死神聖物

死神聖物（英文：Deathly Hallows），係J·K·羅琳嘅奇幻小說《哈利波特》系列入面嘅三件魔法物品，分別係接骨木魔杖、重生石同埋隱形斗篷。據講當一個人同時擁有三件死神聖物果陣時，佢就能夠主宰死亡。死神聖物由第一輯《神秘的魔法石》起就開始陸續出現，但呢個詞彙直到第七輯《死神的聖物》先至被提及，對於故事有承先啟後嘅重要作用。

死神聖物的符號：三角代表隱形斗篷、圓形代表重生石、中間的直線則代表接骨木魔杖

死神聖物通常作為巫師童話《三兄弟的故事》嘅一部分嚟被人記住，仲隨住時間嘅推進而變咗做神話，但係包括鄧不利多在內嘅少數巫師都相信佢哋嘅存在仲持續去搵。根據羅琳嘅講法，死神聖物誕生嘅故事係以傑弗里·喬叟嘅《赦免者的故事》嚟做基礎。

靈感

嗰個系列嘅作者J·K·羅琳喺紀錄片《哈利波特：魔法史》入面講到，以前佢睇電影《霸王鐵金剛》嗰陣，戲裡面成日出現嘅共濟會符號令佢印象深刻，呢個符號可能影響咗佢設計嘅死神聖物標誌，羅琳話：「佢哋喺潛意識嘅某個角落的確係有關聯」。

背景

《吟遊詩人皮陀故事集》裡面嘅《三兄弟的故事》講述咗三個巫師兄弟出去旅行，喺經過成日有人浸死嘅一條河邊嗰陣施展魔法變出一條橋嚟過河，引嚟咗好嬲嘅死神現身，但係狡猾嘅死神假扮祝賀三兄弟，讚佢哋法力高強，仲話要一人送一份禮物俾佢哋。好大喜功嘅大佬要求一支世界上最犀利嘅魔杖，死神行到去河邊一棵接骨木隔離，用吊住落嚟嘅樹枝整咗支魔杖交俾大佬；生性傲慢嘅二佬要求死神俾佢叫返死者返嚟嘅權力，於是死神喺河邊執起一塊石頭交俾二佬，話佢知呢塊石頭有起死回生嘅力量；最後，死神問三佬想要乜嘢嗰陣時，唔信任死神嘅細佬要求一件令佢喺離開呢個地方之後，唔洗擔心死神跟蹤嘅寶物，死神唯有好唔情願咁交咗自己身上嘅隱形斗篷出嚟（戲裡面係將隱形斗篷分咗一部份俾佢）。三兄弟分道揚鑣之後，大佬因為接骨木魔杖嘅威力引人妒忌，俾小偷割喉暗殺仲偷走支魔杖。二佬將佢已經死咗嘅情人起死回生，但係佢並唔係真係返生，而係徘徊喺生死之間嘅矛盾狀態，二佬失望又痛苦咁自殺殉情。三弟靠住隱形斗篷嚟避過死神，直到老死之前將斗篷交俾個仔，先至以老朋友嘅姿態告別人世。

由於這個故事，巫師通常將接骨木魔杖、重生石同埋隱形斗篷睇成做死神的聖物，傳說集齊呢三件聖物就可以主宰死亡，千百年來有無數嘅追尋者因為咁而查探呢三件聖物嘅下落。鄧不利多同埋贊諾·羅古德Xenophilius Lovegood佢哋認為死神聖物並唔係真正嘅死神法寶，而係三個傑出嘅巫師兄弟所製造出嚟嘅魔法物品，製造出死神聖物嘅三兄弟普遍被認為就係古老嘅皮福雷三兄弟Peverell brothers。死神聖物嘅符號分別用直線代表接骨木魔杖；圓形代表重生石；而隱形斗篷就用三角形嚟代表。呢三個圖型組成嘅符號俾黑巫師蓋勒·葛林戴華德引用嚟代表佢自己嘅標記。好似維克多·喀浪咁樣嘅好多巫師就係咁樣誤以為嗰個係黑魔法嘅象徵。

