機場南站

  提示：呢篇文講嘅唔係機場站。

機場南站（粵拼：gei1 coeng4 naam4 zaam6；英文：Airport South Station），規劃嗌過新國際機場站san1 gwok3 zai3 gei1 coeng4 zaam6（Baiyun International Airport Station），係廣州地鐵3號綫嘅車站，2010年10月30號開放，位置喺花都區白雲國際機場1號航站樓大廳入面。

機場南（1號航站樓） Airport South (Terminal 1)
File:Airport S. Station WORD.jpg
機場南站嘅站名
概覽
冧巴	329
位置	花都區白雲國際機場一號航站樓大廳入面
座標	23°23′10.52″N 113°18′10.45″E
車站色
經過路線	3
啟站	2010年10月30號
月台數	2
站口數	2（實質冇獨立出入口）
營運資訊
車站服務時間	06:05～23:42
列車服務時間	06:10～23:37
廣州地鐵3號綫 海傍　◄高增 （3.6km） （1.2km）機場北►　總站

地鐵方初期考慮到有好多人帶住行李去白雲機場搭飛機而整咗闊閘機出嚟。曾經喺2010年10月30號到2016年2月4號間係廣州地鐵唯一有闊閘機嘅車站。2016年2月5號，由於二維碼入閘坐車嘅方便性大大增加，加上亦喺客流大嘅車站整咗帶嘟二維碼出入閘啲闊閘機功能，所以闊閘機已經推廣到廣州地鐵系統部分啲大客流車站入面，唔再限制喺呢個站出現。

另外，喺廣州地鐵（除APM外）同佛山地鐵是旦一個站啲路線牌，都有寫到呢個站附近係白雲機場嘅1號航站樓。

佢曾經從2010年10月30號開放到2017年12月27號為止做過廣州最北邊嘅車站，亦曾經喺2010年10月30號到2018年4月25號為止做過廣州地鐵3號綫嘅北邊總站。

結構

樓層

呢個站一共有2層樓嘅地下區域。其中地面係站廳，地下一樓係3號綫嘅月台。同大多數嘅3號綫車站一樣，站廳嘅免費區入面有整到休息室同廁所，佢重係3號綫唯一兩個有休息室嘅車站（重有個喺機場北嗰邊）。而廁所喺站廳免費區西南角近住時光隧道隔籬。

由於呢個站用咗側式月台設計。若果乘客揀錯咗月臺去坐車嘅話，要返上去一層樓再重新揀過。

打掂

地面 大堂		廣州白雲國際機場一號航站樓
地下 １樓	站廳	售票機、客服中心、車站警務室、地鐵安檢設施
		詢問處、機場排爆安檢處、機場人行通道（免費區）
地下 ２樓	側式月台，開右邊門
	2月台	← 3號綫列車去機場北站（行機場北嗰邊）
	1月台	3號綫 列車去高增站（行海傍嗰邊）→
	側式月台，開右邊門

打橫

機場南站嘅東站廳

機場南站嘅西月台

柱上啲字

站廳

機場南站嘅站廳全景

北邊嗰個（喺2014年11月6號影），其中右邊嘅「禁止入場」撈稿喺2018年4月26號凌晨已經改成行機場北嗰邊啲信息。

呢個站嘅站廳喺廣州白雲國際機場嘅1號航站樓出發廳嘅地下1樓，喺2000年起緊白雲國際機場（花都嗰間）嗰陣就事先留低咗起地鐵站嘅位出嚟。而收費區喺站廳嘅南北兩邊，中間係機場嘅人行通道，而站廳嘅收費區有好多座扶手電梯、專用𨋢同樓梯同月台接埋一齊。

月台

機場南站嘅月台全景

行機場北嗰邊（喺2014年11月6號影）

呢個站有兩個側式月台，喺廣州白雲國際機場嘅1號航站樓地底。

另外，喺車站北邊有條交叉渡綫響度。從2010年10月25號嘅3號綫北延段通車營運直到2018年4月13號晚黑尾班車到站收車為止，啲車到呢個站喺2月台攆嗮客走之後，跟住入嗮渡綫，之後返轉頭到1月台附近上客。喺早晚高峰之後同尾班車到站收車嗰時，啲車喺2月台攆嗮客走之後會退出服務，之後返到1月台嗰邊唔搭客而直接開出，中途猛咁飛站直達嘉禾車輛段，屆時1會有廣播話唔畀上車。

