疊碼仔粵拼daap6 ma5 zai2)係澳門賭業其中一環,家陣主要負責幫賭場拉賭客去賭錢[1],正式稱呼係博彩中介人[2]

若果要指明係女人,會講女疊碼[3](仔)[4]。疊碼仔同扒仔兩種職業相似,又有嘢唔同。

字詞

陪賭嘅時候,疊碼仔(通常)會用面額價賣泥碼畀賭客,用來賭錢。而賭場會用低過面額些少嘅價錢賣泥碼畀疊碼仔。(泥碼只可以用來落注;現金碼可以要來換返同面額一樣嘅真銀。用泥碼賭,進賬部分用現金碼派,損失嗰忽由泥碼度扣——並唔係收澌啲泥碼,再齋派現金碼。)疊碼仔喺賭場同埋賭客中間交易,收走真銀或者現金碼,再派出泥碼,會賺到差價(俗稱碼佣)。呢個誘因驅使疊碼仔盡量令賭客落親注都用泥碼,於是就會頻頻左換右換,渠哋個名就係由爾啲將一疊疊籌碼舞來舞去嘅動作而來[5]

「疊碼仔」呢個口語詞,有好多寫法:有人將「疊」寫成「沓」或者「叠」;「碼」寫成「馬」。

近來

澳門

2008年澳門特區政府宣布,執行《中介人行政法規》,規定賭廳(又叫貴賓廳)廳主同疊碼仔要攞——要冇刑事犯罪記錄,先至作得,雙方係正式嘅生意拍檔。疊碼仔嘅主要任務係揾大客,帶入去賭場貴賓廳賭錢;有得抽佣落袋,尤其是喺換泥碼呢個步驟[6],法例重准疊碼仔借錢畀賭客[7]。除此以外亦有種種相關服務,有啲重係「一條龍」式嘅添[8]。而扒仔就係專喺賭場度揾目標,呃呃啗啗,不擇手段,大小通吃嗰班[9]

香港

「疊碼仔」嘅意思比較含糊。喺香港境内,得政府嘅香港賽馬會准合法開賭,而渠又無請疊碼仔(中介人)。不過,都有爾行嘅人揾食——啗人過大海、上賭船、幫襯賭錢網站同埋賭檔[10]……外圍賭局都有靠渠哋揾賭仔。有傳媒會叫啲喺機舖度幫人將代幣或者積分換成真錢嘅人作疊碼仔[11][12]

過去

「疊碼仔」同「扒仔」幾乎係同義詞;都會用種種手段由賭客身上賺錢,合法同犯法嘅嘢都會做。澳門以外嘅傳媒,有唔少到咗今日依然唔會去區分。

睇埋

  1. "一個賭場疊碼仔的澳門往事". 新華澳報. 喺2020-10-11搵到.
  2. "重新審查適當資格之申請". 澳門特別行政區政府入口網站 (中文). 喺2020-10-12搵到.
  3. "女疊碼叱咤賭船掀風暴". Apple Daily 蘋果日報 (中文). 喺2020-10-12搵到.
  4. "兩刀客狂斬女疊碼仔". Apple Daily 蘋果日報 (中文). 喺2020-10-12搵到.
  5. 五一, 王. "一場兩制:歷史視野下的澳門貴賓賭業" (PDF). 澳門理工學報. 2016年第4期: 34–43.
  6. "【一周必看】 叠馬仔試過日賺2百萬". Apple Daily 蘋果日報 (中文). 喺2020-10-12搵到.
  7. "澳門特別行政區 政府博彩監察協調局". www.dicj.gov.mo. 喺2020-10-12搵到.
  8. "何謂博彩中介人? - 香港經濟日報 - 知識庫 - 金融財經". service.hket.com. 喺2020-10-15搵到.
  9. 魯嘉裕 (2018-11-07). "【澳門風雲】博彩業規範化 叠碼仔變正行 未趕絕「扒仔」成隱患". 香港01 (中文). 喺2020-10-12搵到.
  10. "何謂非法賭博 | 有節制博彩 | 香港賽馬會". www.hkjc.com. 喺2020-10-10搵到.
  11. "專題:機舖變賭場 IVE生輸到借貴利". Apple Daily 蘋果日報 (中文). 喺2020-10-12搵到.
  12. "疊碼仔殺入機舖". 太陽報 (中文). 喺2020-10-12搵到.