鄧不利多一直喺度搵緊死神聖物，最初據講佢哋被賦予嘅力量，鄧不利多喺後生嗰時係葛林戴華德嘅朋友，但後嚟為咗掹返轉頭佢阿妹意外死咗嘅手段而反面。佢最後得出嘅結論係佢「唔配」擁有佢哋。鄧不利多認為哈利可以成為一個更「值得嘅」保管者，但亦都擔心哈利會俾佢哋嘅力量迷住咗，因為咁就用迂迴嘅方式嚟引導哈利搵到佢哋。

據講傳說中嘅嗰支魔杖擁有無與倫比嘅力量。由於佛地魔之前嘅魔杖殺唔死哈利·波特，所以佛地魔一直喺度搵嗰支魔杖。佢無意識到嗰支魔杖本嚟就係三件死神聖物之一，亦都無去搵另外嗰兩件死神聖物。佢擁有咗重生石，但淨係將佢用嚟做分靈體。鄧不利多話就算佛地魔知道佢哋嘅存在，佢都懷疑佛地魔會唔會對隱形斗篷同重生石有興趣。

哈利最後都得到晒全部三件死神聖物。不過，哈利之所以能夠喺《死神的聖物》避過索命咒，並唔係因為佢有死神聖物，而係因為佛地魔用咗哈利嘅血嚟重塑自己嘅身體，俾佢哋共同得到哈利阿媽莉莉·伊凡留低嘅保護咒，再加上哈利同時亦都成為咗擁有佛地魔部分靈魂嘅分靈體。呢次索命咒亦都成功咁消滅咗哈利身體裡面嘅佛地魔靈魂碎片。

接骨木魔杖

接骨木魔杖

接骨木魔杖Elder Wand，喺魔法史上面又叫做死神魔杖The Deathstick，或者係命運之杖Wand of Destiny。呢個係一支用騎士墮鬼馬Thestral嘅尾羽毛嚟做杖芯去整成15英吋長嘅接骨木魔杖，呢支係一種傳說中擁有極強力量嘅魔杖。呢個係三件死神聖物入面流傳得最廣同埋最多相關消息嘅一件，好多魔法界出名嘅決鬥入面嘅魔杖都係佢，甚至唔知道死亡聖物嘅魔法界中人都曾經聽聞過呢支魔杖嘅存在。

接骨木魔杖好多次喺唔同巫師之間轉手，而擁有豐富的知識同極強大法力嘅人尤其適合，因為咁就完成到一啲常人好難做到嘅魔法（可以完美咁復修到哈利斷成兩截嘅冬青木魔杖）。經過咗一連串爭奪魔杖嘅鬥爭之後，接骨木魔杖喺近代由穆齊夫·葛果羅威Mykew Gregorovitch嗰度落入去黑巫師蓋勒·葛林戴華德嘅手上，直到鄧不利多喺1945年嘅決鬥入面打低佢之後先至取而代之。

根據魔法世界嘅民間傳說，巫師只能夠殺死魔杖嘅前任主人嚟贏得魔杖嘅效忠，因為咁佢嘅「血跡已經濺滿喺巫師世界歷史嘅書頁上面」，令佢成為最容易被驗證係真正存在嘅死神聖物。不過，哈利·波特喺奧利凡德先生Mr. Ollivander嗰度發現啲魔杖製造者認為主流嘅理解並唔啱嘅：接骨木魔杖實際上會喺佢嘅前任主人被打低或者解除武裝嗰陣時將忠誠轉移（唔一定係殺死佢嘅前任主人），如果唔係佢就永遠唔完全對新主人效忠。呢支魔杖就好似所有魔杖咁都有一定感知能力，唔容許自己傷害自己真正嘅主人。如果魔杖嘅主人喺未被擊敗，又或解除武裝嘅情況下自然死亡，由於接骨木魔杖從來都無被打贏，所以佢嘅特殊力量唔會隨住主人嘅逝去而消失。

