楊雪盈

楊雪盈Clarisse Yeung1986年11月14號[1])係香港政治人物,第六屆灣仔區議會主席,灣仔大坑區議員,文化組織「香港文化監察」主席,「灣仔起步」創始成員。

簡歷

楊雪盈中學讀九龍文理書院,之後喺香港中文大學藝術系畢業,而家做緊中大專業進修學院文化管理系嘅兼任講師[2]

2014年雨遮革命期間,楊雪盈同其他藝術工作者發起「雨傘運動視覺文化庫存計劃」,將佔領區嘅藝術品做紀錄同保存。

2015年香港區議會選舉,楊雪盈參選大坑選區,對手係想接棒嘅新民黨王政芝,最終攞到1,398票,贏咗攞1,148票嘅王政芝[3]。雖然佢乘住雨遮革命個勢出選,但係當選之後多次話自己唔係「傘兵」, 因為促使佢參選嘅係東北發展事件,早過雨傘運動[4]

2016年,有中資地產商想喺大坑道重建一棟舊樓,同城規會申請話想拎埋隔離個綠化帶,用嚟起佢30層高豪宅嘅私家車道,諮詢期喺同年7月15號屆滿,但有居民發現諮詢期都未過,就已經有工程車喺嗰度搭嗮棚開工,重將個綠化帶既部分樹木斬嗮,嚟擺佢自己嘅建築材料。楊雪盈話,「未批先斬」嘅做法唔合理,亦都引來附近居民不滿,怕會立壞先例咁話:「犧牲公眾綠化地方,變為私人地方」,破壞嗮大坑原有綠油油嘅靚景。佢又話,原本棟舊樓有出入口直達銅鑼灣,依家為咗「墊高」住宅而要破壞綠化地帶嚟起私家車道,重將個出入口移到上大坑道70號嘅計劃唔理想,所以聯同南區區議員司馬文發起聯署,收集居民簽名去信反對[5][6]。同年12月,地產商撤回申請。但喺2017年,地產商將原本份申請改咗幾隻字之後再重新申請,楊雪盈今次夾埋立法會議員鄺俊宇羅冠聰一齊聯署,繼續收集市民簽名反對[7]

2019年第6屆香港區議會選舉,楊雪盈繼續响大坑選區尋求冧莊,結果攞到2340票,以907票之差鍊贏對手廖添誠(廖添誠攞到1433票,比四年前嘅王政芝多咗285票),成功連任。

參考

  1. 2015年香港區議會選舉:候選人楊雪盈簡介
  2. 兼任講師楊雪盈:新思維解決社區問題
  3. 政治素人楊雪盈:重點非佔領主打地區問題
  4. "眾新聞 | 戰友熱情減退漸離開 傘後新星楊雪盈:重新振作勿灰心". 眾新聞 (中文). 原著喺2019-12-24歸檔. 喺2019-12-24搵到.
  5. 申綠化地建私家車道 地產商未獲批先斬樹
  6. 中資進駐砍樹起豪宅 楊雪盈斥疑先斬後奏
  7. 中資大坑建豪宅再闖關 擬霸綠化地帶建車路

出面網頁