民政事務專員

民政事務專員，係香港民政事務局民政事務總署各區民政事務處嘅主管，係香港政府派駐落地區層面嘅最高級官員，由首長級丙級政務官或者高級首席行政主任出任，職級屬於首長級薪級第2點。

爭議

喺2019年區議會選舉後，由於民主派議員喺18區區議會攞到大多數民選議席，令到民主派成功控制多區區議會。之後，民主派喺區議會會議上多次提出唔同動議或議案，都被多區嘅民政事務專員阻撓或反對，令議案或會議冇辦法順利通過，因此被部分市民同區議員質疑身為公務員嘅民政事務專員有冇盡忠職守，係唔係政治唔中立，偏袒特區政府同建制派。