鄧不利多都估到佛地魔會去搵佢嚟付哈利，所以提前做咗啲舖排。鄧不利多同石內卜夾埋令到佢睇起上嚟係被謀殺，因為佢係自願接受死亡而唔係被打贏，咁樣一嚟可以俾魔杖因為無繼承人而消失法力。跩哥·馬份按照佢哋預計喺占星塔搵到鄧不利多仲施展繳械咒嚟偷襲，令到接骨木魔杖嘅擁有權落咗去跩哥身上（雖然跩哥完全唔知道自己做咗接骨木魔杖嘅主人）。接骨木魔杖後來被埋喺鄧不利多嘅墳墓裡面，但馬份做咗接骨木魔杖嘅新主人。後嚟哈利喺馬份莊園搶走咗跩哥·馬份手上嘅三支魔杖，搞到接骨木魔杖嘅擁有權跟住馬份原有嘅山楂木魔杖一齊轉移去到哈利身上；另外亦有一種講法係哈利喺跩哥·馬份對鄧不利多施展咗繳械咒之後，佢又對馬份用咗繳械咒，於是接骨木魔杖嘅擁有權就傳到去哈利身上。當佛地魔喺禁忌森林對哈利用接骨木魔杖施展索命咒去殺哈利嗰陣，佢淨係殺死咗「佢自己附喺哈利身上嘅部分靈魂」；所以去最終決戰嗰陣時，佛地魔因為俾繳械咒嘅反彈同時喪失所有分靈體嘅保護而當場死咗。

哈利喺小說嘅最後決定一世都唔再用接骨木魔杖，任由佢喺自己死咗之後喪失法力，仲將佢埋返去鄧不利多嘅墳墓入面。哈利喺戲裡面將接骨木魔杖斷成兩截，掉deu6咗落去霍格華茲橋下面嘅廢墟嚟杜絕後患。

J·K·羅琳喺一次訪問度透露，《哈利波特：死神的聖物》嘅第一版標題係「哈利·波特與接骨木魔杖」。

已知嘅擁有人

• 《三兄弟的故事》裡面嘅大佬：安提歐·皮福雷Antioch Peverell；
• 殺死咗安提歐·皮福雷嘅巫師；
• 邪惡嘅艾摩利Emeric the Evil；
• 卓越嘅艾格伯Egbert the Egregious；
• 寫咗本危險嘅黑魔法書籍《極惡魔法Magick Moste Evile》嘅古代巫師—高德拉Godelot；
• 希爾沃Hereward；
• 巴拿巴·德伏里Barnabas Deverill；
• 盧錫斯Loxias；
• 阿卡士Arcus／厲衛司Livius；
• 穆齊夫·葛果羅威Mykew Gregorovitch；
• 蓋勒·葛林戴華德Gellert Grindelwald；
• 阿不思·鄧不利多；
• 湯姆·瑞斗：因為盜取而得到，並唔係得到擁有權；
• 跩哥·馬份：打低鄧不利多之後成為真正嘅擁有人；
• 哈利·波特：因為打低咗跩哥·馬份而成為接骨木魔杖嘅擁有人；最後一任嘅持有者。

隱形斗篷

隱形斗篷

死神聖物嘅隱形斗篷Invisibility Cloak／Cloak of Invisibility係一件真正嘅隱形斗篷，意思係呢件隱形斗篷完全無任何缺點，包括唔受任何咒語撕裂同影響、具有永久性無辦法識穿到嘅隱形效果，同埋永遠唔會被磨損；而一般隱形斗篷嘅效用淨係得2-3年。

呢件隱形斗篷最初原本屬於《三兄弟的故事》裡面嘅三佬—伊諾特·皮福雷Ignotus Peverell。呢件隱形斗篷喺佢死咗之後透過父傳子嘅方式傳到去皮福雷嘅後代—佢幾代之後嘅孫女—高錐客洞嘅伊奧嵐·皮福雷Iolanthe Peverell，伊奧嵐嫁咗俾格洛斯特郡波特家嘅哈德溫·波特Hardwin Potter，然後直到傳去俾詹姆·波特。喺詹姆·波特被殺前夕，因為鄧不利多發現呢件隱形斗篷正正就係佢搵咗好多年嘅死神聖物之一而借咗返去研究（所以無落入佛地魔手上）。鄧不利多喺10年後，佢响哈利·波特喺霍格華茲讀一年級嗰時將呢件斗篷用聖誕禮物嘅方式嚟還俾哈利。