2018年4月14號，因機場北站附近嘅二號航站樓開始搞營運前演練同調試，冚唪唥啲車除突發情況外，其它時間都唔再喺北邊條存車綫調頭，而係直接去到機場北站為止，但列車到呢個站後重係要攆客走直到2018年4月25號嗰日尾班車收車為止。從2018年4月26號頭班車開始，因3號綫繼續向北延長多一個站，車站亦降級成中途站，原先喺呢個站嘅2月台電視入面寫住嘅「請勿上車」字樣亦冚唪唥刪嗮；連站廳連接2月台啲禁止符號標記同埋指定單向入站導航亦改成通去機場北站同埋雙向入站啲指示標記。

商舖同自助服務

由於呢個站唔係廣州市區嘅車站，所以喺車站入面搵唔到半間商舖響度，因為佢哋都喺嗮站廳免費區嘅機場大樓入面。但係車站入面有好多自助服務設施畀乘客用，包括咗自動櫃員機、自動販賣機、自動影相機等；重有可以充羊城通，可以交水電費同交通罰錢嘅嘢。

自助服務 自助影相機 自動販賣機 民生銀行自動櫃員機 好易（Hotye）多媒體自助服務終端

出入口

機場南站嘅兩個出入口

呢個站凈係得2個出入口，但佢哋都係直接整喺廣州白雲國際機場嘅一號航站樓大廳嘅地底，所以唔似其它普通車站噉整個單獨通道嘅出入口，而係乘客通過扶梯同𨋢嚟出站，不過出咗閘之後就可以直接到達航站樓嘅地面1樓嚟接駁航空同埋地鐵。而呢兩個出口都係面對面噉喺機場航站樓嘅中間度。

從開通以嚟，由於要配合機場嘅安檢措施，乘客喺呢個站出站後，必須要經由機場方整嘅防爆安檢區嚟配合機場嘅安檢措施。

頭尾班車信息同配線圖

配線圖
█ 3號綫 ▲機場北站
▼高增站

行去邊頭	頭班車	尾班車
每日
3號綫
體育西路站	06:10	23:00
機場北站	06:15	23:37
注意： 喺晚黑最後一班車開走之前嗰5分鐘之內， 係唔畀入閘坐車（包括埋買車飛）。

車站歷史

規劃

喺1997年嘅《廣州市城市快速軌道交通線網規劃研究（最終報告）》入面就確定咗喺廣州白雲國際機場（2004年起嘅呢間）嗰邊整咗個站係2號綫嘅終點站，嗰時係嗌「新國際機場站」嘅名。後嚟喺2000年嘅近期線網規劃調整方案入面將2號綫縮短到嘉禾而另外規劃咗一條新嘅機場快綫去到呢度。由於新機場起咗兩個航站樓，就整咗兩個機場嘅站出嚟，而呢個站就順便改咗名嗌「機場南站」（重有一個機場嘅站係機場北站）。而2003年嘅規劃方案入面，機場快綫改成係3號綫嘅一部份。

施工

2006年7月2號，嗰時廣州白雲國際機場一號航站樓嘅出發大廳中庭入面，有事先留低咗起地鐵站（下）嘅位。

機場南站開工嗰陣同埋一號航站樓一齊起，期間機場好快喺2004年8月25號啟用，而地下一樓亦事先留正嚟起地鐵站。廣州地鐵方喺2008年喐手起3號綫北延段時，用咗機場事先留正嘅結構而搞，直到2010年底完工兼通過驗收。

