阿斯圖里亞斯女親王莉安諾

呢個人物係用緊西班牙人名：首姓或者父姓（即老豆個姓）係「波旁」，次姓或者母姓（即阿媽個父姓）係「柯蒂斯」。

阿斯圖里亞斯女親王莉安諾（西班牙文：Leonor, Princesa de Asturias，2005年10月31號—），全名萬聖嘅莉安諾·德波旁－柯蒂斯（西班牙文：Leonor de Todos los Santos de Borbón y Ortiz），係西班牙第一皇位繼承人，現任西班牙國王菲臘六世大女。

阿斯圖里亞斯女親王莉安諾 Leonor, Princesa de Asturias
2023年，莉安諾親王
阿斯圖里亞斯親王
在位	2014年6月18號ー
前任	菲臘六世 (西班牙)
私人明細
全名	萬聖嘅莉安諾·德波旁－柯蒂斯
皇族	波旁王朝
父	菲臘六世
母	莉迪斯雅王后
出世	(2005-10-31) 2005年10月31號 西班牙馬德里

簡歷

早年

莉安諾2005年10月31號凌晨一點四十六分，響馬德里魯伯國際醫院（英文：Ruber International Hospital）通過「剖腹生仔」呢個方法出世，出世嗰陣重3540克、長47cm，係阿斯圖里亞斯親王菲臘同埋莉迪斯雅嘅第一個細路。因為佢係王儲個女，所以佢當時淨係得「王女」呢個銜頭。佢嘅出世由王室通過短訊公佈。

佢嘅臍帶響剪咗後畀人送去亞利桑拿州嘅臍帶血注冊處登記同埋儲存。11月7號正式出院。響2006年1月14號，佢接受洗禮，儀式響查瑞拉宮舉行，由馬德里總主教兼樞機安東尼奧·羅科·科雷拉主持。同老豆菲臘六世一樣，受洗用嘅水都係嚟自約旦河。佢嘅教父母就係佢嘅阿爺阿嫲，即時任國王環卡洛斯一世同蘇菲亞王后。佢嘅洗禮名係萬聖嘅莉安諾（英文：Leonor de Todos los Santos）。

教育同活動

2020年，西班牙王室同首相出席第14屆西班牙國會開幕禮，其中左三係莉安諾

莉安諾響西班牙皇家禁軍設立嘅兒童日間護理中心開始接受教育。響2008年9月15號，佢開始上小學，入讀響阿羅凡卡（暫譯，英文係Aravaca）嘅Santa María de los Rosales，而佢老豆菲臘六世同細妹蘇菲亞王女都響度讀書。身為王室成員，佢都識唔少語言，除咗西班牙文之外，佢亦學咗英文（從佢嘅英國籍保姆同阿嫲蘇菲亞王后嗰度學返嚟）同埋普通話。

響2014年，佢響穆爾西亞嘅穆爾西亞ー聖西維爾機場（英文：Murcia–San Javier Airport）第一次公開露面。同年6月18號，阿爺環卡洛斯一世正式退位，老豆菲臘成為國王，係菲臘六世，而莉安諾亦由王女升為王儲，得到咗「阿斯圖里亞斯親王」呢個銜頭。10月，佢嘅蠟像響馬德里Museo de Cera 蠟像館揭幕。

2015年5月20號，佢響學校附近嘅教堂接受第一次聖餐。5月20號，菲臘六世頒發咗西班牙最高榮譽ーー金羊毛騎士團勳章畀佢。西班牙部長委員會批准佢可以有自己嘅紋章。

2018年，正值佢老豆50歲生日，菲臘六世畀咗金羊毛騎士團項飾畀佢。同年9月，莉安諾去到可法東加出席阿斯圖里亞斯公國成立1300周年，係佢第一次出席官方外出活動。10月31號，佢響馬德里塞萬提斯學院發表咗佢嘅第一次公開演講，並且讀咗西班牙憲法第一條。