雖然著咗隱形斗篷可以令麻瓜同埋巫師都睇唔見佢，但係有啲生物可以察覺到隱藏喺隱形斗篷下面嘅人，揭示人類存在嘅咒語都可以檢測到穿着者嘅存在。以下係小說裡面曾經出現過嘅案例：

• 康尼留斯·夫子喺《哈利波特：消失的密室》裡面去到海格嘅屋仔將海格帶去阿茲卡班監獄嗰陣，魯休思·馬份將鄧不利多嘅停職信交去佢手上。喺佢哋兩個傾緊嗰陣，鄧不利多感應到哈利同榮恩喺海格嘅屋仔下面。
• 喺《哈利波特：阿茲卡班的逃犯》裡面，石內卜俾哈利跟蹤嗰陣時發覺好可疑，佢甚至伸出手去捉住空氣；鄧不利多警告話，催狂魔對人類嘅感知係唔會受到隱形斗篷嘅影響，因為佢哋係盲嘅，只係通過情感嚟感知到人類嘅存在。
• 假冒嘅瘋眼穆敵（小巴提·柯羅奇）同海格傾計嗰陣用佢嘅魔眼發現到哈利，佢話俾哈利知係有一啲可以睇得穿隱形斗篷嘅方法；哈利披住隱形斗篷被困喺會郁嘅樓梯裡面嗰陣時，管理員飛鼠隻貓—拿樂絲太太—佢對眼一直盯實哈利嚟睇（其實哈利唔太確定隱形斗篷對貓有無用，但係喺電影《哈利波特：神秘的魔法石》裡面，疑似對貓嚟講無用，因為拿樂絲太太當時有追住佢嚟跑）。
• 喺《哈利波特：混血王子的背叛》裡面，就算哈利著住件隱形斗篷，但係佢無意中郁動咗附近嘅嘢，令到馬份意識到佢正喺佢嘅火車車廂入面，仲成功咁利用全身鎖咒Petrificus Totalus搞到哈利全身郁唔到。

哈利在整個系列入面都有用到呢件斗篷嚟方便喺學校周圍去冒險同埋避開佛地魔嘅追殺，而哈利嘅老豆都曾經將呢件斗篷用喺類似嘅目的。鄧不利多喺《哈利波特：死神的聖物》結局裡面向哈利解釋呢件斗篷真正嘅魔法係可以用嚟做屏障去保護其主人同埋其他人。哈利最後將呢件隱形斗篷保留咗落嚟，諗住有一日可能會將佢傳俾自己嘅細路。

喺舞台劇《哈利波特：被詛咒的孩子》裡面，哈利將佢嘅隱形斗篷傳俾大仔詹姆·天狼星·波特，仲話佢「從嗰陣時開始就一直喺度講住隱形斗篷」；不過，嗰件隱形斗篷後嚟俾詹姆嘅細佬阿不思·波特偷咗嚟匿埋避開霍格華茲嘅惡霸。

已知嘅擁有人

• 《三兄弟的故事》裡面嘅三佬：伊諾特·皮福雷Ignotus Peverell；
• 伊諾特·皮福雷嘅後裔；
• 皮福雷幾代之後嘅孫女—高錐客洞嘅伊奧嵐·皮福雷Iolanthe Peverell（結婚後跟夫姓波特）；
• 哈利·波特嘅阿爺弗利蒙·波特Fleamont Potter；
• 哈利·波特嘅老豆詹姆·波特；
• 哈利·波特；
• 哈利·波特嘅大仔—詹姆·天狼星·波特James Sirius Potter；
• 哈利·波特嘅細仔—阿不思·賽佛勒斯·波特Albus Severus Potter（保管，唔算係擁有人）；

