概念混成理論

概念混成（粵拼：koi3 lim6 wan6 sing4；英文：conceptual blending）係一套用嚟解釋「新計仔係點樣出現」嘅認知科學理論。呢套理論最根本嘅諗法係，有創意嘅諗頭嘅一大來源係所謂嘅概念混成－即係唔同嘅概念（或者諗法）以某啲特定嘅方式結合埋一齊，而進階嘅概念混成理論仲會剖析「唔同嘅概念可以透過啲乜方式結合」等嘅問題。

喺概念混成理論當中，諗法可以由第啲諗法度「砌出嚟」，而諗法嘅結合係創意嘅一大來源。

舉個簡化嘅例子，好似係英文入面嘅 earring（耳環）呢隻字噉。古英文經已有 earring 呢隻字，而語源學研究指，隻字係 ear（耳仔）同埋 hring（環狀物體）呢兩隻字嘅結合－兩隻舊有嘅字（一隻字係一個概念）結合埋一齊，產生咗 earring 呢隻新嘅字。好似噉嘅例子顯示，新嘅諗法好多時都係嚟自舊有諗法嘅結合，而概念混成理論就有對「啲諗法係點結合嘅」詳細著墨。

概念混成喺認知心理學以至人工智能（AI）上都受到關注：概念混成理論嘅研究者會做心理實驗，睇吓諗法喺人腦裏面可以以咩方式結合，嘗試從而解釋創意呢種認知現象；AI 方面嘅工作者又有興趣用電腦程式嚟模擬人腦入面嘅概念混成，想靠噉達致教電腦展示好似人噉嘅創意。

基本模型

睇埋：創意同概念

概念混成理論源自 1993 年。根據呢套理論，無論係藝術定科學同工程，新計仔其中一個最緊要嘅來源係所謂嘅概念混成過程－將唔同嘅概念結合組成新嘅概念。最基本嘅概念混成如下：

• 想像人腦入面有個概念結合網絡（conceptual integration network），一個噉嘅網絡由四嚿元件組成－
  • 兩個有某啲關係（例如係咁啱一齊出現）嘅 input 空間，Input space 1 同 Input space 2；
  • 一個通用空間（Generic space），包含所有空間嘅共有結構；
  • 一個混成空間（Blended space），由兩個 input 空間同通用空間嘅嘢結合成嘅諗頭。呢個新諗頭可能會有 input 唔具有嘅特性，例如由新諗頭度推想出嚟嘅內容，或者第啲類型嘅闡述；

  

• 舉個例說明，想像有一位外科醫生幫個病人開刀，呢位外科醫生技術唔掂搞到個病人死咗；跟住有個人為咗鬧呢位醫生打咗個比喻，話佢「似個屠夫多過似個外科醫生」－
  • 通用空間入面有「郁手做嘢嘅人」、「利器」同埋「有個個體俾人劏開，死咗」噉嘅多個概念；
  • Input space 1 係外科醫生（郁手做嘢嘅人）、手術刀（利器）同病人（俾人劏開，死咗）；
  • Input space 2 係屠夫（郁手做嘢嘅人）、菜刀（利器）同牲畜（俾人劏開，死咗）；
  • 混成空間將兩個概念溝埋一齊，最後出咗句攞嚟鬧嗰位醫生嘅比喻。

概念混成理論指出，噉嘅過程係創意以至文化演變嘅一大源頭：好多時人响諗嘢嗰陣，都會（例如）發覺某啲已知嘅概念之間有某啲共通點，跟住佢哋嘅腦會做概念混成，砌出新嘅諗頭－簡單嘅有好似上述例子噉嘅話語；如是者，隨住一個文化內部嘅諗頭互相碰撞，就會係噉產生新嘅諗頭。

進階機制

進階嘅概念混成理論仲有講到「唔同嘅概念可以透過多種唔同方式嚟混成」噉嘅諗法。

睇埋

• 創意
• 橋段
• 迷因
• 文化進化
• 神經網絡
• 語義網絡

文獻

• Boden, M. A. (2004). The Creative Mind: Myths and Mechanisms. London: Routledge.
• Eppe, M., Maclean, E., Confalonieri, R., Kutz, O., Schorlemmer, M., Plaza, E., & Kühnberger, K. U. (2018). A computational framework for conceptual blending. Artificial Intelligence, 256, 105-129.
• Wiggins, G. A. (2006). A preliminary framework for description, analysis and comparison of creative systems. Knowledge-Based Systems, 19(7), 449-458.