2019年10月8號，佢響阿斯圖里亞斯女親王獎上發表演講。同年11月4號，佢響巴塞隆拿赫羅納女親王頒獎禮上發表演講，當中佢流利咁用咗四種唔同話，分別係西班牙文、加泰隆尼亞文、英文同埋阿拉伯文。

2021年2月10號，王室宣佈佢將會響同一年嘅夏季去英國大西洋學院接受兩年嘅國際文憑高中課程，學費會由父王同阿媽畀。同時佢亦響塞萬提斯學院成立20周年紀念會上第一次獨奏。

莉安諾響8月左右已經到英國準備開學。至於活動方面，盛傳將會由細妹蘇菲亞代為處理。

王位繼承問題

2014年，菲臘六世登基，莉安諾（第一排左邊第二個）亦由王女升為王儲

佢嘅出世令到西班牙人重新關注對於憲法入面由男性優先繼承王位嘅辯論，雖然前首相薩帕特羅都想改憲法，而社會都係有共識修改憲法，但最後因為細妹蘇菲亞嘅出世而不了了之。後嚟響2009年，環卡洛斯一世改咗法令，講到明貴族嘅爵位由原先一定嘅大仔優先，改為第一個仔女優先，睇落係鋪平咗條路畀莉安諾。但係目前西班牙王位繼承都仲未改，都仲係大仔優先，換言之只要佢阿媽莉迪斯亞王后生多個仔出嚟，咁莉安諾就唔再係王儲。至於點解唔改，因為一改就要改埋憲法，咁就要經國會，甚至可能去到要公投，又要搞一大輪，又唔知得唔得。

當佢滿18歲嗰陣，身為阿斯圖里亞斯親王，佢要到國會宣誓效忠憲法。如果最後佢真係登基做女王，咁佢就係繼伊莎貝拉二世之後嘅第一位女王，亦係西班牙自1474年初步統一之後嘅第四位女王。佢可以揀承接納華拉嘅莉安諾女王，成為「莉安諾二世」。

銜頭同徽章

• 2005年10月31號ー2014年6月17號：西班牙莉安諾王女殿下，全稱：西班牙王女萬聖嘅莉安諾·德波旁－柯蒂斯殿下
• 2014年6月18號ー：阿斯圖里亞斯女親王莉安諾殿下

自老豆2014年6月18號登基之後，佢唔單止得到「阿斯圖里亞斯親王」呢個銜頭，佢仲得到咗芝羅拿女親王、維亞拿女親王、白峰女公爵、錫維立女伯爵同埋巴拉格爾女爵呢五個銜頭，所以佢嘅全稱係：阿斯圖里亞斯女親王，芝羅拿女親王，維亞拿女親王，白鋒女公爵，錫維立女伯爵，巴拉格爾女爵萬聖嘅莉安諾·德波旁－柯蒂斯殿下

Coat of arms of 阿斯圖里亞斯女親王莉安諾

註解 2015年，響佢差一月就到10歲個陣，老豆菲臘六世頒發咗金羊毛騎士團勳章畀佢，可以響徽章上面用騎士團勳章。之後一日西班牙政府正式通報，佢可以有自己嘅徽章。 毛飾 阿斯圖里亞斯親王嘅王冠 盾紋 徽章有以下圖案: 左上角嘅圖案代表卡斯提亞；左下角就係代表利昂；右上角代表阿拉貢王國；右下角代表納華拉王國；最下面嘅個朵花就代表格蘭納達王朝；而正中間就係代表波旁王朝。 其他部位 有一條有三點深藍色嘅全藍色帶 旗幟 旗織係亮藍色（即阿斯圖里亞斯公國旗嘅顏色）正方形旗；旗織入面就有莉安諾嘅徽章。

軼事

自六歲起已經鍾意玩小提琴，亦鍾意騎馬。

佢同時係一位左優。

註

攷

上一任 第一位

西班牙第一皇位繼承人 2014年ー

下一任 蘇菲亞王女