重生石

魔佛羅·岡特嘅戒指

重生石Resurrection Stone係一件能夠俾擁有人用半實體嘅形式將已經過咗身嘅親友帶返嚟自己身邊，仲可以同佢哋溝通嘅魔法石。由重生石所產生天狼星·布萊克嘅影像話俾哈利知，重生石所產生嘅佢同埋其他人都係哈利嘅一部分，而其他人係睇唔見嘅。呢個似乎表明咗呢啲幻影係喺記憶入面召喚出嚟嘅，親人並唔係真正咁復活咗。

這塊魔法石由《三兄弟的故事》裡面嘅二佬卡德馬·皮福雷Cadmus Peverell傳到去魔佛羅·岡特Marvolo Gaunt手上嗰時，呢粒魔法石被鑲嵌喺一隻帶有死亡聖物象徵符號嘅家族戒指上面，唔知情嘅岡特信錯咗呢隻戒指就係皮福雷家族嘅紋章，仲對呢隻戒指珍而重之咁，佢用呢隻戒指嚟吹噓自己嘅祖先同埋血統純潔。鄧不利多同葛林戴華德都想得到呢粒魔法石，但係佢哋係出於唔同嘅原因：鄧不利多想用佢嚟同死咗嘅屋企人去交流；但據講葛林戴華德諗住用佢嚟創造一支好似喪屍一樣嘅陰屍Inferi軍隊。哈利話重生石係死神聖物之中佢最想要嘅嗰個，就好似鄧不利多咁樣，佢可以講得出佢想再次交流嘅人。

佛地魔意識到呢隻戒指嘅古老屬性，於是決定用嚟做分靈體，不過佢並唔知道嗰粒魔法石仲有額外嘅魔法。喺佛地魔攞到嗰隻戒指之後，就將佢變成咗分靈體仲將詛咒施加落去裡面仲收埋喺岡特家已經廢棄嘅屋裡面。鄧不利多喺魔佛羅嘅莊園搵到嗰隻戒指，認得出呢個既係死神聖物之一亦都係一個分靈體，而戒指上面嘅寶石正正就係重生石。由於鄧不利多被試吓去利用重生石嚟同已經過咗身嘅屋企人傾計嘅慾望蒙蔽咗心智，佢又唔記得咗嗰隻戒指係分靈體嘅容器而好可能受到佛地魔詛咒嘅保護，於是佢就俾施加落戒指度嘅詛咒傷咗。呢個詛咒將鄧不利多隻手毀咗，仲蔓延去到佢全身。雖然石內卜用魔法局限咗蔓延嘅部分喺手嗰度，但係鄧不利多註定咗只係剩低最多一年嘅壽命。

鄧不利多喺《死神的聖物》入面將重生石收埋喺哈利第一次捉住嘅金探子裡面，仲將佢用遺物嘅方式嚟送俾哈利，而收埋咗重生石嘅入口寫住「我在結束時開啟I open at the close」。直到哈利喺面對佛地魔嘅追殺同埋諗住自己就嚟要死嗰陣時，先至領悟到呢句說話仲打開咗金探子嚟發現到喺入面嘅重生石。重生石令到詹姆、莉莉、天狼星同埋路平嘅靈魂出現，仲帶勇氣俾佢去面對佛地魔。哈利最後將重生石掉deu6喺禁忌森林入面，仲決定唔去搵佢，而鄧不利多嘅畫像都讚呢個決定係一個啱嘅選擇。

已知嘅擁有人

• 《三兄弟的故事》裡面嘅二佬：卡德馬·皮福雷Cadmus Peverell；
• 卡德馬·皮福雷嘅後裔—岡特家族Gaunt family；
• 魔佛羅·岡特Marvolo Gaunt；
• 魔份·岡特Morfin Gaunt；
• 佛地魔Voldemort；
• 阿不思·鄧不利多；
• 哈利·波特。

出面網頁

• 《哈利波特》寓言動畫《三兄弟的傳說》 Wayback Machine嘅版面存檔備份