檸檬咖啡

檸檬咖啡（Lemon coffee），係香港茶餐廳發明嘅嘢飲簡稱檸啡，將檸檬片放落齋啡度，原理同檸茶一樣。同其他地區嘅檸檬咖啡唔同嘅係：檸檬喺檸啡入面嘅作用唔淨只係用來帶起味道或調味，而係直接丟入杯齋啡入面，畀檸檬嘅味道同咖啡嘅味道混和。

熱檸檬咖啡

一杯喺茶餐廳叫嘅凍檸啡

種類

港式檸檬咖啡

港式檸檬咖啡係香港茶餐廳嘅飲品，被譽為「草根名物」。將多片檸檬片直接投入未加奶嘅咖啡入面。同其他地方嘅檸檬咖啡唔同嘅係，香港嘅檸檬並唔係只係用嚟帶起味道或調味，而係直接投入未加奶嘅咖啡內，令檸檬嘅味道同咖啡嘅味道混合。呢種飲品亦隨住時間傳到澳門，而用嘅咖啡亦改咗有澳門特色嘅瓦煲咖啡。

羅馬濃縮咖啡

羅馬濃縮咖啡（EspressoRomano）係一種喺杯邊放塊檸檬嘅濃縮咖啡，意大利發明，檸檬汁會沿住杯落到咖啡內，以突出咖啡嘅甜味。亦會直接將檸檬放入咖啡入面。佢個名「羅馬」係因為傳說話係古羅馬嘅飲法，但呢個並冇記載。呢種咖啡可能係美國或者法國發明嘅，喺一戰二戰左右義大利太窮，只可以飲劣質咖啡，所以要檸檬加糖調味。中文世界有別名「西西里咖啡」，但呢個名冇歷史地理嘅意義，西西里當地唔興檸檬咖啡。

檸檬卡布奇諾

卡布奇諾係一種意大利咖啡，上面有奶泡，有種飲法係灑上檸檬皮喺奶泡上面，令咖啡帶檸味。

減肥檸檬咖啡

一種將檸檬或其他柑橘屬切片後同咖啡一齊煮嘅食療飲品，有燒脂嘅功效。

睇埋

• 檸樂煲薑
• 檸檬七喜
• 檸檬茶
• 檸檬水
• 檸檬利賓納
• 瓜達拉哈拉咖啡（Café Guadalajarense），將青檸加入咖啡，墨西哥瓜達拉哈拉發明。