新民黨
新民黨（英文：New People's Party），係香港建制派政黨，響2011年1月9號成立，主席係葉劉淑儀。
新民黨 | |
| 主席 | 葉劉淑儀 |
| 創立 | 2011年1月9號 |
| 總部 | 香港島灣仔軒尼詩道139號中國海外大廈11樓 |
| 象徵顏色 | 藍、粉紅 |
| 立法會議席 | 5 / 90
|
| 區議會議席 | 0 / 479
|
| 意識形態 | 保守主義 |
| 網站 | npp.org.hk |
歷史
編輯2011年1月9號，新民黨正式成立，創黨黨員有266人，主要成員有葉劉淑儀、田北辰、史泰祖、陳岳鵬、黃楚峰、余衍深、屈奇安等。佢哋定位自己做代表中產利益同公務員利益嘅政黨。
2011年區議會選舉，新民黨派12人出選，結果4個人當選。之後有多個區議員都加入咗新民黨。
2012年頭，黃錢其濂加入新民黨，同年9月，葉劉淑儀同田北辰分別帶隊出選第5屆香港立法會選舉香港島同新界西嘅地區直選，兩人雙雙當選。
2014年，史泰祖退黨。同一年2月12號，新民黨同公民力量（有「沙田執政黨」之稱）結盟，除咗立法會議員林大輝同區議員龐愛蘭（新論壇成員）冇跟住加入之外，其餘19位區議員（包括潘國山、何厚祥、黃宇翰、黃澤標、李錦明、姚嘉俊、陳敏娟、陳國添、林松茵、鄧永昌、羅光強、楊倩紅、梁家輝、何國華、黃嘉榮、譚領律、溫悅昌、區能發、何觀順）都加入新民黨，與此同時，潘國山開始成為新民黨副主席。
2015年，趙哲妤、鄭承隆、陳嘉華先後退出新民黨。同年，新民黨派42人出選第5屆香港區議會選舉，結果有26人當選。新民黨喺好多地區都有突破，好似離島區噉。但係加盟嘅公民力量區議員就損失唔少，喺沙田區就有七個區議員落馬，包括楊倩紅（沙角選區）、陳國添（博康選區）、黃澤標（翠田選區）、何國華（徑口選區）、李錦明（翠嘉選區）、鄧永昌（松田選區）同埋羅光強（富龍選區），區議會議席比結盟後少5席。
2016年，新民黨派出葉劉淑儀、田北辰、容海恩分別帶隊出選第6屆香港立法會選舉嘅香港島、新界西、新界東地區直選，結果全部當選。選舉之後，兩個連任嘅議員各有進一步打算。葉劉淑儀多次喺公眾場合或明或暗講話想選特首。至於田北辰就打算競選立法會主席，不過同黨嘅葉劉淑儀冇支持佢，最終田北辰出選唔成，梁君彥就喺建制派拱照之下成為立法會主席。有傳田二少、葉太兩人因為噉而不和，甚至傳出田北辰會喺第5屆香港行政長官選舉之後退黨。同時新民黨打算叫謝偉俊加盟，準備交棒。
2016年12月15號，葉劉淑儀正式宣佈參選特首，但喺民調入面，佢一直係「包尾大班」，係民望最低嘅一個主流特首參選人。自從林鄭月娥參選之後，就連一啲支持開佢嘅選委都轉軚，例如：去過葉劉淑儀參選大會、新民黨顧問兼選委嘅盛智文就去咗支持林鄭月娥。結果葉劉淑儀喺2017年3月1號，宣布放棄第5屆香港行政長官選舉嘅競選工程。
2017年4月10號，田北辰宣佈同6個新界西區議員一齊退出新民黨，證實咗上年尾嘅傳聞。田北辰話佢同黨內另一個領袖葉劉淑儀有分岐係退出嘅主因[1][2]。其後，田北辰另起爐灶，成立咗實政圓桌。
2017年6月20號，容海恩順利當選新民黨副主席，成功填補田二少遺留嘅新民黨副主席空缺[3]，冇幾耐，已經冧莊新民黨主席嘅葉劉淑儀亦重新成為行政會議成員。2018年，黎棟國、韓世灝同時成為新民黨副主席。
2019年，新一屆嘅區議會選舉在即，但係區議員方面有啲人選擇退黨，繼黃宇翰喺2018年11月因為對馬料水填海立場同黨唔同而退黨，同區嘅林松茵同元朗區王威信都相繼退黨（王威信同黨友郭靜然已經過檔經民聯），令區議員數目由19席跌到16席。但係與此同時，葉劉淑儀希望挑戰區議會議席，據聞佢會落戶區議會「十朝元老」蘇炤成嘅三聖區去接佢棒，劍指2020年立法會選舉嘅超級區議會議席，結果葉太亦都冇去選。
到2019年6月，政府推動逃犯條例修訂草案，引發軒然大波，身兼行會成員嘅葉劉淑儀，因為成日代表政府同公眾推銷條例，兼且態度強硬，民望插水。同時黨裏頭嘅退黨潮持續，喺修例引發大型反修例運動之後，西貢區譚領律、灣仔區李文龍同元朗區黃卓健先後「跳船」退黨，新民黨議席由16席跌到得返13席，連選超級區議會嘅門檻都唔過。喺第6屆香港區議會選舉，新民黨雖然得票比四年前多，但佢哋同公民力量全軍覆沒，係輸得最慘嘅建制派政黨，外間形容係「（身）亡黨」。
