砵典乍街

砵典乍街（典讀甸；英文：Pottinger Street），又寫砵甸乍街，係香港一街，喺中環一帶。原街只係行人，依山而上，時斜路，時樓梯，舖晒石板，所以又叫石板街。後尾跟填海，向北伸入填地，呢段可以行車。中環填地一段，由干諾道中起，到皇后大道中止。過皇后大道中之後，就係石板街。石板街可以上荷李活道同雲咸街分界，過馬路就係舊中環差館。條街係香港中環早期街道之一。

石板街頭嘅梯級

石板街一景

砵典乍街同皇后大道中嘅路口，右見中藝，左見萬宜

二十世紀初嘅砵典乍街

約十九世紀九十年代嘅砵典乍街

名

條街係一八五八年命名。砵典乍個名，來自香港首任總督砵甸乍。雖然個名寫典字，但人人都破讀做甸。之不過唐人多數叫石板街。

史

砵典乍街係條舊街，喺十九世紀末，佢係中環唐人同洋人分野。《香港雜記》有話「西人庄口，俱萃於中環，由砵典乍街至操兵地之間。」可見砵典乍街以東，係當時西人集中地，而唐人就喺街西發展。

街

填地

中環填地一段，由干諾道中起，過德輔道中，斜上皇后大道中。過皇后大道中之後，就係上山嘅石板街。

干諾道街口，可以上行人天橋，駁去全港最長嘅行人天橋，卽中區行人天橋，側邊有交易廣場。干諾道到德輔道一段，東南一邊，有 華人銀行大廈同華懋大廈，而西北一邊，有永安集團大廈。華人銀行大廈，有門牌二號A。喺德輔道街口，見電車路橫過。德輔道同皇后大道一段，西北一側，係萬宜大廈，而東南一側，有唔少大廈，德輔道街口，有軟庫中心，其餘大廈門號由二號到卅號，到皇后大道街口，有泛海大廈，轉角位有中藝百貨。

石板街

石板街會過士丹利街，再上就到威靈頓街，呢度街口，亦斜角分出擺花街。過威靈頓街之後，再上，東面有樂慶里，西面有伊沙里，再上就係荷李活道同雲咸街分界，對住舊中環差館。舊中環差館，舊時又叫巡補房。《香港雜記》有云，「由砵典乍街直上，便是巡捕房之正門。」

石板街一段，石板係麻石來嘅。石板打橫一行行，凹凸相間，方便人上落。雨水會喺兩邊瀉走。街邊兩邊有小販檔。

二戰前砵典乍街有防空隧道（Air-Raid Precaution Tunnels），但後尾廢棄唔用。