個年代好多人都唔敢做既嘢，佢好勇敢咁去追求愛情、可以為佢追求既嘢付出生命做代價，即使同當時既社會制度對抗，仍然努力抗爭。而在《圓駕》嗰節，杜麗娘在皇帝面前據理力爭，更加顯現咗佢對自信、堅決，「妖」中有佢老豆杜安撫既故執。

喺《牡丹亭》裏面，杜麗娘對「情」既感覺係有不斷成長既，從《閨塾》到《圓駕》，由最初既壓抑、羞澀，到夢裏面既身心徹底解放，然後復活咗之後，馬上又再矜持起來，原因就好似杜麗娘喺《婚走》所講：「前夕鬼也，今日人也。鬼可虛情，人須實禮。」喺虛幻既世界，喺夢境裏面，佢可以放任自己、身心自由、真情流露，可以為情而「妖」；而人總要面對現實世界，所以喺現實世界，佢係知書識禮、老成持重、甘於接受道德倫理既束縛。

形象

杜麗娘既「還魂」故事本身，其實喺傳統戲曲裏面唔係一個新既概念。但係同傳統戲曲裏面既「還魂」唔同，湯顯祖對杜麗娘形象既刻畫可以話係入木三分，深得人心，勾起咗明清期間唔少女仔既共鳴，所以個故事喺當時好受女仔歡迎，好多當時既女仔對杜麗娘既遭遇都好同情，亦都好有代入感。就好似明朝既馮小青講既：「冷雨幽窗不可聽，挑燈閒看牡丹亭。人間亦有癡於我，豈獨傷心是小青！」

明朝同埋清朝，《牡丹亭》都係閨閣禁書，喺《紅樓夢》既第二十三回（西廂記妙詞通戲語，牡丹亭艷曲警芳心）裏面講，林黛玉想去見賈寶玉，走到梨香院既牆角既時候，賈府戲班既十二個女仔喺度練習唱戲，林黛玉聽到佢哋唱《牡丹亭》既《驚夢》嗰段：「原來奼紫嫣紅開遍，似這般都付與斷井頹垣。良辰美景奈何天，賞心樂事誰家院。」就自歎，心想：「原來戲上也有好文章。可惜世人只知看戲，未必能領略這其中的趣味」、「則為你如花美眷，似水流年……」、「你在幽閨自憐」，佢既感覺係心動神搖、如醉如痴、站立不住。

杜麗娘既形象重點唔係佢既「死而復生」後既經歷，而係佢「因夢而亡」既體驗，呢點喺傳統戲曲好少見。而呢種「因夢而亡」既體驗係由一場「春夢」開始，蕩起咗杜麗娘既無限春心，呢種人類本能既情慾衝動、生理慾望既探討，一直係歷朝歷代既戲曲故事講得比較隱晦既。