由於2020年立法會選舉戰況將會好激烈，新民黨於是引入初選機制，但係初選會開放畀非新民黨嘅人參選。當時已經預計，初選設立嘅目的，係為咗做低容海恩，並且捧自由黨嘅李梓敬上位，皆因容海恩喺呢四年嘅表現乏善可陳，葉劉同容海恩嘅關係亦都唔算好。而李梓敬後來真係走咗去參加初選，更加想以自由黨+新民黨雙牌頭參選，不過自由黨嘅鍾國斌話佢唔尊重個黨，研究要踢佢出黨，但係李梓敬快一步，自己退黨先，全心全意參加新民黨嘅初選。呢個時候，容海恩就宣佈佢退出新民黨嘅初選，佢形容呢個機制似係為「某啲人」度身訂造，又講李梓敬呢排言論越嚟越激進，同新民黨格格不入。葉劉淑儀就隔空反擊話機制冇做馬，又話「以為我一定欽點佢？」
2021年第7屆香港立法會選舉，新民黨派6人參選，當中廖添誠、葉劉淑儀、李梓敬參選香港島東選區、香港島西選區、新界東北選區地區直選，容海恩、陳家珮、黎棟國就參選選舉委員會界別，結果除咗廖添誠之外，佢哋全部當選。
區議會議員（2020-2023年）
編輯新民黨喺呢屆區議會輸到1席都冇。
選舉成績
編輯立法會
編輯| 選舉 | 民選票數 | 得票率 | 總議席 | 領袖 |
| 2012 | 68,097 | 3.76% | 2 / 70
|
葉劉淑儀 |
| 2016 | 167,589 | 7.61% | 3 / 70
|
葉劉淑儀 |
區議會
編輯| 選舉 | 得票 | 得票率 | 總議席 | 領袖 |
| 2011 | 15,568 | 1.32% | 4 / 507
|
葉劉淑儀 |
| 2015 | 75,793 | 5.17% | 26 / 458
|
葉劉淑儀 |
| 2019 | 79,975 | 2.73% | 0 / 479
|
葉劉淑儀 |
政治立場
編輯新民黨係香港親中派一員，主席葉劉淑儀自2012年起做埋行政會議成員。
否認新疆種族滅絕
編輯新疆維吾爾族人受到中共嘅大清洗，受到迫害、強迫勞動、宗教歧視等議題，喺2014年起開始受到關注。而美國兩任國務卿蓬佩奧同布林肯，都將中國針對新疆維吾爾族嘅行為定義為「種族滅絕」。不過，新民黨有唔少成員，包括葉劉淑儀、李梓敬同潘國山，都曾經否認新疆種族滅絕。
葉劉淑儀曾經喺Twitter引中國女星迪麗熱巴作例子，質疑呢個說法。另外，喺2021年2月，葉劉淑儀訪問網上群組Save HK嘅創辦人，就再質疑指控無證據[4][5]。葉劉淑儀喺Twitter嘅言論，當時就受到唔少外媒嘅批評同質疑[6][7]。
另外，國際社會因為中共對新疆作出種族清洗嘅行為，對中國進行制裁，有啲時裝品牌亦宣布唔再用新疆棉，引起咗唔細嘅風波。葉劉淑儀亦隨即表態支持新疆棉花[8]，李梓敬同潘國山亦曾經公開狙擊停用新疆棉嘅H&M，當時潘國山仲著住Nike（另一個表明停用新疆棉嘅品牌）嘅波鞋，李梓敬亦否認新疆有強制勞動同埋種族滅絕嘅情況[9][10]。
參考資料
編輯- ↑ 田北辰宣布退出新民黨 稱與葉劉理念有分歧 互聯網檔案館嘅歸檔，歸檔日期2017年5月14號，.，東方報業集團網站，2017-04-10
- ↑ 田北辰：身份獨立後能暢所欲言 互聯網檔案館嘅歸檔，歸檔日期2017年4月16號，.，now新聞，2017-04-10
- ↑ 政情：傻大姐容海恩 做新民黨副主席，東方日報，2017-06-21
- ↑ 〈接受葉劉訪問 Save HK 創辦人：新疆沒種族滅絕、少數民族人權比中國人更好 | 立場報道 | 立場新聞〉。《立場新聞 Stand News》 (英文)。原先內容歸檔喺2021-02-25。喺2021-03-28搵到。
- ↑ 〈信報即時新聞 -- 葉劉引廸麗熱巴質疑新疆種族滅絕說法〉。《信報即時新聞》。原先內容歸檔喺2021-03-30。喺2021-03-28搵到。
- ↑ 〈接受葉劉訪問 Save HK 創辦人：新疆沒種族滅絕、少數民族人權比中國人更好 | 立場報道 | 立場新聞〉。《立場新聞 Stand News》 (英文)。原先內容歸檔喺2021-02-25。喺2021-03-28搵到。
- ↑ 〈【Emily】葉劉提新疆紅星駁種族滅絕論 外媒記者紛狠批：卑鄙嘅推文 - 20210129 - 港聞〉。《明報新聞網 - 每日明報 daily news》 (繁體中文)。喺2021-03-28搵到。
- ↑ 陳綽嵐 (2021-03-26)。〈新疆棉花｜葉劉淑儀fb曬Burberry經典格紋頸巾 稱將停用品牌產品〉。《香港01》 (香港中文)。原先內容歸檔喺2021-03-29。喺2021-03-28搵到。
- ↑ 〈天下圍中︱李梓敬踩場促H&M道歉 同場潘國山穿Nike鞋 ｜ 蘋果日報〉。《Apple Daily 蘋果日報》 (香港中文)。原著喺2021-03-27歸檔。喺2021-03-28搵到。
- ↑ 〈【新疆棉風波】公民力量到H&M抗議 李梓敬稱產品質素低劣、白色內衣「著幾次就黃」 | 獨媒報導〉。《香港獨立媒體網》。原先內容歸檔喺2021-03-27。喺2021-03-28搵到。