混合物
混合物（英文：mixture）喺化學上係指兩種或者以上嘅化學物質就噉溝埋一齊，但兩者並無任何化學反應，所以喺原子層面仲係兩種唔同嘅物質，兩者會保持各自嘅物理特性。例如係將幾粒沙倒入水裏面，可以清楚睇到沙同水各自嘅化學特性都冇變－所以喺呢種情況下，兩者形成嘅係一種混合物；混合物嘅最大特徵係可以用唔涉及化學反應嘅方法嚟分返開，例如想像攞個筲箕，假設個筲箕上面啲窿夠細，將混合物倒落去個筲箕嗰度，就可以將沙同水分返開[1]。混合物可以係溶液、懸浮液或者膠體[2]。
純物質（上）同混合物（下）嘅圖解；啲細細粒嘅圓形表示唔同嘅化學元素嘅原子。
亦都有一啲化學物質就噉望落似係一種化合物（chemical compound），但查實係混合物，例如係空氣噉，古時嘅人好多時都諗住空氣係一種單一物質（睇古典元素當中嘅風），但用各種嘅分離過程做嘅研究發現，查實空氣係由氮氣（）、二氧化碳（）同氧（）等嘅多種氣體化學物質溝埋一齊形成嘅混合物[3]。
分離過程改
分離過程（seperation process）係化學嘅一門子領域，專門研究點樣將一樣混合物入面嘅各種唔同化學物質分返開[4]。例如下圖就係喺實驗室做蒸餾（distillation）－一種成日用喺液體混合物身上嘅分離過程－用嘅架撐嘅抽象圖解[5][6]：
- 蒸餾嘅原理係，混合物入面嗰啲唔同嘅化學物質會保留各自嘅物理特性（混合物嘅定義），所以混合物唔同成份之間嘅沸點（指每隻物質喺咩溫度會蒸發）通常都會唔同，而如果隻混合物裏面嘅嗰啲唔同化學物質沸點有明顯嘅差異，就可以用蒸餾將佢哋分開；
- 喺附圖裏面嘅 13 同 14 等嘅部份會將隻混合物（裝喺 15 嗰個位）加熱；
- 加熱到咁上下，沸點最低嗰隻化學物質（暫且嗌佢做「液體 A」）會蒸發並且由啲管道引導去 8 嗰個位（同時研究者可能喺呢個時候調低 13 同 14 嘅熱度）；
- 喺 8 嗰個位研究者會同隻化學物質做冷卻（例如想像 16 係一盤冰水），等變咗氣體嘅液體 A 凍到變返液體；
- 跟住研究者就可以攞走 8 嗰個容器－呢個容器會裝住純嘅液體 A，然後佢就要換過個新嘅容器落 8 嗰度同埋加返大 13 同 14 嘅熱度；
- 一路做上述嘅工序，做到攞到嗮啲想要嘅純化學物質為止。
睇埋改
攷改
- ↑ Ashworth, William; Littl1, Charles E., eds. (2001). "Mixture". The Encyclopedia of Environmental Studies. Online publisher:Science Online. Facts on File, Inc.
- ↑ Whitten K.W., Gailey K. D. and Davis R. E. (1992). General chemistry, 4th Ed. Philadelphia: Saunders College Publishing.
- ↑ M. M. Avedesian; Hugh Baker. Magnesium and Magnesium Alloys. ASM International. p. 59.
- ↑ Wilson, Ian D.; Adlard, Edward R.; Cooke, Michael; et al., eds. (2000). Encyclopedia of separation science. San Diego: Academic Press.
- ↑ Allchin, F. R. (1979). "India: The Ancient Home of Distillation?". Man. 14 (1): 55–63.
- ↑ Harwood, Laurence M.; Moody, Christopher J. (1 January 1990). Experimental Organic Chemistry: Principles and Practice (Illustrated ed.). Blackwell Scientific Publications.