開通

2010年11月30號晏晝，因3號綫北延段開通，原先地下一樓嘅地鐵站預留區域亦同步開放。開通之後曾經一度淪落成為機場特殊收費段，令出入站啲乘客要喺行程收費嘅票價基礎上加收CNY￥5嘅機場特別費。後嚟物價局考慮到市民嘅出行經濟而喺2011年10月31號先至宣佈，將實行咗336日嘅機場特別費取消咗。

2018年4月14號，受到白雲機場二號航站樓搞開通前大演練嘅影響，呢個站雖然降級成中途站，但嗰時喺呢個站入站去機場北落車啲人必須要係地鐵工作人員、機場內部工作人員、特警同埋媒體記者、安保人員、空姐、機場醫護人員呢七種人士範圍內（要畀有效相關證件）先至畀上車。呢種制度直到同年月25號晚黑最後一班車收車為止。

2018年4月26號頭班車開出之後，由於機場北站正式向公眾對外開放，呢個站亦降級成中途站。

搞唔清係邊個航站樓？

2018年3月29號，廣州市民政局開始向全社會徵集14號綫主綫及21號綫啲站名時，有好多人反映到呢個站嘅站名唔知係講緊邊隻航站樓。地鐵方考慮到噉嘅事之後，同年4月11號先至決定喺廣州地鐵冚唪唥啲路線牌凡係帶「機場」字樣啲站，加咗「（1號航站樓）」、「（2號航站樓）」啲字樣嚟搞清楚係邊隻航站樓。

利用狀況

由於廣州地鐵3號線唔係白雲國際機場嘅唯一交通工具，而機場出面重有好多嘅地面公共交通服務。由於機場嘅設計原因，所以來往機場出發同埋到達都唔係好方便。重有3號綫凈係普通嘅地鐵綫，所以重有好多嘅乘客繼續搭機場快線同埋其它地面交通到市區，而呢個站客流麻麻地。後嚟喺2011年10月31號取消咗機場特別費之後，客流先至稍微有上升嘅趨勢。

2018年4月26號，由於機場北站正式開通，原先去機場啲客流又再分流到機場北站嗰邊上落。

周邊

喺白雲機場入面嘅詢問區

喺機場1號航站樓嘅出站大廳跟住入去地鐵站嘅話，同地鐵1號綫轉6號綫差唔多，大概凈係要3～5分鐘，而乘客一出咗站之後坐一層樓嘅𨋢就可以去到機場入面嘅商業圈。嗰度有好多檔次嘅餐飲檔、衫褲檔，重有萬寧、電影院仔、書吧、化妝舖、䤵髮舖同茶苑等呢啲休息娛樂嘅場所。

另外，機場1號航站樓附近重有鉑爾曼大酒店響度。

出站注意事項

喺呢個站出站到白雲機場搭飛機啲乘客，機票寫嘅都係去「1號航站樓」或「T1航站樓」呢啲字樣，屆時要睇清楚機票寫嘅係去邊個航站樓再去指定航站樓嘅車站落車。若果喺準備搭飛機之前唔小心出錯航站樓嘅車站嘅話，都會有免費列車接駁，但必須要入去免費通道先至得。

呢啲免費通道凈畀往返機場南同機場北兩站之間用途，否則按搭霸王車處理。

文化裝飾

車站嘅文化牆。喺2016年夏天之前係睇唔到嘅。

2014年4月10號，廣州地鐵入面嘅6個車站會再繼續添加「文化牆」嘅裝飾，當中就包括咗呢個站。而呢個站添加文化牆嘅理由係：呢個車站係廣州入面，最重要嘅門戶同埋交通樞紐嘅車站，重要係畀嗮全體人對廣州入面嘅第一印象。而文化牆喺2016年國慶整好。

佢嘅主題係「盛·迎」。背景係廣州市花——木棉花，重加咗好多全球唔同國家嘅問候語言，充分體驗咗廣州喜迎四面八方啲人嘅花城形象。

註同攷

註

攷

上一站·下一站

上一站⇚⇚　　　　廣州地鐵　　　　⇛⇛下一站
高增站 海傍站←	機場南站 3號綫	機場北站 →總站
註：機場南同機場北兩站之間係免費往返。